Nkene wu na okugandja embo Omalongo gOmbiimbeli

Okagwedhwa haka oke na omaetopo gi ili nogi ili nkene tu na okugandja embo Omalongo gOmbiimbeli. Opo wu shi endithe nawa, longitha oohapu dhoye mwene noku dhi lundulula shi ikolelela kaantu moshitopolwa e to kala wu shi nawa shoka shi li membo. Oto vulu wo okupopya kombinga yiinima yilwe mbyoka ye eleka moshitopolwa sheni. — Tala Uukalele Wetu wUukwaniilwa wOshiingilisa waJanuali 2005, epandja 8.

Armagedon

◼ “Ngele aantu tayu uvu oshitya ‘Armagedon’ oyendji ohaya dhiladhila ehanagulo enenenene. Mbela ngoye oto ti Armagedon oshike? [Tegelela a yamukule. Opo nduno lesha Ehololo 16:14, 16.] Tala nkene onkalamwenyo tayi ka kala konima yaArmagedon.” Yanuna pepandja 82-84 e to lesha okatendo 21.

Egalikano

◼ “Mbela owi ipula ngaa nale nkene Kalunga ha yamukula omagalikano? [Tegelela a yamukule. Lesha 1 Johannes 5:14, 15 nokatendo 16-18 pepandja 170-172.] Ontopolwa ndjika otayi yelitha kutya omolwashike tu na okugalikana kuKalunga noshike tu na okuninga opo omagalikano getu gu uvike.”

Elongelokalunga

◼ “Aantu oyendji oya tala ko omalongelokalunga kutya ogo tage etitha omaupyakadhi gaantu pehala lyoku ga kandula po. Mbela sho to tala omalongelokalunga ogu ukitha ngaa aantu mondjila yi li nawa? [Tegelela a yamukule. Lesha Mateus 7:13, 14 nokatendo 5 pepandja 146.] Ontopolwa ndjika otayi popi iinima ihamano mbyoka tayi ndhindhilikitha elongelokalunga ndyoka Kalunga a hokwa.” Mu ulukila omusholondondo pepandja 147.

Eso neyumuko

◼ “Aantu oyendji otayi ipula kutya oshike naanaa hashi ningwa peso. Mbela oto dhiladhila kutya tse otatu vulu ngaa oku shi tseya? [Tegelela a yamukule. Lesha Omuuvithi 9:5 nokatendo 5-6 pepandja 58-59.] Embo ndika otali yelitha shoka euvaneko lyOmbiimbeli kombinga yeyumuko tali ka tya kwaamboka ya sa.” Mu ulukila efano pepandja 75.

◼ “Oshi li paunshitwe okukala wa hala okumona natango omuholike gwoye ngoka a sa. Hasho mbela? [Tegelela a yamukule.] Oyendji oya hekelekwa kOohapu dhOmbiimbeli tadhi popi eyumuko. [Lesha Johannes 5:28, 29 nokatendo 16-17 pepandja 72.] Ontopolwa ndjika otayi yamukula wo omapulo ngaka.” Mu ulukila omapulo gatatu gopetameko pepandja 66.

Iiponga nokumona iihuna

◼ “Uuna pwa holoka oshiponga, oyendji ohaya pula ngele Kalunga oku na ko nasha naantu shili nongele oku ya wete sho taya mono iihuna. Mbela nangoye osho wu wete ngawo? [Tegelela a yamukule. Lesha 1 Petrus 5:7 nokatendo 11 pepandja 11-12.] Embo ndika otali yelitha nkene Kalunga ta ka hulitha po okumona iihuna thiluthilu.” Mu ulukila omapulo gatatu gopetameko pepandja 106.

Iita nombili

◼ “Aantu muuyuni auhe oya hala ombili. Mbela sho to tala, etegameno lyokukala nombili kombanda yevi oli li owala ondjodhi? [Tegelela a yamukule. Lesha Episalomi 46:8, 9.] Embo ndika otali kundathana nkene Kalunga ta ka gwanitha po elalakano lye nokweeta ombili kombanda yevi alihe.” Mu ulukila efano pepandja 35 e to tala omadhiladhilo mokatendo 17-21 pepandja 34-36.

