Kala omuwanifi omunelao
1 Jesus okwa ti kutya pefimbo lokukala po kwaye, vahapu ‘itave shi koneke,’ ongaashi ashike pomafiku aNoa. (Mat. 24:37-39, yelekanifa NW.) Onghee hano, osha teelelwa kutya oohandimwe vahapu itava ka kala nokupwilikina konghundana iwa yOuhamba. Oshike tashi dulu oku tu kwafela tu kaleke po omhepo yehafo eshi hatu wanifa po oukalele wetu?—Eps. 100:2.
2 Shotete, otwa pumbwa okukaleka momadiladilo kutya etumwalaka letu nosho yo oshilonga shetu shokuudifa oya dja kuKalunga. Ovo itava tambula etumwalaka letu, nonande twa ninga keshe osho hatu dulu, ova ekelashi lela Jehova. Okudimbuluka kutya oudiinini wetu mokuudifa otau hokiwa kuye, otaku tu kwafele tu kanyatele ehafo letu nosho yo elao lokomutima tu li ovawanifi veendjovo daKalunga.—Jak. 1:25.
3 Oshitivali, ope na natango oohandimwe ovo tava ka tambula ko onghedi yaJehova yexupifo. Nonande vahapu otashi dulika ve he na ko nasha, ope na natango ovo va fa eedi va pumbwa okwoongelwa nokuli paife eshi exulilo li li popepi nokufika. Otwa pumbwa okutwikila okuudifa, okuya ‘moshilando keshe ile momukunda’ tu ‘konge oo a wana.’—Mat. 10:11-13, yelekanifa NW.
4 Kala u na oikala iwa: Ehokololo linyikifa oluhodi lomalongelokalunga oipupulu ola nyemateka vamwe. Vamwe ove li ‘va hepekwa nova loloka’ omolwonghalelo ei yoinima. (Mat. 9:36) Vahapu otashi dulika va wililwa po koku he na oilonga, oku he na efiloshisho loukolele nosho yo oku he na eameno. Okuuda ko eshi otashi tu kwafele tu diinine oilonga yetu. Kendabala okutamekifa eenghundafana odo tadi popi oshinima osho tashi lipulwa unene kovanhu moshitukulwa shetu. Va kwafela va mone kutya Ouhamba waKalunga oo auke u li ekandulepo. Longifa Omishangwa nosho yo oitwa yokondadalunde oyo i li moishangomwa u hange omitima davo nonghundana iwa.—Heb. 4:12.
5 Ovawanifi veendjovo daKalunga ovanelao alushe ohava dimbuluka kutya “ehafo mOmwene olo eenghono [detu].” (Neh. 8:10) Kape na etomheno lasha kufye okukanifa ehafo letu. “Eumbo olo ngenge la wana, ombili yeni nai kale mo; ndele ngenge inali wana, ombili yeni nai shune kunye.” (Mat. 10:13) Jehova ota pepalekulula ehafo letu neenghono detu fimbo hatu lididimike moilonga yaye iyapuki, nota nangeke noupuna oudiinini wetu.