Longitha uutraktate okutameka oonkundathana
1 Ito tsu kumwe mbela kutya okugandja uunzapo wu na oshizemo oshiwanawa oshi ikolelela unene tuu kokukatuka onkatu kwoye okutameka oonkundathana? Eshongo olyo okutya sha shoka tashi kwata ko ohokwe yomuntu opo a kuthe ombinga moonkundathana. Ihe ongiini shika tashi vulu okuningwa nomupondo?
2 Aauvithi oyendji oya mono kutya omuntu ota vulu okutameka oonkundathana mokulongitha iitya iishona ya hogololekeka nokugandja kamwe komuutraktate wetu wa kankamena kOmbimbeli. Iipalanyolo iiwanawa nomathano oga mbapekwa noga hokitha okutala. Okatraktate kake shi okadhigu komuntu, oshoka itaka gandja edhiladhilo kutya opu na uuyelele oundji okulesha. Nonando ongaaka, omatumwalaka omapu ngoka ge li muutraktate oga simana notaga vulu okulongithwa okuya mekonakonombimbeli.
3 Shika osho Onzapo yimwe ya li tayi dhiladhila paumwene: “Muuyuni mbuka we endelela, aantu olundji inaya hala okulongitha ethimbo olindji okulesha, ihe uutraktate ou na uule wa gwana okugandja etumwalaka lya simana ihe kali shi ele unene okukutha aantu ohokwe manga nokuli inaaye ka tala. Oundji womuutraktate onde u lesha, nolwahugunina ondi ilongo oshili.” Ino dhina nando oonkondo dhOohapu dhaKalunga ngaashi sha yelithwa moontumwafo ndhika dhi na etumwalaka lya nyanyangidhwa.—Heb. 4:12; yelekanitha Sakaria 4:10; Jakob 3:4, 5.
4 Omikalo ne omipu: Oyendji oye shi tyapula nomupondo mokulongitha omukalo omupu. (1) Ulikila omuntu wumwe womuutraktate e to mu pula kutya okeni a hokwa. (2) Konima sho omuntu a hogolola po kamwe, pula epulo lya longekidhwa nawa ndyoka tali tsu omuthindo enenedhiladhilo limwe lyomokatraktate. (3) Mokuyamukula epulo, lesha okatendo hoka tako opalele nenge omushangwa tagu opalele okuza mokatraktate. (4) Ngele einyengo ewanawa, tsikila okukundathana iikalimo yokatrakatate nenge ulika koshileshwa shimwe mokabroshure Ota Pula nenge kontopolwa yontumba membo Ontseyo ndyoka tali gandja omatyokosha ga gwedhwa po. Momukalo nguka otashi vulika u tameke nziya ekonakonombimbeli. Omaetopo taga landula otage ke ku kwatha okwiilongekidha shoka to ka popya kombinga yuutraktate une.
5 Oshipalanyole shokatraktate kedhina “Olye Ta Pangele Lelalela Uuyuni?” oshi li epulo lihokitha: Ngele meyamukulo lyalyo omuntu ngoka to popi naye ota ti “oKalunga” nenge “Kandi shi wo,” lesha omatumbulo gaali gopetameko pepandja 2 nosho wo okatendo kotango pepandja 3. Tsa omuthindo 1 Johannes 5:19 nosho wo Ehololo 12:9. Kutya nduno omuntu okwa limbililwa nenge hasho kutya Satana Ondiaboli oko e li nenge okwa zimina kutya oye ta nwetha mo uuyuni, oto vulu okulongitha omukalo gwokutompathana naye ngoka tagu adhika kohi yokapalanyolo “Oonkalo dhUuyuni Otadhi Gandja Eyamukulo” opo u tsikile noonkundathana. Ngele opu ulikwa ohokwe, yelitha mpoka Ondiaboli ya za, to longitha iitsa tayi adhika pepandja 3, nosho wo 4 lyokatraktate.
6 Okatraktate “Etegameno Lini kOonakusa Aaholike?” otashi vulika taka pendutha nziyanziya ohokwe. Otashi vulika u tameke oonkundathana nokupula:
◼ “Oto ti ngiini: Mbela oonakusa yetu aaholike onatu ke ya mone ishewe?” Konima sho omuntu a yamukula, ulika kokatendo okatiyali pepandja 4 lyokatraktate e to lesha Johannes 5:28, 29. Opo nduno yelitha kutya otashi kwathele okuuva ko “Eso, Naashono Hashi Ningwa po Uuna Tatu Si,” shoka shi li okapalanyolo okashona kotango mokatraktate. Ka kundathaneni pamwe.
7 Okatraktate “Hafela Onghalamwenyo yEumbo” otaka popi sha shoka shi holike komaukwanegumbo muuyuni auhe. Moku ka longitha, oto vulu okutya:
◼ “Otashi vulika to tsu kumwe kutya omaukwanegumbo nena otaga mono iihuna. Oto dhiladhila mbela kutya oshike tashi vulu okuningwa okukoleka omakwatathano muukwanegumbo?” Uuna omuntu a yamukula, ukitha eitulomo lye kiitsa yomokatendo kotango pepandja 6. Longitha gumwe gwomomishangwa dha tothwa mo pepandja 4 nosho wo 5 lyokatraktate, e to yelitha shoka tagu ti. Opo nduno tumbula kutya metsokumwe naashoka okatraktate taka popi, owa hala okuninga pamwe naye ekonakonombimbeli oshali lyopegumbo.
8 Okatraktate “Omolwashike Ngoye To Vulu Okwiinekela Ombimbeli” otaka vulu okulongithwa pamwe negandjo ndika:
◼ “Aantu oyendji oyu uva ehokololo lyaKain naAbel, ndyoka tali adhika membo lyotango lyOmbimbeli. Ehokololo lyomuGenesis otali popi wo omukiintu gwaKain. Owi ipula nale mbela kutya okwa za peni?” Longitha okatendo kahugunina pepandja 2 lyokatraktate okugandja eyamukulo. Yelitha kutya okatraktate otaka kundathana wo omatyokosha ga simana gOmbimbeli kombinga yaashoka tashi ka ningwa monakuyiwa yetu. Okutameka nokatendo okatitatu pepandja 5, tsikila noonkundathana, to longitha omishangwa ndhoka tadhi yambidhidha edhiladhilo ndyoka.
9 Okutaandeleka uutraktate wOmbimbeli oko omukalo ngoka gwa monika gu na oshizemo oshiwanawa okuuvitha onkundana ombwanawa. Molwashoka wo uushona nawa nosho wo uupu okuhumbatwa kehe pamwe mpoka to yi, oto vulu oku wu longitha nawa miilonga yoye yegumbo negumbo nosho wo ngele to gandja uunzapo wontukuluka. Uutraktate otau dhana onkandangala ya simana mokugwanitha uukalele wetu. Shilipaleka kutya owa humbata omaludhi gi ili nogi ili gawo noku wu longitha nawa okutameka oonkundathana.—Kol. 4:17.