Nkene okabroshure Onkundana ombwanawa ya za kuKalunga ke na okulongithwa
Okabroshure haka okape oka nuninwa oku tu kwathela uuna tatu ningi omaishunoko nosho wo okutameka omakonakonombiimbeli
1. Okabroshure okape keni ka gandjwa poshigongi shoshitopolwa “Gamena omutima gwoye” ka nuninwa oku tu kwathela mokuninga omaishunoko nosho wo okutameka omakonakonombiimbeli?
1 Poshigongi shoshitopolwa “Gamena omutima gwoye,” otwa li twa nyanyukwa noonkondo sho twa pewa okabroshure okape ke tu kwathele sho tatu ningi omaishunoko nosho wo okutameka omakonakonombiimbeli. Iileshwa yokabroshure Onkundana ombwanawa ya za kuKalunga iifupi ya fa yokabroshure Kalunga ota pula hoka ka pingenwa po. Shika otashi ke tu kwathela tu longithe okabroshure hoka okutameka omakonakonombiimbeli nonando otu li posheelo shegumbo. Ihe nonando okabroshure Kalunga ota pula otaka kundathana kombinga yiitegelelwa yopaKriste, mbyoka iidhigu okutaambiwa ko kaakonakoni aape, okabroshure haka okape otaka popi kombinga yonkundana ombwanawa ndjoka tayi adhika mOmbiimbeli. — Iil. 15:35.
2. Okabroshure Onkundana Ombwanawa oka nyanyangidhwa nelalakano lyashike?
2 Oka nyanyangidhwa nelalakano lyashike? Aamwatate muuyuni awuhe oya kala nokupula oshilongitho oshipu shoka tashi vulu okuhilila omuntu koshili notashi fala mokukonakona embo Omalongo gOmbiimbeli, ndyoka li li oshilongitho shetu sha simanenena mokuninga omakonakonombiimbeli. Aantu mboka haya kala ye na uumbanda okukonakona membo, olundji ohaya kala ya hala okukonakona Ombiimbeli taya longitha okabroshure. Kakele kaashono, uubroshure ohawu vulu okutolokwa momalaka ogendji.
3. Okabroshure haka oka yooloka ko ngiini kiileshomwa iikwawo yokukonakonwa?
3 Nkene ku unganekwa: Iileshomwa yetu oyindji yokukonakonwa oya nyolwa momukalo moka omuntu ta vulu oku yi lesha nokuuva ko oshili, nokuli nonando kapu na ngoka te mu kwathele. Oshileshomwa shika oshi ili. Osha nyolwa nelalakano lyokulongithwa uuna omuntu ta konakona Ombiimbeli pu na ngoka te mu kwathele. Onkee ano, uuna we ka pe omuntu, onawa mu kundathane okatendo kamwe nenge uyali. Uutendo uufupi notawu vulu nokuli okukundathanwa nomuntu posheelo shegumbo nenge pongeshefa ye. Nonando oshiwanawa okutameka noshileshwa shotango, otatu vulu okutameka ekonakono nomuntu poshileshwa kehe mokabroshure.
4. Okabroshure otake tu kwathele ngiini okulonga aantu okuza mOmbiimbeli?
4 Miileshomwa yetu oyindji, omayamukulo gomapulo otaga vulu okwaadhika muutendo. Ihe moshileshomwa shika, omayamukulo otaga adhika mOmbiimbeli. Aantu oyendji oya hala okwiilonga okuza mOmbiimbeli pehala lyokwiilonga miileshomwa yetu. Onkee ano, konyala omanyolo ogendji ngoka ge li mo inaga tothwa mo. Oge na okuleshwa mOmbiimbeli mo mwene. Shika ohashi kwathele aakonakoni ya tseye kutya shoka tayi ilongo osha za kuKalunga. — Jes. 54:13.
5. Omolwashike sha simana nakuninga ekonakono a kale i ilongekidhila nawa ekonakono kehe?
5 Okabroshure inaka fatulula omanyolo agehe. Omolwashike mbela? Omolwaashoka oka nuninwa okuladhipika omukonakoni a pule omapulo nosho wo nakulonga a longithe uunkulungu we wokulonga. Onkee ano, osha simana okwiilongekidhila nawa ekonakono kehe. Otatu londodhwa kaatu kale otse tatu popi unene. Otu hole shili okufatulula omanyolo. Ihe opo tu kwathele omukonakoni, onawa tu pule a fatulule kutya enyolo otali ti shike. Ngele tatu longitha omapulo nuukeka, otatu mu kwathele a mone kutya enyolo kehe otali ti shike. — Iil. 17:2.
