Otashi vulika twa pumbwa okukonga manga inaatu ka uvitha
1. Omolwashike iitopolwa hayi pewa omagongalo shi ikolelela komalaka ngoka haga popiwa mo?
1 POpentekoste 33 E.N., sho aalongwa yaJesus ya pewa ombepo ondjapuki oya “tameke okupopya omalaka omakwiilongo” naamboka ya za komahala gokokule. (Iil. 2:4) Naantu 3 000 oya li ya ninginithwa. Shoka sha li tashi kumitha ooshino kutya nonando aatalelipo mboka otashi vulika ya li haya popi elaka limwe, tashi vulika Oshihebeli nenge Oshigreka, Jehova okwa hogolola yu uvithilwe etumwalaka lyUukwaniilwa melaka lyawo lyoshivalelwamo. Etompelo limwe olyo ndino kutya aantu ohaya gumwa unene konkundana ombwanawa ngele oye yi uvu melaka lyawo lyoshivalelwamo. Onkee ano, kunena iitopolwa mbyoka hatu longo, moka hamu popiwa omalaka ogendji, ohayi pewa omagongalo shi ikolelela komalaka ngoka haga popiwa mo. (Organized, ep. 107, okat. 2-3) Oongundu ndhoka hadhi popi omalaka goshikwiilongo ihadhi pewa oshitopolwa shontumba, ihe ohadhi uvithile owala moshitopolwa shoka sha pewa egongalo moka dhi li nosho wo moshitopolwa shomagongalo gopopepi tadhi uvithile aantu mboka haya popi elaka lyawo.
2. (a) Iilonga yokukonga aantu mboka haya popi elaka lyontumba oshike, nopeni ya pumbwa okulongwa? (b) Ongiini omagongalo taga vulu okukwathelathana okulonga miitopolwa moka hamu popiwa omalaka gi ili nogi ili? (c) Oshike tu na okuninga ngele otwa mono omuntu ha popi elaka lilwe tu ulike ohokwe?
2 Ngele oho kala moshitopolwa moka mu na aantu haya popi owala elaka limwe, oto vulu okuuvitha egumbo negumbo. Ihe otashi vulika itoo vulu oku shi ninga ngele oho kala moshilando moka aantu haya popi omalaka gi ili nogi ili. Otashi vulika mu kale hamu uvithile moshitopolwa shimwe nomagongalo gopuushiinda. Omanga omagongalo galwe tashi vulika ge mu pe uuyelele kombinga yaantu mboka haya popi elaka lyeni, oshi li oshinakugwanithwa shegongalo lyeni okukonga aantu mboka haya popi elaka lyegongalo lyeni. (Tala okampungu “Natu kwathelathaneni.”) Onkee ano, otashi vulika twa pumbwa okukutha ombinga miilonga yokukonga aantu mboka haya popi elaka lyontumba. Iilonga mbika yokukonga aantu otu na oku yi longa ngiini?
3. Oshike tashi ka kwathela egongalo nenge ongundu yi tokole kutya oyi na okukonga peni noyi tokole kutya oyi na okukonga ethimbo li thike peni?
3 Nkene iilonga yokukonga aantu mboka haya popi elaka lyontumba yi na okuunganekwa: Ethimbo ndyoka tamu ka longitha okukonga aantu moshitopolwa moka mu na aantu haya popi omalaka gi ili nogi ili olyi ikolelela koonkalo dhomoshitopolwa sheni. Pashiholelwa, aantu yangapi haya popi elaka ndyoka moshitopolwa sheni? Omu na aauvithi yangapi? Oondjukithi dhi thike peni dhaamboka haya popi elaka ndika egongalo nenge ongundu yi na? Egongalo inali tegelelwa li longe iitopolwa ayihe shi thike pamwe, ihe otashi vulika li tokole okulonga unene momahala moka mu na aantu oyendji meni lyoshitopolwa shoka lya pewa nenge momahala ngoka ge li popepi naampoka hali gongalele. Ihe osha simana okukala mu na omulandu gwokukonga, opo aantu oyendji ya mone ompito yokwiithana edhina lyaJehova. — Rom. 10:13, 14.
4. (a) Iilonga yokukonga oyi na okuunganekwa ngiini?(b) Ongiini tamu vulu okukonga aantu mboka haya popi elaka lyeni?
