Mbela owu shi shoka wu na okuhogolola?

Etando nopwaahe na okulongitha ombinzi otali indjipala momandiki ogendji gopaunamiti muuyuni. Mbela owa tseya nawa omatando ngoka haga ningwa nopwaahe na okulongitha ombinzi? Owa pumbwa oku ga tseya opo wu ninge etokolo li li mondjila kombinga yuunamiti netando. Tala okavidio No Blood — Medicine Meets the Challenge. Konima yoku ka tala galikana wu ninge etokolo lyopandunge to kwathelwa komapulo taga landula. Ndhindhilika: Molwaashoka okavidio oka kwatela mo okuulika omatando paufupi, aavali oye na okutokola ngele oshi li nawa oku ka tala naanona aashona.

(1) Omolwetompelo lya simana lini Oonzapo dhaJehova ihaadhi tulwa ombinzi? (2) Uuna tashi ya pesiloshimpwiyu lyopaunamiti, Oonzapo dhaJehova ohadhi hogolola shike? (3) Aavu oye na uuthemba wa shike? (4) Omolwashike tu na okutala nawa uuna tatu hogolola iinima mbyoka hayi longithwa peha lyokutulwa ombinzi? (5) Iinima iyali yini oondohotola tadhi vulu okulongitha uuna omuntu a kanitha ombinzi oyindji? (6) Omikalo ne dha simana odhini tadhi vulu okulongithwa pehala lyokutulwa ombinzi? (7) Ongiini oondohotola tadhi vulu okukwathela omuntu (a) kaa kanithe ombinzi oyindji (b) kaa kanithe oosele dhombinzi ontiligane (c) a kale e na ombinzi ya gwana (d) nokugalulila muye ombinzi ndjoka a kanitha? (8) Hokolola nkene (a) ohemodilution (b) nocell salvage hadhi longo. (9) Uuyelele wuni wa pumbwa okutseya kombinga yiinima mbyoka hayi longithwa pehala lyokutulwa ombinzi? (10) Mbela etando lya kwata miiti nolya kitakana otali vulu ngaa okuningwa shili nopwaahe na okutulwa ombinzi? (11) Ehumokomeho ewanawa lini tali ningwa muunamiti?

Kombinga yomapango gamwe ngoka gu ulikwa mokavidio, kehe gumwe oku na okuninga etokolo paumwene lyi ikolelela keiyuvo lye lya dheulwa kOmbiimbeli. Mbela owa ninga nale etokolo lya yela nokuudhitha okakalata koye okape kepopilo lyopaunamiti kedhina Advance Medical Directive (AMD)a kutya epango lini wa hala oku ka taamba nosho wo aamwoye? Opo wu mone uuyelele oundji tala “Omapulo ga za kaaleshi” mOshungonangelo yOshiwambo 1 Juli 2000 nosho wo ye 1 Novemba 2000. Opo wu ninge etokolo lyopaumwene kutya oto ka longitha shike naashoka itoo ka longitha tala oshigwedhelwako pepandja 215 sigo 218 membo ‘Ikalekeni mohole yaKalunga.’ Lwahugunina, shilipaleka kutya owa nyola omahogololo goye mokakalata koye okape kepopilo lyopaunamiti (AMD). Yelithila nawa aakalelipo yoye yopaunamiti naakwanezimo mboka kaaye shi Oonzapo etokolo lyoye.

[Enyolo lyopevi]