Kwathela aantu ya pulakene kuKalunga
1. Okabroshure keni ka li ka piti poshigongi shoshitopolwa ‘Uukwaniilwa waKalunga nawu ye!’ nomolwashike taka ka pondola muukalele?
1 Poshigongi shoshitopolwa shi na oshipalanyolo ‘Uukwaniilwa waKalunga nawu ye!’ opwa li pwa piti okabroshure okape kedhina Kala ho pulakene kuKalunga opo wu ka kale nomwenyo sigo aluhe. Molwaashoka okabroshure haka kake na oohapu odhindji, otaka vulu okutolokwa nuupu nomeendelelo. Okwa li kwa gandjwa epitikilo okabroshure hoka ka tolokwe momalaka 431.
2. Oolye taya ka kwathelwa kokabroshure haka?
2 Oolye naanaa taya ka kwathelwa kokabroshure haka? Natu tale koonkalo tadhi landula ndhoka hadhi holoka olundji muuyuni:
• Omuuvithi ngoka ta kundathana nomunegumbo, petalelopo lyotango nenge peishunoko, otashi vulika a dhimbulule kutya omunegumbo ke shi okulesha nenge iha lesha nawa.
• Omuuvithi ngoka hu uvithile aantu yelaka moka kaamu na iileshomwa yetu nenge mu na owala iileshomwa iishona. Nenge hu uvithile moshitopolwa moka oyendji kaaye shi okulesha elaka ndyoka haya popi nawa.
• Omuuvithi ngoka hu uvithile oombolo melaka lyokuudhika.
• Omuvali ngoka a hala okulonga oyana oshili, ihe kaye shi okulesha natango.
3. Okabroshure Kala ho pulakene kuKalunga opo wu ka kale nomwenyo sigo aluhe oku unganekwa ngiini?
3 Nkene ku unganekwa: Okabroshure Kala ho pulakene kuKalunga opo wu ka kale nomwenyo sigo aluhe oku unganekwa nelalakano lyokukwathela mboka haya lesha nuudhigu nenge opo taya ilongo okulesha. Pombanda kolumoho moshileshwa kehe shomapandja gaali opu na epulo ndyoka lya yamukulwa pomapandja ngoka. Pomathano ogendji opu na efatululo nenyolo. Lwopevi lyomapandja gamwe opu na okampungu ka fa okatokele hoka ke na iitsa ya gwedhwa po nomanyolo ngoka taga vulu okukundathanwa, shi ikolelela kowino yomukonakoni.
4. Uunake nongiini tu na okugandja okabroshure haka?
4 Nkene taka vulu okulongithwa: Oto vulu okugandja okabroshure haka miilonga yegumbo negumbo ngele owu wete kutya otaka vulu okukwathela omunegumbo, nonando uubroshure hawo tawu gandjwa omwedhi ngoka. (Tala okampungu ke na oshipalanyolo: “Nkene taka vulu okugandjwa muukalele.”) Oto vulu okulombwela ngoka u ulika ohokwe sho to ningi eishunoko kutya owa hala oku mu ulukila sha e to mu pe okabroshure haka. Sho tamu kundathana omathano, otamu vulu okulesha oohapu nomanyolo ngoka ge li pomathano.
5. Ongiini tatu vulu okukwathela aakonakonimbiimbeli yetu ya hume komeho?
5 Kwathela omukonakoni a ninge ehumokomeho: Otwi inekela kutya oonkundathana dhoye otadhi ka pendutha ohokwe yomukonakoni a kale a hala okukonakona nokulesha a vule okumona ontseyo yaJehova kuye mwene. (Ep. 1:1-3; Joh. 17:3) Ihe nonando ongawo, itashi ti kutya ngele omukonakoni a mana ko okabroshure okwa gwana okuninginithwa. Omu na okutameka ekonakono membo Omalongo gOmbiimbeli nenge oshileshomwa shilwe shoka sha gwana oku mu kwathela a kale u uvite ko nawa Ombiimbeli.
6. Omolwashike wa pandula okabroshure haka okape komuukalele?
6 Ngele aantu oya hala okukala nomwenyo sigo aluhe, oye na okupulakena kOmunankondoadhihe. (Jes. 55:3) Ehalo lyaJehova olyo kutya “aantu [yomaludhi agehe, NW],” mwa kwatelwa mboka kaaye shi okulesha, yi ilonge nkene ye na okupulakena kuye. (1 Tim. 2:3, 4) Inatu pandula tuu sho tu na okabroshure haka okape hoka tatu vulu okulongitha tu longe aantu nkene ye na okupulakena kuKalunga!
[Oshimpungu pepandja 7]
Nkene taka vulu okugandjwa muukalele
Ulukila omunegumbo pepandja eti-2 neti-3 e to ti: “Mbela ino hala okukala muuyuni mboka tawu monika wa fa mbuka? [Tegelela a yamukule.] Omanyolo otagu uvaneke kutya [nenge embo ndika eyapuki otali uvaneke] kutya Kalunga masiku ota ka ninga uuyuni ehala ewanawa nolyombili moka itaamu ka kala nando ogumwe a hepa nenge te ehama. Ndhindhilika shoka tu na okuninga, opo tu ka kale mo. [Lesha oohapu dhaJesaja 55:3 ndhoka dha nyolwa pombanda pepandja eti-3.] Enyolo ndika otali tu lombwele ‘tu ye’ kuKalunga ‘nokupulakena’ kuye. Ihe ongiini tu na okupulakena kuKalunga?” Yanuna pepandja eti-4 neti-5 e tamu kundathana naye eyamukulo. Ngele ke na ethimbo, mu thigila okabroshure e to ningi elongekidho wu shune ko mu ka kundathane eyamukulo.