4 Opo aauvithi kaaya longe pomahala pwa longwa nale, olutu lwaakuluntugongalo, unene tuu omuunganeki gwiilonga, oku na okuunganeka nokutonatela iilonga yokukonga. (1 Kor. 9:26) Omumwatate ngoka a pyokoka mongundu ndjoka hayi popi elaka lyoshikwiilongo ota vulu okukwatela komeho, ihe ando na kale omukuluntugongalo nenge omuyakuligongalo ngoka a hogololwa kolutu lwaakuluntugongalo lwegongalo ndyoka mu na ongundu. Omagongalo noongundu odhindji odhi na omulandu omwaanawa gwokukonga, tashi vulika haya longitha embo lyoonomola dhoongodhi nenge ointaneta ya kuthe ko omadhina ngoka haga longithwa kaapopi yelaka ndyoka. Opo nduno ohaya tameke okukonga mokudhengela aantu mboka ongodhi nenge oku ya talela po pomagumbo gawo, opo ya mone kutya oondjukithi dhini ye na okukwatela mo moshitopolwa shoka tashi kala hashi longwa. Ngele otashi opalele, omathimbo gamwe olutu lwaakuluntugongalo otalu vulu okuninga omalongekidho egongalo alihe li kuthe ombinga mokukonga. — Tala okampungu “Nkene to vulu okukonga mboka haya popi elaka lyeni.”
5. (a) Popya omaetopo gamwe ngoka aauvithi taya vulu okulongitha sho taya kongo. (b) Aantu otu na oku ya lombwela shike uuna tatu kongo?
5 Otu na okukala tu na elalakano lya yela ethimbo kehe tatu kutha ombinga miilonga yokukonga. Molwaashoka iilonga mbika oyi li oshitopolwa shuukalele, otu na okuzala ngaashi hatu zala uuna tatu yi muukalele. Oyendji oya mona kutya ngele oya kala tayi idheula omafalomo gawo nokupopya elaka ndyoka sho taya kongo, ohashi ya kwathele ya kale ya nyanyukilwa iilonga mbika nokuhwepopaleka okupopya kwawo elaka ndyoka. Otatu vulu okuyalula ethimbo ndyoka twa longa mokukonga, ihe itatu vulu okuyalula ethimbo ndyoka twa kala tatu longekidha uualita nomisholondondo dhoshitopolwa. Ngele otwa mono omuntu ngoka ha popi elaka ndyoka, natu kambadhale oku mu uvithila onkundana ombwanawa e tatu lombwele omuunganeki gwiilonga nziya nenge gulwe ngoka a tula po, opo uuyelele wu na ko nasha noshitopolwa wu pepalekwe. Shika nashi ningwe nonando omuntu ina ulika ohokwe. Nonando iilonga yokukonga oya simana otu na okukala tu na ondjele, hatu kutha wo ombinga momikalo dhilwe dhuukalele. — Tala okampungu “Shoka wu na okutya uuna to kongo mboka haya popi elaka lyeni.”
6. Omashongo geni hatu kala twa taalela uuna tatu kongo oombolo?
6 Nkene tu na okukonga oombolo: Iilonga yokukonga oombolo ohayi tu etele omashongo omape nohayi pumbwa okulongwa nuudhiginini noneidhidhimiko. Itatu vulu okumona kutya omuntu ngoka ombolo mokutala kedhina lye nenge komutungilo gwolutu lwe nenge koonguwo dhe. Ishewe, yaandjawo nosho wo ookuume ke otashi vulika ya kale ya tila okugandja uuyelele kombinga ye komuuvithi ngoka te wu pula. Omaetopo taga landula kombinga yankene tatu vulu okukonga oombolo otaga vulu okukwathela wo mboka taya kongo mboka haya popi omalaka galwe.
7. (a) Oshike tatu vulu okupula aanegumbo sho tatu kongo oombolo? (b) Opo omunegumbo kee tu hwangale otatu vulu okuninga po shike?
7 Omagongalo noongundu ndhoka hadhi popi Elaka lyOkuudhika odha pondola okumona oombolo sho ya pula momagumbo. Otashi vulika omunegumbo a kale a mona omushiinda, omuniilonga omukwawo nenge omunasikola omukwawo ta popi Elaka lyOkuudhika. Otashi vulika a mona omathano gomoondjila tagu ulike kutya opu na aanona oombolo popepi. Nenge pamwe e na omushiwikile ihaa popi. Kaleka momadhiladhilo kutya otashi vulika aantu ya kale ye ku hwangala sho to ya pula omapulo kombinga yaapopi yelaka ndyoka. Ihe oto vulu okukandula po omaipulo kehe ngoka omunegumbo tashi vulika e na ngele owa yamukula nombili paufupi, paushili nonesimaneko. Yamwe mboka ya li ye na Ombiimbeli nenge oka-DVD ke li puuyelele sho taya pula omunegumbo ngele oku shi omuntu ihaa popi, oya mona iizemo iiwanawa. Ohaye mu lombwele owala kutya oya hala okupopya nomuntu ngoka ombolo kombinga yetegameno ndyoka li li mOmbiimbeli. Ngele omunegumbo ina hala oku ku pa uuyelele, otashi vulika a zimine okutaamba okakalata kondjukithi yoye nenge okafo kehiyo komakugongala getu e ka pe omushiwikile nenge kuume ngoka ombolo.
