Okugandja uunzapo tu li ongundu ohaku nyanyudha
1 Sho Jesus a tumu aalongwa 70 ye ku uvithe, okwa li e ya longo shoka ye na oku ka tya, e ya topola muungundu wooyaali, nokwa li e ya lombwele kutya oshitopolwa shini taya ka longa. Shika osha li she ya nyanyudha noonkondo. (Luk. 10:1-17) Osha faathana nena, okugandja uunzapo tu li ongundu ohaku kwathele okulongekidha, okuunganeka nokuladhipika oshigwana shaKalunga omolwiilonga yeuvitho.
2 Aakuluntugongalo ohaya kwatele komeho: Aakuluntugongalo otaya dhana onkandangala ya simana mokukwathela ayehe ya kale haya kutha aluhe ombinga miilonga yokuuvitha. Omutonateli gwiilonga oha kwatele komeho mokuninga omalongekidho giilonga mokati koshiwike. Omutonateli kehe gwekonakono lyembo oku na oshinakugwanithwa okuunganeka iilonga yongundu yawo, unene tuu mehuliloshiwike. Iikando yimwe ngele egongalo alihe tali tsakanene omolwiilonga yomomapya, ngaashi konima yEkonakono lyOshungonangelo, omutonateli kehe gwekonakono lyembo oku na okusila oshimpwiyu oompumbwe dhongundu yawo.
3 ‘Komukalo omwaanawa, nokelandulathano’: Ngoka a tulwa po okukwatela komeho okugongala kwiilonga yomomapya oku na okutameka pethimbo nokugongala hoka oku na okuningwa owala uule wominute 10 nenge 15. Oshi li nawa a topole aantu moongundu noku ya pa oshitopolwa (okuninga aatonateli yekonakono lyembo oyo taya ningi elongekidho ndika, ngaashi sha tumbulwa nale) manga inaaya hulitha negalikano. Shika otashi shonopeke ompumbwe yokugongaleka aauvithi moshitopolwa, shoka tashi vulu okudhinitha iilonga yetu yi kale inaayi simana. Otashi tsu wo kumwe nomayele gaPaulus taga ti: “Ayihe nayi ningwe komukalo omwaanawa, [nokelandulathano].” (1 Kor. 14:40, yelekanitha NW.) Ayehe mboka taya kala pokugongala huka oye na okuyambidhidha elongekidho ndika opo li ende nawa mokuthika pethimbo, okulongela kumwe thiluthilu naangoka te li kwatele komeho, nokuza po nziya okuya koshitopolwa uuna ongundu ya halakana.
4 Twa hedhithwa kumwe muukumwe: Omalongekidho gokulonga moongundu dhokugandja uunzapo otage tu pe ompito ombwanawa okutseyathana megongalo. Nonando inashi indikwa nando okuninga elongekidho komeho yethimbo kutya oto ka longa nalye, otashi vulu shi kale wo shi na ondjambi kutse okukala pokugongala kwiilonga yomomapya inaatu ninga nale elongekidho. Otashi vulika tu pewe okulonga pamwe naangoka kaatu shi nawa, nokungeyi otashi tu vulitha ‘okumbwalangandja’ mohole yetu yokuholathana. — 2 Kor. 6:11-13.
5 Okugandja uunzapo tu li ongundu otaku tu ladhipike notaku tu hilile kumwe tu li “aalongi pamwe moshili.” (3 Joh. 8, NW) Natu kuthe ano ombinga yu udha muko!