Oshitopolwa shoka sha nuninwa oku tu kwathela uuna tu li muukalele
1. Iitopolwa “Omuuvithi ta kundathana nomunegumbo” ohayi nyanyangidhwa omolwomalalakano gaali geni?
1 Omathimbo nomathimbo mOoshungolangelo dhetu dhuukalele ohamu kala iitopolwa yi na oshipalanyolo: “Omuuvithi ta kundathana nomunegumbo.” Iitopolwa mbika ohayi nyanyangidhwa omolwomalalakano gaali. Limwe okulonga omalongo gOmbiimbeli momukalo tagu hokitha, ekwawo oku tu kwathela nkene tu na okutompathana naantu kombinga yiikundathanwa yontumba. (1 Pet. 3:15) Ongiini tatu vulu okulongitha iitopolwa mbino momukalo omwaanawa?
2. Ongiini tatu vulu okulongitha iitopolwa mbyoka muukalele?
2 Yi longitha muukalele: Oto vulu okukala ho hupitha po Ooshungolangelo dhontumba ndhoka dhi na iitopolwa mbyoka. Uuna omunegumbo, omuntu ngoka e na ohokwe nenge omukonakonimbiimbeli a pula epulo nenge a popi oshinima shontumba shoka sha popiwa miitopolwa mbyoka mu pa oshifo shoka e to popi naye. Ngele ku na okopi yoshifo shoka mu na oshitopolwa shoka, oto vulu oku shi tapa kointaneta ko-www.jw.org.
3. Ongiini tatu vulu okukundathana oshitopolwa shimwe shomwaambika nomunegumbo?
3 Ongiini to vulu okukundathana oshitopolwa shimwe shomwaambika nagumwe? Yamwe ohaya lombwele omuntu ngoka e na ohokwe a leshe mokule oohapu dhomunegumbo, omanga yo taya lesha oohapu dhomuuvithi. Okuninga oonkundathana dha tya ngaaka momukalo ngoka ohashi pondola, molwaashoka ohashi kwathele omuntu a konakone pauhandimwe shoka twi itaala momukalo omupu nopwaahe na okutsa oompata. — Deut. 32:2.
4. Ongiini tatu vulu okulongitha iitopolwa mbyoka tu idheule tse yene?
4 Idheula mwene nosho wo yalwe: Sho to lesha iitopolwa mbyoka, ndhindhilika omanyolo, omathaneko nosho wo omikalo dhokutompathana. Tala kutya oshitopolwa osha nyolwa momukalo gwokupopya gwa tya ngiini. Opo ihe kambadhala okuninga sha faathana muukalele. (Omayel. 1:5; 9:9) Omumwameme gumwe okwa ti: “Okulesha iitopolwa mbyoka osha fa twi ilongo oshinima shontumba komukokolindjila ngoka a ‘pyokoka’ noha kala aluhe e shi kutya oshinima shoka shi li mondjila e na okutya oshini!”
5. Ongiini tatu vulu okukwathela aakonakonimbiibeli yetu yi ilongekidhile uukalele?
5 Oto vulu wo okulongitha iitopolwa mbika wu kwathele omukonakonimbiimbeli gwoye i ilongekidhile uukalele. Lesheni uuyelele mboka pamwe naye, omukonakonimbimbeli gwoye oye na kale ta dhana onkandangala e li omuuvithi. Kungawo, aakonakonimbiibeli otaye ki ilonga nkene ye na okupopya kombinga yaashoka yi itaala momukalo omwaanawa. (Kol. 4:6) Oshoshili kutya iitopolwa mbika oyi li yimwe yomiitopolwa oyindji mbyoka Jehova te tu kwathele nayo “tu pondole” muukalele wetu. — 2 Tim. 4:5.