Longitha uutraktate okutaandelitha onkundana ombwanawa
1. Uutraktate owa kala tawu longithwa ngiini koshigwana shaKalunga?
1 Oonzapo dhaJehova odha kala nokutaandelitha oonkundana ombwanawa okupitila muutraktate ethimbo ele. Mo 1880 C. T. Russell nooyakwawo oya li ya tameke okunyanyangidha okafo haki ithanwa Bible Students’ Tracts, noka li ka pewa aaleshi yo-Watch Tower ye ka gandje kaantu. Uutraktate owa li wa simana noonkondo, nomolwaashono mo 1884 sho C. T. Russell a nyolitha ehangano Zion’s Watch Tower Tract Society, lyokutaandelitha onkundana yUukwaniilwa, medhina ndyoka omwa li mwa kwatelwa oshitya “okatraktate.” Ehangano ndyoka ngashingeyi ohali ithanwa Watch Tower Bible and Tract Society of Pennsylvania. Momumvo 1918, Aakonakoni yOmbiimbeli oya thiki mo ya taandelitha uutraktate wu vulithe pomamiliyona 300. Uutraktate owu li natango oshilongitho hashi pondola mokuuvithila aantu.
2. Omolwashike uutraktate hawu pondola?
2 Omolwashike hawu pondola: Uutraktate owu na olwaala olwaanawa nohawu nana omuntu. Etumwalaka ehupi ndyoka lyi li muwo otali nana omuntu notali mu longo oshindji. Uuwanawa kaanegumbo mbono tashi vulika kaaye hole okulesha iifo nenge omambo. Oshipu oku wu gandja kaantu, nomuuvithi omupe nenge okanona ota vulu oku shi ninga. Oshikwawo, uushona nawa oku wu humbata.
3. Hokolola oshimoniwa shopaumwene nenge shi li miileshomwa yetu, okuulika kutya uutraktate ohawu pondola.
3 Oyendji ohaya ilongo oshili tango okupitila muutraktate. Pashiholelwa, omukulukadhi gumwe moHaiti okwa li a toola okatraktate mepandaanda, naasho e ka lesha okwa ti: “Nda mono oshili!” Konima yethimbo okwa ka ya kOshinyanga shUukwaniilwa e ta tameke okukonakona Ombiimbeli sigo a ninginithwa, ihe oshe etithwa owala kokulesha okatraktate.
4. Uuna uutraktate owo tawu gandjwa omwedhi gwontumba, mbela elalakano lyetu oli na okukala lyashike?
4 Okulonga egumbo negumbo: Molwaashoka uutraktate ohawu pondola mokugandja uunzapo, okutameka muNovomba otawu ka kala hawu gandjwa ethimbo nethimbo muukalele. Elalakano lyetu otali ka kala okutameka oonkundathana nomunegumbo tatu longitha uutraktate. Ngele omunegumbo oku ulike ohokwe petalelopo lyotango nenge peishunoko, otatu vulu oku mu ulukila nkene ekonakonombiimbeli hali ningwa membo Omalongo gOmbiimbeli nenge moshileshomwa shilwe shokukonakonwa. Ongiini tatu vulu okugandja uutraktate sho tatu longo egumbo negumbo? Molwaashoka uutraktate inawu ifa, otu na okukala tu shi nkene mboka tatu pe aantu wu na okugandjwa.
