Oolye taya longo ehalo lyaJehova kunena?
1. Uuwanawa wuni tatu ka mona uuna tatu konakona okabroshure Oolye taya longo ehalo lyaJehova kunena?
1 Omaukwanegumbo nosho wo oohandimwe otaya vulu okukonakona okabroshure Oolye taya longo ehalo lyaJehova kunena? mEsiku lyelongelokalunga lyuukwanegumbo nenge pekonakono lyopaumwene. Okabroshure haka okapitile poshigongi shoshitopolwa shoka sha li shi na oshipalanyolo: “Gamena omutima gwoye!” Okabroshure haka okanuninwa okukwathela aakonakonimbiimbeli yu uve ko ehangano lyaJehova. Oku ka konakona itaku ke tu kwathela owala tu kale tu na olupandu sho tu li mehangano lyaJehova, ihe otaku ke tu kwathela wo tu kale tu kashi nawalela uuna tatu ka longitha muukalele. — Eps. 48:13.
2. Omaukwanegumbo nosho wo oohandimwe otaya vulu ngiini okukonakona okabroshure mEsiku lyelongelokalunga lyawo?
2 Nkene taka vulu okukonakonwa: Omaukwanegumbo nosho wo oohandimwe otaya vulu okuunganeka ethimbo lyawo, opo ya vule okukonakona oshitopolwa shimwe moshiwike kehe. Omutse guukwanegumbo otagu vulu okuninga efalomo lyoshitopolwa kehe mokulesha aluhe epulo ndyoka li li pombanda yiitopolwa ayihe 28. Konima ota vulu okupula gumwe miilyo yuukwanegumbo a leshe okatendo kopetameko lela. Uuna okatendo ka leshwa ota vulu okupula iilyo yuukwanegumbo epulo ndyoka a lukila nale lya kankamena kokatendo hoka kopetameko. Okuza mpono, lesheni oshitopolwa kehe shoka sha tameka noondanda dha luudhikwa noku shi kundathana. Konima ngele mwe shi lesha, kundathaneni kutya ongiini tashi yamukula epulo ndyoka li li oshipalanyolo shoshitopolwa. Mokabroshure omu na wo omathano ogendji ngoka kehe gumwe ta vulu okuninga etyokosha kombinga yago. Omanyolo ngoka ge na enenedhiladhilo naga leshwe. Pehulilo lyoshitopolwa kehe, otashi ka kala shi li nawa opo mu endulule omapulo ngoka ge li pevi lela lyokaborshure. Ngele moshitopolwa omu na okampungu: “Tseya oshindji” naka leshwe e taku talika nkene aakonakonimbiimbeli taya vulu okumona uuwanawa mokulandula omaetopo ngoka ge li mo. Ngele ethimbo otali shi pitike, uukwanegumbo nenge omuntu pauhandimwe ota vulu okulongitha oshipalanyolo shoshitopolwa, opo e endulule oshiilongomwa shoka shi li mo. Nonando opu na eetopo ndika lya nuninwa omaukwanegumbo nenge oohandimwe, kehe uukwanegumbo nenge omuntu pauhandimwe ota vulu okuninga ekonakono momukalo ngoka tagu mu etele uuwanawa. Onkee ano, itashi ti kutya eetopo ndika li li mpaka olyo owala li na okulandulwa aluhe.
3. Ongiini tatu ka mona mo uuwanawa mokukonakona okabroshure hano?
3 Oshilyo kehe shuukwanegumbo oshi na okwiilongekidha nawalela, opo shika kuthe ombinga tayi ti sha pethimbo lyelongelokalunga. Pethimbo tamu kundathana oshitopolwa kehe, dhiladhila kutya ongiini to vulu oku shi longitha wu kwathele aakonakonimbiimbeli. Onkee ano, okabroshure hano okape otake ke tu kwathela, opo tu kwathele yalwe ya kale taya longo ehalo lyaKalunga ye tu fa noya kale wo ye na etagameno lyomwenyo gwaaluhe. — 1 Joh. 2:17.