Omanangeko noupuna taa di mokuulika olupandu molwohole yaJehova—Oshitukulwa shotete
1 Omuyapostoli Johannes okwa shanga ta ti: “Ofye otu mu hole osheshi [Jehova] a kala e tu hole tete.” (1 Johannes 4:19) Ngeenge hatu diladila kombinga yoinima aishe oyo Jehova e tu pa, ohatu linyengifwa tu ulike olupandu letu linene. Jesus okwa tula po oshihopaenenwa shokuulika olupandu mokuudifa kombinga yedina laKalunga nOuhamba waye. (Johannes 14:31) Oshiwa okutala keenghedi dimwe omo hatu dulu okuulika olupandu letu molwohole yaJehova nokomanangeko noupuna oo e li oshidjemo.
2 Okuya eumbo neumbo: Jesus okwa honga ovahongwa vaye nghee ve na okuwanifa po oshilonga sheudifo lOuhamba. Omalombwelo aye otaa ulike sha yela kutya okwa li va ya eumbo neumbo, tava tandavelifa onghundana iwa. (Lukas 9:1-6; 10:1-7) Otashi pula ohole yokuhola Kalunga nosho yo ovanhu vakwetu okukala ho i eumbo neumbo ngeenge twa taalelwa kokuhenakonasha nokepataneko. Ndelenee moku shi ninga, ohatu mono omauwa pauhandimwe molwaashi eitavelo letu otali pamekwa neteelelo letu otali kala la twa unene.
3 Molwokulonga tu li mewiliko lovaengeli, otwa mona vahapu ovo tava fi kondjala nokenota loshili. (Eh 14:6, yelekanifa NW.) Ovakwaneumbo ohava ti kutya ova kala tava ilikana va mone ekwafo ngeenge Ondombwedi ye uya pomaumbo avo. Eendombwedi mbali nokaana kanini okwa li tadi longo eumbo neumbo konhunhu yaKaribia. Eshi ovakulunhu va tokola kutya otava xulifa okulonga kwefiku olo, okaana oke va pita komesho ndele taka i keumbo la shikula ko ndele taka konghola. Omukainhu omunyasha okwa yeulula omuvelo. Eshi ovakulunhu ve shi mona, ova ya ko ndele tava popi naye. Omukainhu okwe va ifana meumbo nokuhokolola kutya okwa kala ta ilikana kuKalunga opo a tume Eendombwedi di uye di mu honge Ombibeli.
4 Okuyandja oundombwedi momapandavanda: Molwaashi oshidjuu unene meenhele dimwe okuhanga ovanhu momaumbo, okuyandja oundombwedi momapandavanda oyo onghedi tai pondola mokuyandja oundombwedi kovanhu. Natango ovanhu vahapu ohava kala momidingonoko omo omivelo deehofa hadi kala da patwa ile momatungo e na eameno la kwata moiti noitashi shiiva okulonga mo eumbo neumbo. Ndele nande ongaho, olupandu letu molwohole yaJehova ohali tu linyengifa tu longife keshe onghedi tai longo opo tu fike kovanhu netumwalaka lOuhamba, mwa kwatelwa okuyandja oundombwedi momapandavanda.—Omayel. 1:20, 21.
5 Okuninga omalishuneko: Molwaashi ohatu kongo ovo “va shiiva omhumbwe yavo yopamhepo,” otwa hala okuninga osho hatu dulu opo tu wanife po omhumbwe oyo. (Mat. 5:3, NW.) Eshi otashi pula okushuna ko opo tu ka tekele eembuto doshili odo twa kuna. (1 Kor. 3:6-8) Omumwameme umwe muAustralia okwa yandja okatraktate komukainhu oo a li a fa ita ulike ohokwe unene. Ndele nande ongaho, omumwameme okwa kendabala noudiinini opo a mone eumbo lomukainhu oo natango. Xuuninwa eshi omumwameme a mona omukainhu oo, okwe shi mona mo kutya omukainhu oo okwa landa Ombibeli yondilo konima yetalelepo lotete. Omumwameme okwa hovela okukonakona naye.
6 Okuninga omakonakonombibeli navamwe: Eshi otashi dulu okukala oshitukulwa shoukalele wetu osho tashi eta ehafo linene noshi na ondjambi. Ka shi fi tuu enangeko noupuna okukwafela ovanhu ve lihonge kombinga yaJehova, oku va mona tava ningi omalunduluko mokukalamwenyo kwavo opo va hafife Jehova nosho yo okumona eshi tava ninginifwa monghedi yopaKriste okuulika okuliyapulila kwavo Kalunga!—1 Tes. 2:20; 3 Joh. 4.
7 Mokafo taka landula, ohatu ka konakona natango eenghedi dihapu omo twa nangekwa noupuna eshi hatu ulike olupandu molwohole yaJehova.