6. Ongiini tatu vulu okulongitha okabroshure: (a) mpoka aantu inaayi itaala naanaa muKalunga nosho wo mOmbiimbeli? (b) uuna tatu longo egumbo negumbo? (c) uuna tatu tameke omakonakonombiimbeli posheelo shegumbo? (d) uuna tatu ningi omaishunoko?
6 Okabroshure haka otaka vulu okugandjwa ethimbo kehe ngaashi iileshomwa yilwe yokukonakonwa, kutya nduno oshike tashi gandjwa omwedhi ngoka. Oyendji otaya ka nyanyukilwa okutameka nako omakonakonombiimbeli posheelo shegumbo. Kakele kaashono, ngaashi sha popilwe poshigongi shoshitopolwa, oku ka longitha uuna to ningi omaishunoko kwaamboka yu ulika ohokwe “otaku vulu lela oku tu kwathela tu nyanyukilwe omaishunoko.” — Tala iimpungu pepandja 5-6.
7. Ongiini to vulu okuninga ekonakonombiimbeli to longitha okabroshure?
7 Nkene ekonakono li na okuningwa: Otatu vulu okutameka oonkundathana tatu lesha omapulo ngoka ge na oonomola noga nyolwa noondanda dho ondoka. Opo nduno, lesha okatendo nomanyolo ngoka ga nyolwa noondanda dhe endama. Pula omunegumbo omapulo nuukeka, opo wu mu kwathele u uve ko shoka omanyolo taga ti. Manga inoo ya koshitopolwa tashi landula ko, pula omunegumbo a yamukule epulo ndyoka lya nyolwa noondanda dho ondoka, opo wu shilipaleke ngele oku uvite ko. Pomatalelopo gotango, onawa mu tale owala epulo limwe ndyoka lya nyolwa noondanda dho ondoka. Konima, otamu vulu okulelepeka ethimbo lyoonkundathana dheni naye okukundathana oshileshwa ashihe.
8. Otu na okutya ngiini manga inaatu lesha enyolo, nomolwashike?
8 Omanyolo ngoka ga tetekelwa koshitya “lesha” omo unene hamu adhika eyamukulo lyepulo ndyoka lya nyolwa noondanda dho ondoka. Uuna to fatulula enyolo yanda okutya “omuyapostoli Paulus okwa nyola” nenge “ndhindhilika shoka Jeremia a hunganeka.” Omunegumbo otashi vulika a dhiladhile kutya otatu lesha oohapu dhaantu yowala. Oshihwepo wu tye “Oohapu dhaKalunga otadhi ti” nenge “Ndhindhilika shoka Ombiimbeli ya hunganeka.”
9. Mbela omanyolo agehe ngoka inaaga tothwa mo oge na okuleshwa pethimbo lyekonakono?
9 Mbela otu na okulesha omanyolo agehe ngoka ge etwa mo nenge otu na owala okulesha ngoka ga nyolwa “lesha”? Oshi ikolelela koonkalo. Omanyolo agehe ngoka ge etwa mo oge na elalakano. Kehe limwe oli na uuyelele wu shi okukundathanwa. Ihe uuna omukonakoni kee na ethimbo lya gwana, kee na naanaa ehalo nenge ha lesha nuudhigu, oshi li hwepo mu tale owala omanyolo ngoka ga nyolwa “lesha.”
10. Uunake tatu vulu okutameka okukonakona membo Omalongo gOmbiimbeli?
10 Uuna tu na okutameka nembo Omalongo gOmbiimbeli: Konima ngele twa kundathana lwiikando nongele ekonakono ohatu li ningi aluhe, nena otatu vulu okutameka nembo ndyoka, nenge tu tsikile nokabroshure Onkundana ombwanawa sigo twe ka mana ko. Omuuvithi kehe ota vulu okutokola kutya ota tameke okulongitha embo Omalongo gOmbiimbeli uunake. Uuna twa tameke membo ndyoka, mbela otu na oku li za ketameko? Kapu na omulandu gwasha moshinima shika. Omukonakoni kehe oku na oompumbwe dhi ili. Ihe aakonakoni oyendji ohashi ya kwathele ngele taye endulula oshileshwa osho tuu shoka, ye shi ya muule, membo Omalongo gOmbiimbeli.