8. Egongalo lyopuushiinda otali vulu okukwathela ngiini egongalo lyelaka lyokuudhika?
8 Egongalo lyelaka lyokuudhika ohashi vulika li hiye lumwe nenge lwaali momvula egongalo lyopuushiinda ndyoka hali popi elaka li ili li li kwathele mokukonga oombolo mondoolopa nenge moshilando. Elongekidho lyiilonga yomomapya tali ningwa kegongalo lyelaka lyokuudhika otashi vulika li kwatele mo omalombwelo gankene iilonga mbika yi na okulongwa nosho wo euliko. Ongundu yaauvithi kehe otayi vulu okupewa omuuvithi gumwe nenge ye vule po yomegongalo lyelaka lyokuudhika e taya pewa okaalita kehala moka ye na oku ka konga.
9. Ongiini tatu vulu okukonga oombolo mpoka hadhi ningile omainyanyudho nenge mpoka hadhi pewa omayakulo?
9 Oombolo otadhi vulu wo okukongwa pehala mpoka pu shiwike kutya ohapu kala oombolo nenge mpoka hadhi ningile omainyanyudho nenge pomahala mpoka hadhi pewa omayakulo. Aauvithi oye na okuzala oonguwo tadhi opalele pehala mpoka taya ka konga. Otashi ka kala oshiwanawa okupopya nomuntu gumwe nenge yaali pehala lyokupopya nongundu ayihe. Ngele oonkundathana odhe ende nawa, otamu vulu okupaathana oondjukithi.
10. Aauvithi otaya vulu okukonga ngiini oombolo poongeshefa dhomoshitopolwa?
10 Oshinima shimwe tatu vulu okuninga, okulongekidha uualita wu na oondjukithi dhoongeshefa e tatu kala hatu dhi talele po pethimbo tali opalele. Okaalita kamwe otaka vulu okukala ke na oondjukithi dhoongalashe dhomahooli. Okakwawo otaka vulu okukala ke na oongeshefa, ngaashi oovasalaye, omahala gokuyogela oonguwo, oorestolanda, oohotela nenge oongeshefa dhilwe. Ngele okaalita kehe oke na owala oongeshefa dhomaludhi ga faathana, nena aauvithi otaya vulu okumona ontseyo nuunongo wokulonga omahala ngoka. Pashiholelwa, molwaashono oohotela ohadhi yakula oombolo, otatu vulu okupopya nomuyakuli mohotela tu mu lombwele shoka she tu enditha e tatu mu pe ekutu mu na oka-DVD nokafo kehiyo kokugongala kwetu, opo ohotela yi ka pe oombolo ndhoka taya yakula. Pomahala gamwe goongeshefa otatu vulu okupula ngele opu na omuniilonga nenge ookastoma hadhi popi elaka lyokuudhika. Ngele moshitopolwa omu na osikola yoombolo, otatu vulu oku yi pa uu-DVD yontumba ya tule mongulu yawo yomambo.
11. Omolwashike iilonga yokukonga yi li oshitopolwa sha simana shuukalele?
11 Oshilonga sha simana: Oshilonga shokukonga mboka haya popi elaka lyeni kashi shi oshipu nohashi kutha ethimbo. Oshikwawo, momahala gamwe aapopi yomalaka gi ili nogi ili ohaya tembukatembuka, naashika ohashi shi ningi oshidhigu okukaleka uuyelele kombinga yoshitopolwa shokulongwa wa pepalekwa. Ihe nonando ongaaka, momahala ogendji iilonga yokukonga oyi li oshitopolwa sha simana shuukalele. Jehova ngoka e tu pa iilonga mbika yokuuvitha ke na okatongo. (Iil. 10:34) Okwa ‘hala aantu ayehe ya hupithwe noya tseye oshili.’ (1 Tim. 2:3, 4) Onkee ano, natu longele kumwe naJehova nosho wo nooitaali ooyakwetu tu konge aantu yomalaka agehe mboka ye na ‘omwenyo omwaanawa gu na evuliko.’ — Luk. 8:15.
