Kwathela aantu ya kokeke ohokwe ya penduthwa kOnkundana yUukwaniilwa Onomola 36
1 Owa mana mbela okutaandeleka Onkundana yUukwaniilwa Onomola 36 ndjoka wa pelwe? Otayi pula epulo li li pethimbo okudhiladhilwa kwaayehe: “Eyuvimumvo epe—Oli ku nine onakuyiwa ya tya ngiini?” Sho omumvo 2000 gwa thiki, opwa li pu na omategameno ga yoolokathana unene shi na ko nasha naashoka eyuvimumvo epe tali ke eta. Onkundana yUukwaniilwa Onomola 36 otayi tala kugamwe gomomategameno ngoka notayi tu dhimbulukitha kutya oonkalo dhuuyuni itadhi gandja etompelo lyokukala nomukumo. Eyuvimumvo awike ndyoka tali ke eta ombili negameno ndyoka aantu oyendji taya kongo olyo Elelo lyEyuvimumvo lyaKristus Jesus. Einekelo lyetu muushili wUukwaniilwa we olye tu inyengitha tu taandeleke Onkundana yUukwaniilwa Onomola 36 kukehe gumwe ngaashi tatu vulu.
2 Okwiinyenga kwaantu kOnkundana yUukwaniilwa: Omataandeleko ga tetekele gOnkundana yUukwaniilwa oga kala ge li oshipenduthi oshiwanawa kutse miilonga yetu. Shi na ko nasha nOnkundana yUukwaniilwa Onomola 35, oshitayimbelewa shaKanada osha nyola: “Oshikonga shika shi ikalekelwa osha li sha yambidhidhwa nuulaadhi kaauvithi nosho wo kaakokolindjila momapya, notwa li twa nyanyukilwa iimoniwa oyindji tayi ladhipike.” Osha yela kutya ngoye owu ulika uulaadhi wa fa mboka mokutaandeleka Onkundana yUukwaniilwa Onomola 36.
3 Oshikonga shomasiku ngano shOnkundana yUukwaniilwa osha thanekwa shi hule mo 17 Novomba 2000. Mbela iitopolwa ayihe mbyoka ya pewa egongalo lyeni oya pwa ko? Ngele hasho, aakuluntugongalo otaya vulu ye mu pule mu tsikile noshikonga sigo okehulilo lyaNovomba.
4 Einyengo ketaandeleko lyOnkundana yUukwaniilwa Onomola 36 pune oli li ngiini sigo oompano? Aantu aashona taye ku udhitha okafoloma taya pula okabroshure Ota Pula nenge ekonakonombimbeli lyopegumbo. Ihe oyendji yomwaamboka tayu ulike ohokwe petameko moshipalanyole sheyovimumvo otashi vulika itaaya ka katuka onkatu manga gumwe gwomOonzapo dhaJehova inee ya galukila. Ayehe mboka yu ulika ohokwe oye na okutalelwa po ishewe. Ethimbo lini mbela ewanawa oku shi ninga? Okwiishuna ko oku na okuningwa nziya ngaashi tashi vulika.
5 Ndhindhilika iimoniwa mbika ya monika momaishunoko gokugandja Onkundana yUukwaniilwa Onomola 35. Omukokolindjila muIreland okwa thigile mwene gworestolanda Onkundana yUukwaniilwa. Omukiintu okwa li a kuminwa etumwalaka nokwa lombwele omumwameme e mu galukile. Omumwameme okwa galuka konima yomasiku gaali nekonakonombimbeli olya tameke. MuDenmark, Onkundana yUukwaniilwa oya li ya thigwa megumbo limwe moka kaamwa li mu na omuntu. Esiku olyo tuu ndyoka omukiintu gwamo okwa tumine ofoloma koshitayimbelewa, shoka she yi tumine kegongalo lyopuyo. Manga oshiwike inaashi pwa ko, aamwameme yaali oye ya, oya li ya ningi elongekidho lyekonakono, nomukiintu okwa li a kala oshikando shotango pokugongala pOshinyanga shUukwaniilwa!
6 Shoka to ka tya ngele to shuna ko: Okuninga omaishunoko konima yokugandja Onkundana yUukwaniilwa oshipu noonkondo noshi li oshitopolwa shinyanyudha shuukalele wetu. Uuna tatu shi ningi, otatu kumagidhwa tu kale nokafo kOnkundana yUukwaniilwa Onomola 36, oshoka ohashi vulika omunegumbo ke kee ka na. Oto vulu okuyelekela omaetopo ngaka.
7 Konima yokudhimbulukitha omunegumbo kutya ongoye lye, oto vulu okutya:
◼ “Onde ku thigilile okafo ke na oshipalanyolo: ‘Eyuvimumvo epe—Oli ku nine onakuyiwa ya tya ngiini?’ Osha li mbela shiladhipika okulesha kutya masiku Elelo lyEyuvimumvo lyaKristus Jesus otali ka tameka nokweeta oonkalo dhOparadisa kombanda yevi? [Ulika omathano gOparadisa mOnkundana yUukwaniilwa Onomola 36.] Kefo lyokonima, oto vulu okuninga eindilo u mone okabroshure Kalunga Ota Pula Shike kuTse?” Ulika okabroshure, yanuna poshileshwa 5, lesha epulo lyotango nosho wo okatendo 1 no 2, e to pula omunegumbo a tye ko sha. Lesha e to kundathana omushangwa gumwe nenge mbali. Ngele tashi wapa, lesha epulo ekwawo nosho wo okatendo, opo nduno ninga elongekidho u galuke mu tsikile noonkundathana.
8 Molwashoka muNovomba otatu ka landulitha ko okugandja okabroshure “Ota Pula” nenge embo “Ontseyo,” otashi vulika u tye:
◼ “Sho nde ku talelele po omasiku ngano, onde ku thigilile okafo ‘Eyuvimumvo epe — Oli ku nine onakuyiwa ya tya ngiini?’ Muko oto vulu okuninga eindilo lyekonakono lyOmbimbeli lyoshali pegumbo. Onda galuka ndi ku ulukile shoka hatu longitha mokukonakona Ombimbeli. [Ulika okabroshure Ota Pula, e to yanuna kefo lyokonima; nenge ulika embo Ontseyo, e to yanuna pepandja 188-189.] Eyuvimumvo ndyoka lya popiwa mOmbimbeli otali ke eta oonkalo dha fa ndhoka u wete methano ndika. Opo tu kale twa gwana okukala mOparadisa, otwa pumbwa okumona ontseyo yashili yokutseya Kalunga. Pitika ndje ndi ku ulukile paufupi nkene hatu konakona Ombimbeli.”
9 Etaandeleko lyOnkundana yUukwaniilwa Onomola 36 olye tu inyengitha tu koleke okukutha ombinga kwetu muukalele, tatu gandja uunzapo uuwanawa noonkondo. Otashi vulika shika osho sha pendutha ohokwe yoohandimwe oyendji moshitopolwa. Kekwatho lyaJehova, oonkambadhala dhetu dha hanganithwa dhokuhumitha komeho ohokwe ndjika, otadhi ke tu etela oshizemo shokukala twa nyanyukwa mokukonga oyendji mboka ya fa oonzi. — Mat. 10:11; Iil. 13:48, 49, 52.