11. Omolwashike twa pumbwa okutaandelitha lelalela okabroshure haka okape?
11 Molwaashoka otu li muuyuni moka onkundana ombwanawa ya pumba, otu na uuthembahenda uunene wokuuvitha onkundana ya dhenga mbanda, kutya Uukwaniilwa waKalunga otawu pangele, notwa tegelela masiku wu ete uuyuni uupe moka tamu ka kala uuyuuki. (Mat. 24:14; 2 Pet. 3:13) Otu na einekelo kutya oyendji mboka yu uva etumwalaka ndika otaya ka tsa kumwe noohapu ndhika dha nwethwa mo tadhi ti: “Oompadhi odho opala ngiini dhaangoka te ya ta zi koondundu te eta onkundana ombwanawa, tu uvitha ombili! Ota tseyitha elaka etoye lyehupitho e ta ti kuSion: ‘Kalunga koye oye omukwaniilwa!’” (Jes. 52:7) Natu longitheni okabroshure haka okape tu uvithileni aantu mboka ya sa enota lyopambepo moshitopolwa shetu onkundana ombwanawa ya za kuKalunga.
[Oshimpungu pepandja 5]
Uuna aantu inaayi itaala naanaa muKalunga nomOmbiimbeli:
● Miitopolwa yimwe, aauvithi oya mona kutya uutumbulilo “Kalunga” nosho wo “Ombiimbeli” ohawu ningitha aantu ya kale inaaya hala okupulakena. Ngele osho ngawo, petalelopo lyoye lyotango, oto vulu okukundathana nayo shoka hashi ipulwa unene nasho kaantu pomudhingoloko, ngaashi okukala ye na epangelo ewanawa, mpoka aanegumbo lyawo taya mono omakwatho ge na oshilonga nosho wo nkene onakuyiwa tayi ka kala. Konima yokukundathana iikando yontumba kutya otu shi shi ngiini kutya Kalunga oko e li, nomolwashike Ombiimbeli yi shi okwiinekelwa otatu vulu okutameka nokabroshure Onkundana ombwanawa.
[Oshimpungu pepandja 5]
Uuna tatu uvitha egumbo negumbo:
● “Onde ya ndi ku talele po ndi ku ulukile nkene tatu vulu okumona nuupu shoka Kalunga e tu nunina monakuyiwa. Sho to tala, Kalunga ote ke tu mangulula mo ngaa muupyakadhi muka tu li? [Tegelela a yamukule.] Okambo hano otake tu ulukile mpoka tatu vulu okwaadha eyamukulo kepulo ndyoka mOmbiimbeli. Mu pa okambo e to mu leshele okatendo kotango moshileshwa sho-1 nosho wo Jeremia 29:11.] Okutala kwaashoka twa lesha mpaka, mbela owu wete ngaa kutya Kalunga okwa hala tu kale tu na onakuyiwa ombwanawa? [Tegelela a yamukule.] Okambo hano ngele owe ka hala, ote vulu oku ke ku thigila. Oshikando tashi ya, otandi vulu ndi ye tu kundathane okatendo okatiyali tu mone eyamukulo kepulo lyopaMbiimbeli tali landula: ‘Kalunga ota ka hulitha po ngiini iinima mbyoka hayi ningitha aantu ya kale taya mono iihuna?’” Ngele omunegumbo okwa fa e na ethimbo lya gwana petalelopo lyotango, otamu vulu okulesha nokukundathana okatendo okatiyali nosho wo oovelise ndatu dhOmbiimbeli ndhoka dhe etwa mo. Ninga elongekidho wu galuke mu ye mu kundathane epulo etiyali moshileshwa osho tuu shoka.
