Omanangeko noupuna taa di mokuulika olupandu omolwohole yaJehova—Oshitukulwa 2
1 Moshitukulwa shomwedi wa pita kombinga yoshipalanyole eshi, otwa divilikile eenghedi nhee omo olupandu letu omolwohole yaJehova tali dulu okuulikwa moukalele. (1 Joh. 4:9-11) Apa ohatu ka weda ko eenghedi dimwe nhano doku shi ninga. Ngeenge hatu kufa ombinga iyadi mokukwafela vamwe pamhepo, ohatu nangekwa noupuna.
2 Okuyandja oundombwedi wohangelela: Ei oyo onghedi i na omupondo okumona ovanhu ovo va fya ondjala nenota louyuki noku va pa oileshomwa tai va kwafele. Oshiwa ‘okulongifa nawa efimbo’ nokuyandja oundombwedi peemhito keshe nosho yo kwaaveshe ovo hatu shakeneke. (Ef. 5:16) Otashi dulika sha pumbiwa tu kale tu na ouladi tu yandje oundombwedi monghedi ei, ndelenee ngeenge otu udite ko ohole yaKalunga nosho yo eemhumbwe dovanhu, ohatu ka yandja oundombwedi pomhito keshe.—2 Tim. 1:7, 8.
3 Omutumwa umwe okwa li a nangekwa noupuna munene mokutameka eenghundafana nomweendi pamwe naye motekisa. Omulumenhu okwa ulika ohokwe. Omalishuneko okwa li a ningwa nosho yo ekonakonombibeli ola li la tamekwa. Omulumenhu oo okwe uya moshili nokwa xuma komesho fiyo oposhitwa shokuninga omukulunhuongalo.
4 Okushanga eembapila: Otashi dulika itatu dulu okuya eumbo neumbo omolwomaudu onhumba opalutu ile molwaashi taku lokwa. Ohatu dulu okushanga eembapila, hatu yandje oundombwedi muxupi okupitila mopoosa koohandimwe ovo tu shii, kwaavo va filwa ovaholike vavo ile ovo va li ve he mo meumbo eshi twa longa moshitukulwa. Ohatu dulu okupatela mo kamwe komoutraktate vetu ovo ve na etumwalaka liwa le likolelela kOmbibeli nokuladipika oo twa shangela a alule ngeenge oku na omapulo. Longifa ondjukifi yoye yopaumwene ile ei yOlupale lOuhamba; ashike ino longifa ondjukifi yoshitaimbelewa.
5 Okuyandja oundombwedi mongodi: Ei oyo onghedi iwa okuhanga ovanhu ovo itatu dulu okushakeneka moilonga yeumbo neumbo. Ngeenge ohatu shi ningi neendunge, nolune, neyavalo nosho yo noukeka, ohatu dulu okumona omalinyengo mawa. Okafo Uukalele Wetu wUukwaniilwa kaFebruali 2001 (kOshiingilisha), epandja 5-6, oka yandja omaetepo taa longo anghee hatu mono oidjemo iwa.
6 Eshi omumwameme a li ta yandje oundombwedi mongodi, okwa pula omukainhu ngeenge okwa diladila tuu shihapu kwaasho onakwiiwa i mu nine nosho yo oukwaneumbo waye. Omukainhu okwa ti kutya okwe shi ninga. Eshi okwe shi holola molwaashi okwa li ha kala e he na eteelelo, nokwa li ha kala ashike e likalela meumbo laye. Molwokulinyengifwa kolukeno lashili lomumwameme, omukainhu okwa dimina oku mu shakeneka pomalandifilo e li popepi. Oshidjemo, omukainhu okwa tambula ko ekonakonombibeli nehalo liwa.
7 Okutambula ko ovaendanandjila: Ngeenge otu hole ovanhu vakwetu, ohatu ka kala oupafi okudidilika omweendanandjila keshe oo te uya konhele yetu yokwoongala noku mu tambula ko. (Rom. 15:7) Na mone kutya oku li mokati kovanhu ovo ve na ohokwe yashili nonghalonawa yaye yopamhepo. Ngeenge oku wete tu na shili olukeno naye nohatu mu pe ekonakonombibeli lopaumwene, otashi dulu oku mu linyengifa a tambule ko ekwafo letu.
8 Elihumbato letu liwa: Okulihumbata kwetu kuwa otaku wapeke oshili. (Tit. 2:10) Ngeenge ovo ve li mounyuni tava popi oinima iwa kombinga yetu tu li Eendombwedi daJehova, otava fimaneke Kalunga ketu. (1 Pet. 2:12) Eshi otashi dulu yo okukwafela vamwe va tameke okweenda mondjila oyo tai twala komwenyo.
9 Omolwashike itatu endulula eenghedi edi nhano tu ulike olupandu letu omolwohole inene yaJehova oyo e tu hole nayo nosho yo oku di tula moilonga? (1 Joh. 4:16) Ngeenge oto shi ningi, oto ka teya omanangeko noupuna mahapu.