Nkene tatu vulu okuhwepopaleka uunkulungu wetu muukalele — ulika nkene ekonakonombiimbeli hali ningwa to longitha embo Omalongo gOmbiimbeli

Omolwashike sha simana: Aantu oyendji otashi vulika ihaya kala naanaa yu uvite ko kutya ekonakonombiimbeli oshike. Ohashi vulika ya kale taya dhiladhila kutya otaya ka waimina ongundu yaantu mboka taya konakona Ombiimbeli, nenge ya kale haya yi kootundi dhontumba. Pehala lyoku ya lombwela owala kutya ohatu konakona naantu Ombiimbeli, yu ulukila nkene ekonakonombiimbeli hali ningwa. Shika oto vulu oku shi ninga muule wominute omishona. Oto vulu okuulukila omuntu kutya okukonakona Ombiimbeli oshinima oshipu lela noshihokithi.

Nkene tu na oku shi ninga:

Ngele wi ipopi, pula omunegumbo ngele oha kala ti ipula kombinga yonakuyiwa.
Mu lombwela kutya aantu oyendji ohayi ipula noshinima sha faathana, e to mu ulukile oshikalimo membo Omalongo gOmbiimbeli. Mu yelithila kutya embo ndika oli na iiyilongomwa iipu okuuviwa ko mbyoka tayi ulike shoka Ombiimbeli tayi ti kombinga yonakuyiwa nosho wo yiinima yilwe. Mu pula kutya ontopolwa yini e na ohokwe muyo.
Mu pa embo e to mu ulukile ontopolwa ndjoka a hogolola. Mu yelithila kutya omapulo ngoka ge li petameko lyontopolwa oga yamukulwa muutendo mboka wu li montopolwa ndjika.
Pula omunegumbo a leshe okatendo kotango ngele okwa manguluka oku shi ninga. Opo nduno lesha epulo lyokatendo hoka, e ta mu kundathana eyamukulo. Taleni omanyolo ngoka ga tothwa mo taga ambidhidha eyamukulo. Mu ulukila nkene wa tenda omayamukulo membo lyoye.
Tsikileni nokatendo ka landula ko, ihe pompito ndjino pula omunegumbo a kambadhale okuyamukula epulo niitya ye mwene.
Pandula omunegumbo, e to ningi elongekidho wu galuke muye mu mane ko oshikundathanwa.
Ngele otashi opalele, mu ulukila okavidio ko-jw.org/ng koshipalanyolo Mbela Ombiimbeli ohayi konakonwa ngiini?

Kambadhala oku shi ninga momwedhi ngu:

Galikana kuJehova a yambeke oonkambadhala dhoye wu tameke ekonakonombiimbeli. — Fil. 2:13.
Kambadhala okuulika nkene ekonakonombiimbeli hali ningwa to longitha embo Omalongo gOmbiimbeli, nenge wu longithe okavidio Mbela Ombiimbeli ohayi konakonwa ngiini? Shi ninga nando oshikando shimwe uuna wu li muukalele.