“Tandi uvu ko ngiini, ngele kwaa na ngoka ta tula ndje mondjila?”

¹ Sho omuuvithi gwevaangeli Filippus a pula elenga lyokuEtiopia ngele oli uvite ko tuu shono tali lesha mOohapu dhaKalunga, omulumentu okwa yamukula a ti: “Tandi uvu ko ngiini, ngele kwaa na ngoka ta tula ndje mondjila?” Filippus okwe mu kwathele nenyanyu u uve ko nawa onkundana ombwanawa kombinga yaJesus, shoka sha ningitha omulumentu i ininginithe nziya. (Iil. 8:26-38) Filippus okwa li a vulika kelombwelo lyaKristus ‘okuninga aantu ayehe aalongwa, noku ya ninginitha noku ya longa.’ — Mat. 28:19, 20, yelekanitha NW.

² Otu na okuvulika kelombwelo okuninga aantu aalongwa, ngaashi naanaa Filippus a ningi. Ihe ehumokomeho lyomeendelelo lyopambepo ndjoka elenga lyokuEtiopia lya ningi ihali monika mo olundji mokati kaantu mboka hatu konakona nayo Ombimbeli. Omulumentu ngoka, omuuyimo mUujuda a pyokoka nawa mOmanyolo, okwa li e na omutima gu na ehalo nokwa li owala a pumbwa okuzimina kutya Jesus oye Messias omuuvanekwa. Oshi li eshongo ngele mboka hatu konakona nayo kaye shi Ombimbeli, oya li ya pukithwa komalongo giifundja gopalongelokalunga, nenge oya li ya gwilililwa po komaupyakadhi omadhigu gopaumwene. Oshike mbela tashi ke tu kwatha tu shi pondole mokutula omukonakonimbimbeli mondjila opo i igandje noku ninginithwe?

³ Mona oompumbwe dhopambepo dhomukonakonimbimbeli: Okagwedhwamo mUukalele Wetu wUukwaniilwa (mOshiingilisa) waAuguste 1998 oka kundathana kutya uule wethimbo li thike peni tashi vulika tu konakone naantu, tatu longitha okabroshure Ota Pula nosho wo embo Ontseyo. Oka gandja elombwelo ndika: “Osha pumbiwa opo okweendelela kwekonakono ku kale kwi ikolelela koonkalo dhomukonakoni nosho wo kokuvula kwe okwiilonga sha. . . . Inatu hala okweendelela unene opo omukonakoni a kale kee uvite ko. Omukonakoni kehe okwa pumbwa ekankameno lya kola lyeitaalo lye ndyoka opo a mono mOohapu dhaKalunga.” Onkee ano oshi li pandunge opo uuyelele mboka u li membo Ontseyo kaatu wu konakone tatu matuka nedhiladhilo lyokukambadhala tu mane ko embo moomwedhi hamano. Otashi vulika shi pule oomwedhi dhi vulithe puhamano okukwathela oohandimwe yontumba ya hume komeho sigo oponkatu yokuninginithwa. Uuna to ningi ekonakono oshiwike noshiwike, longitha ethimbo ndyoka lya pumbiwa kutya nduno oli thike peni okukwathela omukonakoni u uve ko noku taambe ko shoka ti ilongo mOohapu dhaKalunga. Poompito dhimwe otashi vulika ku kale kwa pumbiwa iiwike iyali nenge itatu okumana ko ontopolwa yimwe ayike membo Ontseyo. Shika otashi ka gandja ethimbo okulesha nokuyelitha omanyolo ogendji ngoka ga gandjwa. — Rom. 12:2.

⁴ Ihe ongiini ngele mwa mana embo Ontseyo, e to mono kutya omukonakoni ke uvite ko nawa natango oshili nenge kutya natango ini inyengithwa naanaa okupopila oshili nokuyapulila onkalamwenyo ye Kalunga? (1 Kor. 14:20) Oshike mbela to vulu okuninga natango oku mu tula mondjila tayi fala komwenyo? — Mat. 7:14.

⁵ Palutha oompumbwe dhopambepo dhomukonakonimbimbeli: Ngele osha yela kutya omuntu ngoka ota ningi ehumokomeho, nonando ote ende kashona, nokwa pandula shoka ti ilongo, tsikila nduno nekonakonombimbeli membo etiyali konima sho mwa mana okabroshure Ota Pula nosho wo embo Ontseyo. Shika otashi vulika shi kale inaashi pumbiwa pompito kehe, ihe uuna sha pumbiwa, tsikila nekonakono membo Ngoye Oto Vulu, embo True Peace, embo United in Worship, nenge embo God’s Word. Aauvithi oyendji oye na ookopi dhopaumwene dhomambo ngaka gokulongitha ngele egongalo kali ga na we. Embo God’s Word olyo alike tali vulu okumbestelwa okuza kEhangano. Pompito kehe, okabroshure Ota Pula nosho wo embo Ontseyo oyo tayi ka konakonwa tango. Ekonakonombimbeli, omaishunoko nosho wo ethimbo ndyoka lya longithwa okutsikila nekonakono oyi na okuyalulwa nokulapotwa, nokuli nando omukonakoni okwa ninginithwa manga inaamu mana embo etiyali.

⁶ Shika mbela otashi ti mboka opo ya ninginithwa ihe oya konakona owala embo limwe alike ngashingeyi oye na okupewa ekwatho lya pepalekululwa okukonakona embo etiyali? Inashi pumbiwa oshikando kehe. Ihe otashi vulika ya kale ihaaya longo sha we nenge tashi vulika itaaya humu komeho moshili notashi vulika taya dhiladhila kutya oya pumbwa ekwatho lyopaumwene okulongitha unene oshili monkalamwenyo yawo. Omutonateli gwiilonga oku na okupulwa manga ekonakono inaali tamekulululwa nomuuvithi a ninginithwa. Ihe ngele ou shi yamwe mboka ya konakona nale embo Ontseyo ihe inaya ninga nando ehumokomeho okwiigandja nokuninginithwa, otashi vulika wa hala okuya ko kuyo u tale ngele oya hala okutamekulula ekonakonombibeli lyawo.

⁷ Oshi li endhindhiliko lyohole yopaKriste okugandja eitulomo lyopaumwene nolya mana mo komuntu kehe e na ohokwe ngoka hatu konakona naye. Elalakano lyetu olyo okukwathela omukonakoni a mone omayele ogendji goshili yOohapu dhaKalunga. Opo nduno ota vulu okukala a kola e li kombinga yoshili, note ke shi ninga shi ikolelela kontseyo, nota ka yapulila onkalamwenyo ye Jehova, te shi ulike mokwiininginitha momeya. — Eps. 40:9; Ef. 3:17-19.

⁸ Oto dhimbulukwa mbela shoka sha ningwa po konima sho elenga lyokuEtiopia lya ninginithwa? ‘Olya yi nondjila yalyo lya nyanyukwa’ li li omulongwa omupe gwaJesus Kristus. (Iil. 8:39, 40) Tse naamboka tatu tula mondjila yoshili natu mone enyanyu mokulongela Jehova — ngashingeyi nosigo aluhe!