5. Ongiini tatu vulu okugandja uutraktate sho tatu longo egumbo negumbo?
5 Efalomo lyetu oli na okukala lya kankamena kokatraktate hoka tatu gandja notali opalele aantu yomoshitopolwa moka. Otatu vulu okupa omunegumbo okatraktate manga inaatu tameka oonkundathana. Omathano omawanawa gokombanda otashi vulika ga penduthe ohokwe muye. Nenge tu mu ulukile uutraktate wontumba e tatu mu pula a hogolole po hoka a hokwa. Uuna tatu longo miitopolwa moka aanegumbo itaaye tu ethele momagumbo gawo, otatu vulu okukala tu na okatraktate meke, opo omunegumbo a vule okumona oshipalanyolo shako, nenge tu mu lombwele kutya otu na okatraktate hoka twa hala okuuva kutya ota ti ngiini kombinga yako e tatu mu pula ngele otatu vulu oku ka pitithila kohi yomweelo. Ngele oshipalanyolo shako oshi li molupe lwepulo, otatu vulu oku mu pula kutya ota ti ngiini kombinga yalyo. Nenge tu mu pule epulo lyetu yene ndyoka tali ka pendutha ohokwe muye tu vule okukundathana naye. Otatu vulu oku mu leshela mokatraktate, tatu fudha po ngele twe ya pepulo, opo tu mu pe ompito yokuyamukula. Otatu vulu okulesha omanyolo ga simana mOmbiimbeli. Konima ngele twa mana oonkundathana dhetu, natu ninge elongekidho tu galuke. Ngele egongalo lyetu ohali thigi iileshomwa pomagumbo mpoka kaapu na omuntu, otatu vulu okuthiga okatraktate pehala mpoka itaaka vulu okumonika nuupu kuyalwe.
6. Uutraktate otawu vulu okulongithwa ngiini miilonga yepandaanda?
6 Okulonga iilonga yepandaanday: Mbela owa longitha ngaa nale uutraktate miilonga yepandaanda? Yamwe mbono taya ende putse ihaya vulu okupopya natse, molwaashoka oya endelela. Otashi vulika shi kale oshidhigu okumona ngele oye na ohokwe. Pehala lyoku ya pa oshifo shoka opo sha piti tse kaatu shi ngele otaye ke shi lesha tuu shili, omolwashike itaatu ya pe owala okatraktate? Molwaashoka okahupi nawa nomathano gokombanda ohaga nana aantu, otashi vulika ka penduthe ohokwe muyo e taye ka lesha ngele oya mono nando uumunute wontumba. Ihe ngele inaye endelela, otatu vulu okukundathana nayo uuyelele mboka wu li mokatraktate.
7. Hokolola iimoniwa yankene uutraktate tawu vulu okulongithwa uuna tatu gandja uunzapo wontukuluka.
7 Uunzapo wontukuluka: Oshipu okugandja uunzapo wontukuluka tatu longitha uutraktate. Omumwatate gumwe oha tula wumwe mondjato ngele ta zi mo megumbo. Ngele okwa adha omuntu, ngaashi omulandithi mositola, ohe mu pula owala ngele ota vulu oku mu pa sha shokulesha e te mu pe okatraktate. Sho aaihokani yamwe ya li tayi ilongekidha oku ka pashiyona ko-New York City, oya dhimbulula kutya otaya ka tsakanena naantu ya za kiilongo oyindji. Onkee ano, oya faalele okambo Nations nuutraktate owundji momalaka gi ili nogi ili. Nongele oyu uvu omuntu, ngoka ta landitha mepandaanda nenge a kuutumba popepi nayo mopaarka nenge morestolanda, ta popi elaka lyoshikwiilongo oya li ye mu pe okatraktate melaka lye.
8. Ongiini taku vulu okutiwa kutya uutraktate owa fa oombuto?
8 “Kuna oombuto dhoye”: Uutraktate otawu vulu okufaathanithwa noombuto. Omunepya oha kunu oombuto odhindji molwaashoka ke shi kutya odhini tadhi ka mena. Omuuvithi 11:6 ota ti: “Kuna oombuto dhoye ongula, ngoye ino vululukitha wo iikaha yoye komatango, oshoka ino tseya, oyini po tayi ka mena, oondjika nenge ndjiyaka, nenge adhihe mbali tadhi ka mena.” Onkee ano, natu longithe oshilongitho shika hashi tompola mokugandja uunzapo tu ‘kune uunongo.’ — Omayel. 15:7.
[Blurb on page 3]
Molwaashoka uutraktate ohawu pondola mokugandja uunzapo, okutameka muNovomba otawu ka kala hawu gandjwa ethimbo nethimbo muukalele