Oshikonga shi ikalekelwa shokugandja okatraktate mo 20 gaKotoba sigo 16 gaNovomba
1 Okutameka Omaandaha, 20 gaKotoba nokutsikila uule wiiwike ine, otatu ka kutha ombinga mokutaandelitha okatraktate okape ke na oshipalanyolo Mbela owa hala okutseya oshili? Otwi inekela kutya oshikonga shika tashi ka ningwa muuyuni auhe otashi ka pendutha ohokwe yaantu oyendji ya kale ya hala okutseya kutya oshili otayi adhika lela peni. — Joh. 17:17.
2 Okatraktate otaka gandja omayamukulo paufupi komapulo gahamano ga simana taga landula: “Mbela Kalunga oku na ko ngaa nasha natse shili?” “Mbela iita nokumona iihuna onayi ka hule po ngaa?” “Oshike hashi tu ningilwa ngele twa si?” “Mbela oonakusa oye na etegameno lyasha?” “Ongiini tandi vulu okugalikana opo ndi uvike kuKalunga?” nosho wo “Ongiini tandi vulu okumona enyanyu monkalamwenyo?” Oongeleka dhUukwakriste inadhi gandja nando omayamukulo taga mbilipaleke komapulo ngoka. Nokuli oyendji mboka kaaye shi Aakriste ohayi ipula kombinga yaashoka, ihe otashi vulika kaaye shi shi kutya omayamukulo ga yela otaga adhika mOmbiimbeli. Onkee ano, otwi inekela kutya etumwalaka ndika otali ka kala lya hokiwa kaantu oyendji.
3 Ka taandelitha moshitopolwa sheni ashihe: Kambadhala oku ka taandelitha megumbo kehe ndyoka li li moshitopolwa sheni. Ngele oshitopolwa sheni oshinene, aakuluntugongalo otaya vulu okutokola opo kehe pegumbo mpoka kaapu na aantu pu thigwe okatraktate. Dhimbulukwa oku ka gandja kaashiinda, kaakwanezimo, kaaniilonga nokaanasikola nosho wo kuyalwe mboka ho popi nayo ethimbo kehe. Otashi vulika wu ninge omalongekidho opo wu kuthe uukwathelikokolindjila muKotoba nenge muNovomba. Mbela owu na okanona nenge omukonakoni ngoka ta humu komeho pambepo nokwa gwana okulonga pamwe natse moshikonga shika e li omuuvithi inaa ninginithwa? Ngele osho, tseyithila aakuluntugongalo.
4 Shoka tatu ka tya: Opo tu vule okwaadha aantu oyendji netumwalaka ndika, oshi li nawa okupopya paufupi. Pula aanegumbo limwe lyomomapulo gahamano ngoka ge li pepandja lyotango noku yu ulukila eyamukulo mokatraktate. Shika otashi ka kwathela aauvithi ayehe ya popye shi ikolelela konkalo moka taya adha omunegumbo. Ngele gumwe oku ulike ohokwe, ndhindhilika edhina lye noku mu galukila. Momahuliloshiwike otatu vulu oku ka gandja pamwe niifo iipe. Konima yoshikonga mo 16 gaNovomba, otatu ka gandja embo Omalongo gOmbiimbeli. Uutraktate mboka wa hupa po otawu vulu okulongithwa ngaashi owala uutraktate uukwawo.
5 Tameka ekonakonombiimbeli: Okatraktate haka oka nuninwa oku tu kwathela tu tameke omakonakonombiimbeli. Ngele to shuna kugumwe ngoka u ulika ohokwe, oto vulu oku mu pula kutya oshili yOmbiimbeli yini ye mu hekeleka nenge ye mu kwathela? Mu ulukila epandja lyahugunina mpoka tapu popiwa kutya ota vulu okukala e na ekonakonombiimbeli e to mu pe embo Omalongo gOmbiimbeli. Ngele otashi vulika, lesha okatendo kamwe nenge uyali okuza montopolwa moka tamu popiwa oshindji kombinga yoshipalanyolo shoka a hogolola.
6 Jehova okwa hala aantu mboka taye mu galikana “mOmbepo nomoshili.” (Joh. 4:23) Atuheni natu kutheni ombinga moshikonga shika shi ikalekelwa tu kwathele yalwe ya tseye oshili.