[Oshimpungu pepandja 3]
Natu kwathelathaneni
Ngele egongalo nenge ongundu oya hala yi kale hayi kwathelwa okukonga aantu mboka haya popi elaka lyawo, omuunganeki gwiilonga ota vulu okukwatathana naakuluntugongalo yomegongalo lyopuushiinda ndyoka hali popi elaka lyi ili. Otashi vulika shi kale oshiwanawa okukwatathana owala nomagongalo ngoka ge li popepi nenge ngoka ge li moshitopolwa moka mu na aapopi yelaka lyeni. Egongalo ndyoka tali pulwa nali lombwele aauvithi yalyo kutya ngele oya mono omuntu ngoka ha popi elaka ndyoka naya nyole ondjukithi ye e taye yi pe omuunganeki gwiilonga e ke yi gandje komuunganeki gwiilonga megongalo nenge mongundu ndjoka tayi pula ekwatho. Aaunganeki yiilonga momagongalo ngoka otaya vulu okutula po omukalo omwaanawa ngoka taya vulu okulongitha ya mane ko oshitopolwa shoka shi na aantu yomalaka gi ili nogi ili nokuulukila aantu mboka yu ulika ohokwe komagongalo nokoongundu ndhoka hadhi popi omalaka gawo.
Ngele omuuvithi okwa mono omuntu ngoka ha popi elaka lilwe tu ulike ohokwe lelalela (nenge ombolo), nu udhithe nziya ofooloma yedhina Please Follow Up (S-43) e te yi pe amushanga. Shika otashi ka kwathela omuntu ngoka a pewe ekwatho meendelelo. — Tala km 5/11 ep. 3.
[Oshimpungu pepandja 4]
Nkene to vulu okukonga mboka haya popi elaka lyeni
• Pula aantu yalwe — aakonakonimbiimbeli, aakwanezimo, aalongi pamwe nangoye, nosho nosho.
• Longitha embo lyoonomola dhoongodhi wu konge omadhina ngoka haga longithwa unene melaka ndyoka. Embo lyoonomola dhoongodhi ndyoka li na omusholondondo gwoondjukithi pamwe nomadhina otashi vulika tali monika kointaneta nenge okuza kehangano lyoongodhi.
• Pula pomahala ngoka haga gandja omayakulo kaakwashigwana, ngaashi oongulu dhomambo, oombelewa dhepangelo nookolidji.
• Tala omatseyitho miifokundaneki kombinga yomaipyakidhilo ngoka ga longekidhwa kaapopi yelaka lyoshikwiilongo.
• Inda koositola nokoongeshefa ndhoka hadhi yakula aapopi yelaka lyoshikwiilongo.
• Pula epitikilo wu yale oshitaafula shiileshomwa pongeshefa, pounivesiti nenge pehala lyokulondela oolefa mpoka hapu kala unene aantu mboka haya popi elaka ndyoka.
• Ngele oveta yomoshilongo sheni oye shi pitika, oto vulu okulanda embo lyoondjukithi dhaantu lya longekidhwa koongeshefa dhontumba nenge opolohalama yokokompiuta ndjoka hayi kongo oondjukithi momahala gaayehe gokointaneta.
[Oshimpungu pepandja 5]
Shoka wu na okutya uuna to kongo mboka haya popi elaka lyeni
Ngele otwa yamukula nombili, paushili, itaatu holeke sha, shika otashi ka kwathela omunegumbo kaa kale e tu hwangala. Olundji ohashi kwathele ngele otwe mu ulukile tango oshileshomwa melaka ndyoka.
Konima ngele twe mu popitha otatu vulu okutya: “Otatu kongo aantu mboka haya popi elaka ______ tu popye nayo kombinga yetegameno ndyoka Ombiimbeli tayi tu pe. Mbela owu shi omuntu tatu vulu okupopya naye?”
Uuna to kongo oombolo, oto vulu okutya: “Mu uhala po. Onda hala oku ku ulukila sha. [Mu ulukila ovelise yOmbiimbeli ya za moshileshomwa shomelaka lyokuudhika ko-portable video player nenge kongodhi yoye.] Otu na uuvidio mboka ihaawu futilwa sha, wa nunimwa okukwathela oombolo pambepo. Mbela owu shi ombolo nenge omuntu ihaa uvu ko nawa ha popi elaka lyokuudhika?” Ngele omunegumbo ke shi po omuntu gwontumba, onawa wu mu pule ngele okwa mona oombolo pomahala ngaashi kiilonga, kosikola nenge puushiinda she.