Nkene embo ‘Ohole yaKalunga’ li na okulongithwa okuninga omakonakonombiimbeli
1. Elalakano lyembo ‘Ohole yaKalunga’ olyashike?
1 Katwa li tuu twa nyanyukwa sho twa li twa mono embo epe ‘Ikalekeni mohole yaKalunga’ poshigongi shetu shoshitopolwa “Natu wilikwe kombepo yaKalunga”! Ngaashi sha tseyithwa nale, embo ndika olya nuninwa oku tu kwathela tu tseye omithikampango dhaJehova dhopamikalo nokukala tu dhi hole, ihe haku longa aantu omalongo gopetameko gOmbiimbeli. Embo ndika itatu ke li gandja egumbo negumbo.
2. Embo ndika otali ka longithwa okutameka omakonakombiimbeli noolye, noshi na okuningwa ngiini?
2 Embo ndika otali ka longithwa li li embo etiyali okukonakonwa kaakonakonimbiimbeli ngele ya mana ko embo Omalongo gOmbiimbeli. Natu shi kaleke momadhiladhilo kutya aantu ihaya humu komeho pambepo shi thike pamwe. Ekonakono kehe nali ningwe pandapo ndjoka tayi opalele omukonakoni. Shilipaleka kutya oshitopolwa shoka mwa konakona oku shi uvite ko nawa. Embo ndika kali na okulongithwa okutameka omakonakonombiimbeli naantu mboka tashi vulika ya konakona nale omambo galwe, ihe ihaya kala pokugongala nosha yela kutya kaye na ohokwe okuvulika kooshili dhOmbiimbeli ndhoka ya longwa.
3. Oshike tu na okuninga ngele ohatu konakona ngashingeyi nagumwe membo Longela Kalunga?
3 Ngele oho konakona ngashingeyi nagumwe membo Longela Kalunga nomu na ko owala oontopolwa oonshona, oto vulu okutokola oku li mana ko nokuladhipika omukonakoni a leshe paumwene embo ‘Ohole yaKalunga.’ Ngele hasho, oshi li nawa mu lundulukile kembo epe nokutameka petameko. Ngaashi hashi ningwa nembo Omalongo gOmbiimbeli, okukonakona oshigwedhelwako oshi li kune yene.
4. Otu na okuninga shike ngele omukonakoni gwetu okwa ninginithwa manga inaa mana ko embo Omalongo gOmbiimbeli nosho wo ‘Ohole yaKalunga’?
4 Ngele omukonakoni okwa ninginithwa manga inaa mana ko omambo agehe gaali, ekonakono oli na okutsikila sigo embo ‘Ohole yaKalunga’ lya pu ko. Nokuli nando omukonakoni okwa ninginithwa, owu na okuyalula ethimbo, eishunoko nekonakono. Omuuvithi ngoka to longo pamwe naye nota kutha ombinga mekonakono, naye ota vulu okuyalula ethimbo.
5. Ongiini embo ‘Ohole yaKalunga’ tali vulu okulongithwa okukwathela aauvithi mboka ya ninga ethimbo inaaya kutha ombinga muukalele?
5 Ngele owa pulwa koshilyo shOkomitiye yIilonga yEgongalo wu ninge ekonakonombiimbeli naangoka ihaa yi we miilonga yokuuvitha, otashi vulika she ku pula wu konakone nomuntu ngoka oontopolwa dhontumba membo ‘Ohole yaKalunga.’ Ekonakono ndyoka inali pumbwa okuningwa uule woomwedhi odhindji. Jehova ine tu sila tuu nawa oshimpwiyu moku tu pa embo ndika epe lya nuninwa oku tu kwathela tu ikaleke ‘mohole ye’! — Jud. 21.