Uutraktate uupe wa longekidhwa momukalo tagu hokitha!
1. Iinima yini yuukalele ya longekidhwa momukalo omupe omuhokithi?
1 Uutraktate uupe wu li utano owa li wa piti mo-2013 pIigongi yIitopolwa yi na oshipalanyolo “Oohapu dhaKalunga odho oshili!” Okwa li kwa gwedhwa, hoka kOnkundana yUukwaniilwa onomola 38 ke na oshipalanyolo “Mbela oonakusa otaya ka yumuka ngaa ya kale nomwenyo?” Uutraktate awuhe mbuka uhamano owa longekidhwa momukalo omupe omuhokithi. Omolwashike uutraktate mboka wa ningwa momukalo ngoka omupe? Uuna tatu wu gandja megumbo negumbo, ongiini tatu vulu okulongitha nawa omukalo moka wa ningwa?
2. Elalakano lyomukalo omupe olyashike?
2 Omolwashike pu na omukalo omupe?: Efalomo tali pondola muukalele wegumbo negumbo olundji ohali kala lya kwatela mo oonkatu ndhika ne: (1) Pula omunegumbo epulo a popye etaloko lye, mu tameke oonkundathana. (2) Taleni omanyolo gontumba. (3) Pa omunegumbo oshileshomwa. (4) Mu pula epulo wu ye wu li yamukule oshikando tashi ya, e to ningi omalongekidho wu galuke. Omukalo omupe gwuutraktate ogwa longekidhwa gu tu kwathele nuupu tu landule omikalo adhihe ne.
3. Ongiini tatu vulu okugandja kamwe komuutraktate uupe muukalele?
3 Nkene tu na oku wu longitha: (1) Ngele wa popitha omunegumbo, mu ulukila omapulo gokuhogololwa ngoka ge li kokatraktate, ngoye to mu pula a popye etaloko lye. (2) Pandja okatraktate ne tamu tala okapalanyolo “Shoka Ombiimbeli tayi ti.” Lesha omanyolo mOmbiimbeli mpoka onkalo tayi shi pitike. Ngele omunegumbo oku na ethimbo, kundathana okapalanyolo “Uuwanawa mboka to vulu oku ka mona uuna wi itaala meyumuko.” (3) Gandja okatraktate, ngoye to mu ladhipike a leshe shoka sha hupa ko. (4) Manga inoo ya, mu ulukila epulo ndyoka li li konima kohi yokapalanyolo hoka taka ti “Shoka Ombiimbeli tayi ti” ngoye to ningi omalongekidho wu kundathane naye omayamukulo gOmbiimbeli oshikando tashi landula.
4. Ongiini tatu vulu okulongitha uutraktate uupe peishunoko?
4 Okuninga eishunoko okupu wo. Longitha omanyolo ngoka ge etwa mo inaaga tothwa mo ngoka ge li konima yokatraktate wu yamukule epulo ndyoka wa li wa pula petalelopo lyoye lyahugunina. Manga inoo ya, mu ulukila ethano lyokabroshure Onkundana Ombwanawa, ulukila omunegumbo okabroshure nosho wo oshileshwa shoka shi na uuyelele wa gwedhwa po kombinga yoshikundathanwa, ngoye to mu pe okabroshure. Ngele okwe ka taamba, ninga omalongekidho mu ka kundathane petalelopo lyoye tali landula. Ngawo owa tameka ekonakonombiimbeli! Nenge pehala lyokugandja okabroshure, oto vulu okugandja okatraktate kalwe ngoye to ningi elongekidho wu galuke mu ye mu ka kundathane nomunegumbo.
5. Uutrakatate wetu owu na ongushu yashike muukalele wetu?
5 Uutraktate owa kala nokulongithwa muukalele wetu muule woomvula dhi vulithe pe-130. Nonando kawu thike pamwe nowa yoolokathana, owa kala wu li iilongitho tayi pondola. Natu longitheni ano nawa omukalo nguka omupe tu tsikile okutaandeleka ontseyo yOmbiimbeli kombanda yevi alihe. — Omayel. 15:7a.