Ulika ohokwe kaapopi yomalaka goshikwiilongo uuna wu li momapya
1. Ompito yini hayi holoka miitopolwa moka hatu uvitha?
1 Jesus Kristus okwa hunganeka kutya onkundana ombwanawa otayi ku uvithwa kombanda yevi alihe yi “ningile iigwana ayihe onzapo.” Ayehe mboka haya kutha ombinga miilonga yokuuvitha noyokuninga aantu aalongwa oye wete esimano lyoohapu ndhika. (Mat. 24:14; 28:19, 20) Miilonga yetu yokuuvitha noyokuninga aantu aalongwa, otashi vulika hatu tsakaneke aantu mboka ya za kiilongo yilwe nohaya popi omalaka ngoka katu shi nondanda. Aantu mboka nayo oya pumbwa okuuva etumwalaka lyUukwaniilwa nokukala kombinga yoshili omanga esiku etilithi lyaJehova inaali ya. (Mal. 3:18) Ongiini tatu vulu okuulukila aantu ohokwe mboka haya popi omalaka goshikwiilongo moshitopolwa shetu?
2. Ongiini tatu vulu okuholela Jehova ngele tashi ya paantu mboka haya popi omalaka gi ili?
2 Kala netaloko lya fa lyaJehova kombinga yaamboka haya popi omalaka gi ili: Opo tu ulukile aantu moshitopolwa shetu ohole ya fa yaJehova nopwaahe na ontondo, otu na okukala nehalo oku ya kwathela ya mone ontseyo yashili kombinga yaKalunga kashili, Jehova, kashi na nduno mbudhi kutya ohaya popi elaka lini. (Eks. 15:3, OB-1954; Iil. 10:34, 35) Nonando otu na okugandja unene eitulomo kaantu mboka haya popi elaka ndyoka hali popiwa megongalo lyetu, otu na wo okusila oshimpwiyu aantu mboka haya popi omalaka gi ili nokukambadhala tu ya uvithile etumwalaka lyUukwaniilwa waKalunga. Okweenda pomunkulo mboka haya popi omalaka galwe, kashi li metsokumwe nelalakano lyaJehova lyokugandja uunzapo kaantu yomiigwana ayihe. Ano ongiini tatu vulu okukwathela aantu mboka ihaaya popi elaka lyetu?
3. Otwa pewa oshilongitho oshiwanawa shini, nongiini tatu vulu okwiilongekidha tu shi longithe?
3 Longitha okambo Good News for People of All Nations: Okambo haka oka nyanyangidhwa nelalakano tu ka longithe muukalele uuna twa tsakaneke gumwe ngoka ha popi elaka lyi ili. Kala aluhe wu ka na e to ilongo nawa oshikalimo shako nokukala wi ilongekidha oku ka longitha. Ndhindhilika omalaka ngoka haga popiwa moshitopolwa sheni opo wu ga mone nziya. Ngele opu na iileshomwa momalaka ngoka, oshi li nawa okukala wu yi na opo wu vule oku yi gandja konima ngele wu ulukile omuntu etumwalaka mokambo.
4. Ongiini tatu vulu okulongitha okambo Nations uuna tu li muukalele?
4 Ngele owa tsakanene nagumwe muukalele ngoka ha popi elaka lilwe, ihe ku shi kutya oha popi elaka lini, mu ulukila epeko lyokombanda yokambo. Mu ulukila wo okaalita kuuyuni meni lyepeko, iyulika ngoye mwene e to mu ulukile oshilongo moka ho kala. Udhika kutya owa hala okutseya mpoka a za nelaka ndyoka ha popi. Uuna wa tseya kutya oha popi elaka lini, inda koshikalimo e to kongo epandja mpoka pu na elaka ndyoka ha popi. Mu ulukila etumbulo ndyoka lya luudhikwa pombanda yepandja e to mu ulukile kutya owa hala a leshe etumwalaka ndyoka. Uuna a mana okulesha, mu pa okafo melaka lye nenge wu mu ulukile etumbulo ndyoka lya nyolwa noondanda oondambaloya ndhoka tadhi popi kutya owu na ehalo oku mu etela oshileshomwa melaka lye. Opo nduno, mu ulukila mpoka pwa nyolwa noondanda dha luudhikwa “edhina lyandje” e to li mu lombwele. Mu ulukila mpoka pwa nyolwa noondanda dha luudhikwa “edhina lyoye” e to tegelele a yamukule. Ninga oshilage wu shune ko.
