Mbela oto ongaonga okuyadeka okakalata koye ko-DPA?

Ino ongaonga okuyadeka okakalata koye ko-DPA (durable power of attorney). Oukalata ovo ova nuninwa Eendombwedi da ninginifwa. Molwaashi ihatu kala tu “nowino waashi tashi ningwa [komongula],” osha fimanenena okuninga omahoololo komesho yefimbo noku shi ulika pakushanga kutya ohatu ka tambula ko ouhaku neenghedi dopauhaku doludi lilipi ngeenge otwa i monghalo omo itatu dulu okupopya. (Jak. 4:14; Oil. 15:28, 29.) Ope na okavidio, Transfusion-Alternative Health Care—Meeting Patient Needs and Rights, oko taka dulu oku tu kwafela tu ninge omahoololo a diladilwa nawa. Oto ladipikwa u tale okavidio oko nokukonga omanyamukulo komapulo oo taa landula. Opo nee dilonga pamwe neilikano kombinga yaasho we lihonga mokavidio oko. — Didilika: Molwaashi mokavidio oko omu na omauliko e na sha nomatando, ovadali ove na okutala ngeenge ounona vavo vanini otava dulu ngoo okutala pamwe navo okavidio oko ile hasho.

(1) Omolwashike eendokotola novashiivinawa vouhaku vamwe tava ningi omatalululo e na sha netulwohonde? (2) Yandja oihopaenenwa itatu yomatando a kitakana oo a ningwa nopehe na etulwohonde. (3) Eendokotola novatandi ve fike peni mounyuni aushe ve na ohokwe yokuhakula ile okutanda ovanaudu nopehe na etulwohonde nomolwashike? (4) Omakonakono oo a ningwa moipangelo mefimbo opo la di ko okwa holola shike shi na sha nelongifo lohonde? (5) Etulwohonde ohali etifa oilanduliko ya nyika oshiponga ilipi? (6) Ovashiivinawa voinima yopaunamiti ova fika pexulifodiladilo lilipi shi na sha nomauwa oo haa di meenghedi dopauhaku odo inadi kwatela mo etulwohonde? (7) O-anemia oshike? Omunhu ota dulu okukala monghalo ya tya ngaho fiyo oposhitwa shilipi? Ongahelipi omunhu oo e na o-anemia ta dulu okukwafelwa opo onghalo yaye i xwepopale ? (8) Ongahelipi ohonde itilyana tai dulu okuhapupalifwa molutu lomunhu oo e na eesele ditiliyana inadi wana? (9) Eenghedi dilipi tadi dulu okulongifwa opo omunhu aha kanife ohonde ihapu pefimbo letando? (10) Mbela ouhaku oo inau kwatela mo etulwohonde otau dulu ngoo okulonga kounona ile kovanhu ovo ve li monghalo ya nyaika? (11) Efinamhango la fimanenena lilipi tali dana onghandangala ngeenge tashi uya pefiloshisho liwa lopaunamiti? (12) Omolwashike shi li pandunge kOvakriste okuninga omahoololo avo komesho yefimbo e na sha nouhaku oo inau kwatela mo etulwohonde? Ongahelipi hatu dulu oku shi ninga?

Keshe umwe oku na okuninga etokolo kuye mwene she likolelela keliudo laye la deulwa kOmbibeli kutya ouhaku ulipi oo wa ulikwa mokavidio ta ka tambula ko. Mbela owa ninga nale etokolo kutya ouhaku neenghedi dopauhaku dilipi ove nounona voye tamu ka tambula ko? Opo u mone natango ouyelele muhapu u na sha noinima ei, tala “Omapulo a dja kovaleshi” oo taa hangwa mOshungonangelo yOshiwambo ye 1 Juli 2000 (yOshiingilisha 15 Juni 2000 ile 15 Juni 2004) noye 1 Novemba 2000 (yOshiingilisha 15 Kotoba 2000). Ouyelele vali umwe wa wedwa po otau hangwa mokawedwapo mokafo koukalele kOshiingilisha kaJanuali 2007, ke na oshipalanyole: “Mbela onda tala ko ngahelipi outukulwa vanininini ovo hava kufwa mohonde nosho yo eenghedi dopauhaku odo da kwatela mo okulongifwa kwohonde yange mwene?” Ou na okushiivifila ovo wa hoolola va kale ovapopikalelipo voye nosho yo ovapambele voye ovo vehe fi Eendombwedi kombinga yomatokolo oo wa ninga.