● “Aantu oyendji oye hole okugalikana, unene tuu uuna ye li muupyakadhi. Nangoye oho galikana omathimbo gamwe? [Tegelela a yamukule.] Mbela oto dhiladhila kutya Kalunga oha pulakene komagalikano agehe nenge otashi vulika pu na omagalikano gamwe ihee ga hokwa? [Tegelela a yamukule.] Ondi na okambo hoka taku ulike nkene tatu vulu okumona omayamukulo komapulo ngaka. [Mu pa okambo e tamu kundathana okatendo kotango moshileshwa 12 nokulesha omanyolo ngoka ga nyolwa “lesha.”] Itashi nyanyudha mbela sho Kalunga e na ehalo oku tu pulakena? Ihe opo tu mone mo uuwanawa megalikano otwa pumbwa okutseya Kalunga nawa. [Yanuna poshileshwa oshitiyali e to mu ulukile uupalanyolo.] Otandi vulu oku ku thigila okambo haka ngele owe ka hala, noshikando shilwe otandi vulu okuya tu leshe omayamukulo gopaMbiimbeli gomapulo ngaka gahokitha.”
● “Aantu kunena ohayi ipula kutya uuyuni mbuka owu uka peni. Mbela oto dhiladhila kutya oonkalo onadhi ka hwepopale ngaa siku limwe? [Tegelela a yamukule.] Aantu oyendji oya nyanyukwa sho yi ilongo kutya mOmbiimbeli omu na onkundana ombwanawa ndjoka tayi tu pe etegameno. Mpaka opu na omapulo gamwe ngoka Ombiimbeli tayi yamukula.” Mu pa okambo e to mu pula a hogolole po epulo ndyoka a hokwa unene pomapulo ngoka ge li kefo lyahugunina. Opo nduno to yanuna poshileshwa e to mu ulukile nkene ekonakonombiimbeli hali ningwa. Ninga elongekidho wu shune ko mu ka kundathane epulo lya landula ko moshileshwa shoka.
[Oshimpungu pepandja 6]
Kambadhala okutameka ekonakonombiimbeli posheelo shegumbo:
● Onde ende po ndi ku ulukile nkene hatu konakona Ombiimbeli naantu mokambo haka okape. Okambo haka oke na iileshwa 15 mbyoka tayi ulike kutya openi to vulu okwaadha omayamukulo gomapulo ga simanenena mOmbiimbeli yoye. [Mu ulukila efo lyokombanda nosho wo lyahugunina.] Mbela opu na ngaa esiku limwe wa kambadhalele okuuva ko Ombiimbeli? [Tegelela a yamukule.] Nandi ku ulukile nkene iileshwa mbika iipu okukonakonwa. [Kundathaneni okatendo kotango kepulo etitatu moshileshwa oshititatu e tamu lesha Ehololo 21:4, 5. Ngele otashi vulika, kundathaneni okatendo ka landula ko nomanyolo ngoka ga nyolwa “lesha.”] Otandi vulu oku ku thigila okambo haka ngele owe ka hala. Otatu ku indile wu kambadhale okukonakona Ombiimbeli nando oshikando shimwe owala. Ngele owe shi panda, otatu vulu okutsikila. Oshikando tashi landula otatu ka konakona oshileshwa shotango. Oshi na owala uule wepandja limwe.”
[Oshimpungu pepandja 6]
Ke mu ulukila ngele wa shuna ko:
● Uuna tatu shuna kugumwe ngoka a li u ulika ohokwe, otatu vulu okutya: “Onda nyanyukwa oku ku mona ishewe. Onde ku etela okambo haka taka gandja omayamukulo ogendji gomapulo omawanawa gopaMbiimbeli. [Mu pa okambo e to mu lombwele a tale kefo lyahugunina.] Pomapulo ngaka owa hokwa po unene geni? [Tegelela a yamukule, e to pandja poshileshwa shoka a hogolola.] Nandi ku ulukile nkene okambo haka taka vulu okulongithwa, opo wu mone omayamukulo gopaMbiimbeli.” Mu ulukila nkene ekonakonombiimbeli hali ningwa mokukundathana okatendo kamwe nenge uyali nomanyolo ngoka ga nyolwa “lesha.” Kungawo owa tameka nale okukonakona nomuntu Ombiimbeli. Thigila omunegumbo okambo e to ningi elongekidho wu shune ko. Ngele mwa mana ko oshileshwa, otamu vulu okukundathana oshileshwa shilwe shoka a hogolola nenge mu tameke petameko lyokambo.