5. Elongekidho lini lya pumbwa okuningwa opo tu sile oshimpwiyu aantu yomalaka galwe mboka yu ulika ohokwe?
5 Ninga omalongekidho opo ya silwe oshimpwiyu: Otu na okuninga oonkambadhala dha mana mo opo tu shune kwaamboka ye na ohokwe metumwalaka lyUukwaniilwa, kutya nduno ohaya popi elaka lini. Ngele otwa mono nokutya oye na ohokwe muKalunga nomOohapu dhe, Ombiimbeli, otu na okuudhitha ofooloma yedhina Please Follow Up (S-43) e tatu yi gandja nziya kuamushanga gwegongalo e yi tume koshitayimbelewa opo omuntu ngoka e na ohokwe a talelwe po kugumwe ngoka ha popi elaka lye. Opo nduno, oshitayimbelewa otashi ka tuma ofooloma ndjoka kongundu yelaka ndyoka tayi vulu oku mu kwathela. Uuna ofooloma ndjoka ya thiki, omuntu ngoka na monike nopwaahe na okwoongaonga. Amushanga ota vulu okupa omutonateli gwiilonga okopi opo a tseye kutya aantu yangapi yelaka lyontumba ye na ohokwe. Ofooloma ndjika oyi na owala okulongithwa ngele omuntu otu ulike lela ohokwe.
6. Otu na oshinakugwanithwa shashike ngele otwa tsakaneke omuntu ngoka ha popi elaka lyi ili?
6 Otashi vulika pu pite ethimbo uuna ofooloma ya tumwa opo omuntu ngoka u ulika ohokwe a talelwa po komuuvithi. Onkee ano, opo tu kokeke ohokwe ndjoka yu ulikwa, omuuvithi ngoka a tumu ofooloma ota vulu okukala ha talele po omuntu ngoka manga ngoka e shi elaka ndyoka ha popi ta thiki. Poompito dhimwe, ekonakonombiimbeli otali vulu okutamekwa nomuntu ngoka u ulika ohokwe. Ihe ongiini omuuvithi ta vulu okumona iileshomwa melaka lyomuntu ngoka u ulika ohokwe manga a tegelela ngoka ha popi elaka lye a thike?
7. Ongiini tatu vulu okumonena aantu mboka haya popi omalaka gi ili iileshomwa momalaka gawo?
7 Iileshomwa momalaka galwe: Omagongalo kage na okukala nondumba yiileshomwa yomalaka galwe gi ili. Ihe ngele omutonateli gwiilonga oku wete kutya opu na aantu oyendji yelaka lyontumba ye na ohokwe moshili, ota vulu okumbestela omwaalu gwe eleka gwiileshomwa melaka ndyoka opo aauvithi ye yi longithe. Ngele megongalo kamu na iileshomwa melaka ndyoka, otayi vulu okumbestelwa. Iileshomwa melaka ndyoka otashi vulika kaayi thike mbala. Onkee ano, omuntu ngoka ota vulu okuningilwa okopi dhiileshomwa kondjukithi ndjika www.watchtower.org mo-Internet. Omu na iileshomwa oyindji momalaka omathele mbyoka tayi vulu okumonika nuupu komuuvithi nenge komuntu ngoka e na ohokwe. Nopwaahe na omalimbililo, elongekidho ndika otali ka kwathela okukokeka ohokwe ndjoka yu ulikwa kaantu mboka haya popi omalaka gi ili.
8. Egongalo otali dhana onkandangala yini mokukokeka ohokwe yaamboka haya popi omalaka gi ili?
8 Onkandangala ndjoka egongalo tali dhana: Omathimbo gamwe poshitopolwa mpoka pu na aapopi yelaka lyoshikwiilongo oyendji, otashi vulika pu kale kaapu na egongalo li li popepi lyelaka ndyoka. Ngele opu na mboka ye na ohokwe ihe ohaya popi elaka lyi ili, otatu vulu oku ya hiya ya gongale pamwe natse nonando ihayu uvu ko elaka lyetu. Uuna tatu ya hambelele nohamu nokuulika kutya otu na ohokwe nayo, otashi vulika shi ya kumike ya kale haye ya kokugongala pandjigilile. Otashi vulika shi kale oshidhigu petameko omolwelaka neputuko ndyoka inaali faathana, ihe kapu na sha shoka tashi vulu okukala einda kOonzapo dhaJehova dhi ulukile omuntu ohole yashili yopaKriste, kutya nduno ogwomoshigwana shini. (Sef. 3:9, NW; Joh. 13:35) Mbela oho popi othaathaa elaka lyontumba? Ngele osho nowu na ehalo okukala ho shuna kaantu yelaka ndyoka mboka yu ulika ohokwe, lombwela amushanga gwegongalo lyeni opo e shi tseyithile oshitayimbelewa. Shika otashi ka kwathele oshitayimbelewa uuna tashi kongo omuuvithi a kwathele aantu mboka.
