Oshitopolwa oshipe shoka sha nuninwa oku tu kwathela nkene tu na okutameka omakonakonombiimbeli
1. Oshitopolwa oshipe shini tashi kala hashi holoka mOshungolangelo, nosha nuninwa shike?
1 Okutameka momumvo 2011 mOshungolangelo otamu ka kala hamu holoka oshitopolwa shoka sha nuninwa oku tu kwathela nkene tu na okutameka omakonakonombiimbeli, shi na oshipalanyolo: “Ilonga mo sha mOohapu dhaKalunga.” Nonando aantu yamwe moshitopolwa otaya ka kala ya nyanyukilwa oku shi lesha, oshitopolwa shoka otu na oku shi longitha uuna tatu popi nomunegumbo.
2. Oshike tashi ka kala moshitopolwa shika?
2 Shoka sha kwatelwa mo: Oshipalanyolo nuupalanyolo uushona oyi li molupe lwomapulo opo tu pule omunegumbo uuna tatu kundathana naye. Opo omunegumbo a leshe mOmbiimbeli ye mwene, moshitopolwa moka otamu ka kala owala Enyolo, ontopolwa novelise, pehala lyokutotha Oohapu okuza mOmbiimbeli. Uutendo uufupi opo shi kale oshipu oku wu kundathana nomunegumbo. Oshitopolwa kehe otashi ke ku ulukila kutya uuyelele mboka tamu kundathana otawu adhika peni membo Omalongo gOmbiimbeli naashoka otashi vulu okufala mekonakonombiimbeli.
3. Uuna tatu longo egumbo negumbo, ongiini tatu vulu okulongitha oshitopolwa shoka tu tameke omakonakonombiimbeli?
3 Nkene tu na oku shi longitha: Uuna to gandja iifo, pula omunegumbo epulo ndyoka tali pendutha ohokwe lya kankamena koshitopolwa shontumba moshifo shoka. Pashiholelwa, Oshungolangelo ye 1 Januali nenge ye 1 Febuluali yOshiwambo otayi popi nkene Ombiimbeli ya simana. Oto vulu okupula to ti: “Mbela Ombiimbeli Oohapu dhaKalunga nenge oyi li owala embo ewanawa? [Tegelela a yamukule.] Moshifo shika omu na oshitopolwa shoka tashi yamukula epulo ndyoka.” Mu ulukila epulo lyotango e to lesha okatendo kotango nokutala enyolo ndyoka lya gandjwa. Lesha ishewe epulo e to pula omunegumbo a ninge etyokosha. Ngele otashi vulika, ota mu vulu oku kundathana naye uuyelele owundji to longitha omapulo ngoka ge na oonomola. Omanga inoo ya, ukitha eitulomo kepulo lya landula ko e to ningi elongekidho wu galuke mu ye mu li kundathane. Shuna ko oshiwike kehe opo mu kundathane oshindji kombinga yoshitopolwa shoka sigo oshifo shomwedhi gwa landula she ya. Shimwe ishewe oto vulu okulombwela omunegumbo shu ukilila kutya owa hala okutameka ekonakonombiimbeli naye. Longitha oshitopolwa shoka shi li moshifo wu mu ulukile nkene ekonakono hali ningwa.
4. Ongiini tatu vulu okulongitha oshitopolwa shika uuna tatu ningi omaishunoko?
4 Oto vulu wo oku kundathana oshitopolwa shika naamboka ho faalele iifo nosho wo naatalelwa po yoye. Oto vulu wu tye: “MOshungolangelo omu na oshitopolwa oshipe. Onda hala ndi ku ulukile nkene hashi longithwa.” Otwi inekela kutya oshitopolwa shika oshipe otashi ka kwathela aantu oyendji ya “tseye oshili.” — 1 Tim. 2:4.