Jehova Kalunga

◼ “Aantu oyendji mboka yi itaala muKalunga oya hala okukala popepi naye. Mbela owe shi tseya ngaa kutya Ombiimbeli otayi ti kutya natu hedhe popepi naye? [Tegelela a yamukule. Lesha Jakob 4:8a nokatendo 20 pepandja 16.] Embo ndika olya nuninwa okukwathela aantu yi ilonge kombinga yaKalunga mokulongitha Oombiimbeli dhawo.” Mu ulukila omapulo gatatu gopetameko ngoka ge li pepandja 8.

Jesus Kristus

◼ “Kombanda yevi aantu oyu uva Jesus Kristus ta popiwa. Yamwe otaya ti kutya okwa li omulumentu a dhenga mbanda. Yamwe ohaye mu galikana a fa Kalunga Omunankondoadhihe. Mbela sho to tala, osha simana ngaa okukala twi itaala muJesus Kristus?” Tegelela a yamukule. Lesha Johannes 17:3 nokatendo 3 pepandja 37-38. Ukitha eitulomo komapulo ngoka gatatu gopetameko montopolwa 4.

Omagumbo

◼ “Kunena omahala gokukala oga pumba go oga ninga ondilo. Sho to tala, kehe gumwe ona ka kale ngaa e na egumbo lye mwene? [Tegelela a yamukule. Lesha Jesaja 65:21, 22 nokatendo 20 pepandja 34.] Embo ndika otali yelitha nkene euvaneko ndika lyaKalunga tali ka gwanithwa.”

Ombiimbeli

◼ “Aantu olundji ohaya ti kutya Ombiimbeli Oohapu dhaKalunga. Mbela owi ipula nale kutya ongiini embo lya nyolwa kaantu tali ithanwa Oohapu dhaKalunga? [Tegelela a yamukule. Lesha 2 Petrus 1:21 nokatendo 5 pepandja 19-20.] Embo ndika otali gandja omayamukulo gOmbiimbeli komapulo ngaka.” Mu ulukila omapulo ngoka ge li pepandja 6.

◼ “Kunena aantu otaya vulu okumona uuyelele owundji moonzo dhi ili nodhi ili. Ihe openi tatu vulu okwaadha omayele omawanawa ngoka tage tu kwathele tu kale nonkalamwenyo ombwanawa? [Tegelela a yamukule. Lesha 2 Timoteus 3:16, 17 nokatendo 12 pepandja 22-23.] Embo ndika otali yelitha nkene tatu vulu okukala nonkalamwenyo ndjoka Kalunga a hokwa notayi tu etele uuwanawa.” Mu ulukila oshimpungu nomafano pepandja 122-123.

Omwenyo gwaaluhe

◼ “Aantu oyendji oya hala uundjolowele nonkalamwenyo onde. Andola osha li tashi wapa, mbela owa hala okukala sigo aluhe? [Tegelela a yamukule. Lesha Ehololo 21:3, 4 nokatendo 17 pepandja 53-54.] Embo ndika otali yelitha nkene tatu vulu okumona omwenyo gwaaluhe nonkene onkalamwenyo tayi ka kala ya tya uuna euvaneko ndika lya gwanithwa.”

Uukwanegumbo

◼ “Atuheni otwa hala okukala muukwanegumbo wu na ombili, nenge hasho? [Tegelela a yamukule.] Ombiimbeli otayi ti kutya ngele kehe gumwe ta holele ohole yaKalunga muukwanegumbo, nena otawu ka kala wu na ombili.” Lesha Aaefeso 5:1, 2 nokatendo 4 pepandja 135.

[Oshimpungu pepandja 5]

“Nonando iileshomwa yetu kaayi na ondando yasha, ohatu pandula ngele to tu pe omayambidhidho omashona goshimaliwa omolwiilonga yetu yokuuvitha muuyuni auhe.”

“Otashi vulika to ipula nkene iilonga yetu ohayi yambidhidhwa. Ohatu pewa omayambidhidho gehalo ewanawa. Ngele owa hala okuyambidhidha pashimaliwa, otandi ke shi pandula.”