9. Uunake aauvithi taya vulu okulongwa elaka lyi ili, nohashi endwa ngiini?
9 Okwiilonga elaka lyi ili: Uuna to kwathele mboka haya popi elaka lilwe, oshi li nawa wu ya ladhipike ya tameke okuya pokugongala mpoka hapu popiwa elaka lyawo, ngele otaya vulu okuthika po. Ihe ngele itaya vulu okuthika po, aauvithi yamwe otaya vulu okwiilonga elaka ndyoka opo ya vule okukwathela nawa mboka ye na ohokwe. Ngele kapu na egongalo li li popepi nopu na aakwiilongo oyendji yelaka lyontumba mboka ye na ohokwe, oshitayimbelewa otashi vulu okuninga omalongekidho opo aamwatate ya longwe elaka ndyoka. Uuna tashi ningwa, oshitayimbelewa otashi ka tseyithila omagongalo moshitopolwa ompumbwe ndjoka noku ga lombwela kombinga yootundi dhokwiilonga elaka. Mboka ye na ehalo okwiilonga oye na okwiitulila po elalakano ya lundulukile kongundu ndjoka nenge kegongalo ndyoka opo ya kwathele aapopi yelaka ndyoka.
10. Uunake ongundu ndjoka hayi popi elaka lyi ili tayi vulu okutotwa, nohashi ikolelele koshike?
10 Okutota po ongundu: Opo ongundu yelaka lyontumba yi totwe, iitegelelwa mbika ine oyi na okukala ya gwanithwa po: (1) Opu na okukala aapopi yelaka ndyoka ya gwana tayu ulike ohokwe notaya ningi ehumokomeho. (2) Opu na okukala ongundu onshona yaauvithi mboka ye shi elaka ndyoka nenge taye li ilongo. (3) Opu na okukala omukuluntugongalo a pyokoka nenge omuyakuligongalo ngoka ta vulu okukwatela komeho okugongala melaka ndyoka nando oshikando shimwe moshiwike kehe. (4) Opu na okukala olutu lwaakuluntugongalo mboka ye na ehalo okwaambidhidha ongundu ndjoka. Ngele iinima mbyoka oya gwanithwa po, nena olutu lwaakuluntugongalo nalu nyolele koshitayimbelewa kombinga yongundu ndjoka nokupula epitikilo opo egongalo lyawo li pewe uuthemba okusila oshimpwiyu ongundu yaantu mboka haya popi elaka ndyoka. (Tala embo Organized, epandja 106-107.) Omukuluntugongalo ngoka ta kwatele komeho ongundu ndjoka oku na okwiithanwa “omutonateli gwongundu” nenge ngele ye omuyakuligongalo oku na okwiithanwa “omuyakuli gwongundu.”
11. Omolwashike shi li uuthembahenda okuulika ohokwe maapopi yomalaka gi ili moshitopolwa shetu?
11 Okuulika ohokwe maantu mboka haya popi omalaka gi ili miitopolwa yetu oshi li oshitopolwa sha simanenena shiilonga yetu yokuuvitha mbyoka ya tamekwa kuJesus Kristus, Oshiholelwa shetu. Natu kale aalaadhi nokuninga ngaashi tatu vulu e tatu tala nkene Jehova ta tukulutha iigwana nokweeta aantu mboka ya fa omaliko kuye. (Hag. 2:7) Itashi nyanyudha tuu ngele atuheni tatu longeleni kumwe moshinima shika! Jehova na yambeke oonkambadhala dhetu ndhoka tatu ningi tu kwathele mboka haya popi omalaka goshikwiilongo nokudhimbulukwa aluhe kutya Kalunga ota vulu okukokitha oombuto ndhoka tatu kunu kutya nduno aantu ohaya popi elaka lini. — 1 Kor. 3:6-9.