Mbela oto kakadhala okuudhitha okakalata koye ko-DPA?
Okakalata hoka kokwaaha tulwa ombinzi (DPA) oka nuninwa owala Oonzapo ndhoka dha ninginithwa. Molwaashoka ‘ku shi wo ngele ngula omutse otagu ka kala kumwe nothingo,’ osha simanenena wu tokole komeho yethimbo nokunyola kutya epango lini nosho wo omilandu dhepango ndhoka to ka taamba uuna itoo vulu okupopya. (Jak. 4:14; Iil. 15:28, 29) Opu na okavidio, Transfusion-Alternative Health Care — Meeting Patient Needs and Rights hoka taka vulu oku ku kwathela wu ninge etokolo lyopandunge. Oto ladhipikwa wu tale okavidio hoka nokukonga omayamukulo komapulo taga landula. Ndhindhilika: Molwaashoka okavidio otaku ulike omathano gaantu taya tandwa, aavali oye na okutokola ngele aanona aashona otaya vulu oku ka tala.
(1) Omolwashike oondohotola dhimwe naatseyinawa yuunamiti ya lundulula omadhiladhilo gawo kombinga yokutulwa ombinzi?
(2) Gandja iiholelwa itatu yomatando ga kitakana ngoka ga ningwa nopwaahe na okutulwa ombinzi. (3) Oondokotola naatandi ye thike peni muuyuni auhe yu ulika ohokwe yokukwathela aavu nopwaahe na oku ya tula ombinzi nomolwashike? (4) Omakonakono ngoka opo ga ningwa miipangelo oga holola shike shi na ko nasha nokulongitha ombinzi? (5) Okutulwa ombinzi oku na iilanduliko yini ya nika oshiponga? (6) Aatseyinawa yuunamiti oya thiki pehulithodhiladhilo lini li na ko nasha nuuwanawa mboka hawu zi mokupangwa nopwaahe na okutulwa ombinzi? (7) Oshike hashi etitha o-anemia? Omuntu ota vulu okukala nayo ethimbo li thike peni? Ongiini omuntu ngoka e yi na ta vulu okukwathelwa? (8) Ombinzi ontiligane otayi vulu okwiindjipalekwa ngiini molutu lwomuntu ngoka e na oosele oontiligane inaadhi gwana? (9) Omikalo dhini hadhi longithwa opo omuntu kaa kanithe ombinzi oyindji pethimbo lyetando? (10) Mbela aanona aashona nenge aantu mboka ya li moshiponga oshinene otaya vulu okupangwa nopwaahe na okutulwa ombinzi? (11) Ekotampango lini lya simanenena tali dhana onkandangala ngele tashi ya pesiloshimpwiyu ewanawa lyopaunamiti? (12) Omolwashike sha simana kAakriste opo ya hogolole komeho yethimbo epango ndyoka inaali kwatela mo okutulwa ombinzi? Ongiini tatu vulu oku shi ninga?
Kombinga yomapango gamwe ngoka gu ulikwa mokavidio, kehe gumwe oku na okuninga etokolo paumwene lyi ikolelela keiyuvo lye lya dheulwa kOmbiimbeli. Mbela owa ninga nale etokolo lya yela nokuudhitha okakalata koye ko-DPA kutya epango lini wa hala oku ka taamba nosho wo aamwoye? Opo wu mone uuyelele owundji wu na sha niinima mbika, tala ontopolwa onti-7 membo ‘Ohole yaKalunga’ nokulesha omauyelele ngoka. Tala wo okagwedhwa kOshiingilisa mUukalele Wetu wUukwaniilwa waJanuali 2007, ke na oshipalanyolo: “Ohandi tala ko ngiini uutopolwa uushona mboka wa kuthwa mombinzi nosho wo omilandu dhopaunamiti ndhoka dha kwatela mo okulongitha ombinzi yandje mwene?” Lwahugunina shilipaleka kutya owa nyola omahogololo goye mokakalata koye ko-DPA. Omukalelipo gwoye gwopaunamiti naakwanezimo mboka kaaye shi Oonzapo owu na oku ya yelithila nawa etokolo lyoye.
[Oshimpungu pepandja 3]
• Mbela owa tokola nale kutya epango nomilandu dhini to ka taamba opamwe naamwoye?
• Mbela oho ende nokakalata koye ko-DPA opo ngele pwa holoka oshiponga owu ka na?