Okabroshure okape hoka tatu ka gandja
1. Otatu ka gandja oshileshomwa shini muNovomba, nelalakano lyasho olini?
1 Poshigongi shoshitopolwa “Kaleni mwa tonata” mo 2009, opwa li pwa gandjwa okabroshure okape ke na oshipalanyolo Ombiimbeli oyi na etumwalaka lini? Omagongalo agehe muuyuni otaga ka gandja okabroshure hoka oshikando shotango muNovomba. Uuwanawa washike aantu moshitopolwa sheni taya ka mona mo muko? Aantu oyendji, unene tuu mboka ye li momalongelokalunga ngoka kaage shi gopaKriste inaya tseya naanaa Ombiimbeli. Onkee ano, pepandja eti-3 otaka fatulula kutya oka nyanyangidhwa opo ka kwathele aantu ya “mone ontseyo yopetameko yOmbiimbeli.”
2. Ongiini tatu vulu okugandja okabroshure?
2 Nkene tatu ke ka gandja: Oto vulu okutya: “Enyolo ndino owu li uvite ko ngiini?” [Lesha 2 Timoteus 3:16.] Oyendji mboka twa popi nayo oyi itaala oohapu ndhika, ihe yalwe oyu uvite kutya Ombiimbeli embo owala ewanawa. Ngoye Ombiimbeli owe yi tala ko ngiini? [Tegelela a yamukule.] Opu na omatompelo omawanawa oku yi konakona kutya nduno otu li melongelokalunga lini. [Lesha oontentekelihapu pombanda yepandja eti-3.] Sho to lesha etumwalaka lyOmbiimbeli lituntula ndyoka lya ngongwa paufupi mokabroshure haka oto ka mona kutya Ombiimbeli oyi na owala ehuku netumwalaka limwe.
3. Ongiini tatu vulu okugandja okabroshure haka uuna tatu longo miitopolwa moka aantu oyendji inaayi itaala mUukriste?
3 Ngele tatu longo miitopolwa moka aantu inaayi itaala mUukriste otatu vulu wo okutya: “Onda hala ndi ku pule kutya shoka tashi popiwa mEnyolo (nenge membo ndika eyapuki) owe shi tala ko ngiini? [Lesha Episalomi 37:11.] Sho to tala ombanda yevi otayi ka kala ya tya ngiini ngele ehunganeko ndika lya gwanithwa? [Tegelela a yamukule.] Ndika etegameno nehekeleko limwe owala lyomwaangoka ombiimbeli tayi gandja kaantu yomomaputuko noyomomaitaalo agehe.” Lesha okatendo pombanda yepandja eti-3 e to gandja okabroshure.
4. Ongiini tatu vulu okulongitha okabroshure haka tu tameke ekonakonombiimbeli?
4 Tameka ekonakonombiimbeli: Uuna tatu shuna komunegumbo natu mu dhimbulukithe shoka twa popile naye oshikando sha zi ko e tatu tala okatendo kamwe nenge uyali kombinga yaashoka twa popile, tatu longitha omapulo ngoka ge li kehulilo lyoshitopolwa shoka. Ngele otwa hala tu mu pe embo Omalongo gOmbiimbeli pethimbo mpoka, otatu vulu okulesha naye uuyelele mboka wu li konima yokabroshure e tatu mu pe embo noku mu pula kutya okwa hokwa oshipalanyolo shini e tatu lesha okatendo kamwe nenge uyali montopolwa ndjoka. Atuheni natu ninge oonkambadhala tu ka gandje okabroshure haka muNovomba.