Nkene okabroshure Oolye taya longo ehalo lyaJehova kunena? ke na okulongithwa
Okabroshure haka okape oka nuninwa okukwathela aakonakonimbiimbeli ya tseye ehangano lyaJehova
1. Tumbula omatompelo gatatu kutya okabroshure Ehalo lyaJehova oka ndulukwa nelalakano lyashike.
1 Mbela owa tameka okulongitha okabroshure okape Oolye taya longo ehalo lyaJehova kunena? Elalakano lyako olyo (1) okukwathela aakonakonimbiimbeli ye tu tseye, (2) oku ya kwathela ya tseye iilonga yetu nosho wo (3) oku yu ulukila nkene ehangano lyetu hali longo. Oshileshwa kehe mokambo Ehalo lyaJehova oshi li owala pepandja limwe noto vulu oku shi lesha mominute ntano nenge omulongo.
2. Hokolola nkene okabroshure haka ku unganekwa nosho wo uukwatya wako.
2 Nkene ku unganekwa: Okabroshure haka oka topolwa miitopolwa itatu, kehe oshitopolwa osha kundathana iinima ya yoolokathana kombinga yehangano lyaJehova ngaashi sha popiwa metetekelo. Iipalanyolo ayihe yako 28 oya nyolwa molupe lwepulo nuupalanyolo mboka wa landulwa keyamukulo lyepulo owa nyolwa noondanda dho ondoka. Omu na omathano ga za kiilongo yi ili noyi ili yi vulithe 50 okuulika iilonga yetu yopaigwana. Iileshwa oyindji oyi na okampungu “Tseya oshindji,” hoka ke na omaetopo ngoka to vulu okuladhipika omukonakoni gwoye e ga landule.
3. Ongiini tatu vulu okulongitha okabroshure Ehalo lyaJehova?
3 Nkene to vulu oku ka longitha: Ulukila tango omunegumbo oshipalanyolo shoshileshwa shoka shi li molupe lwepulo. Ihe sho tamu lesha oshileshwa pamwe, tsa omuthindo uupalanyolo mboka wa nyolwa moondanda dho ondoka. Hugunina, kundathaneni omapulo ngoka ge li pevi lyepandja. Oshileshwa otamu vulu oku shi lesha ashihe sha pwa ko nenge mu kale hamu lesha ko okapalanyolo kamwe nokatendo kako e tamu ka kundathana. Tala kutya omanyolo geni ngoka inaaga tothwa mo tamu ka lesha. Ino dhimbwa okutala omathano nosho wo uumpungu “Tseya oshindji.” Poompito odhindji, iileshwa oyi na okukundathanwa melandulathano. Ihe otamu vulu okuya koshileshwa shilwe ngele opwa holoka sha sha pamba oshileshwa shoka. Pashiholelwa, ngele oshigongi shoshikandjo nenge shoshitopolwa shi li pokuthika oto vulu okuya koshileshwa 11.
4. Omolwashike wa nyanyukwa okukala wu na oshilongitho shika oshipe?
4 Uuna tatu konakona nagumwe Ombiimbeli, ohatu mu kwathele a tseye nawa Tate yetu gwomegulu. Ihe nonando ongaaka, otwa pumbwa ishewe oku mu longa kombinga yehangano lyaJehova. (Omayel. 6:20) Inatu nyanyukwa tuu sho tu na oshilongitho shika oshipe, shoka tashi shi ningi oshipu oku shi ninga!