ONKALAMWENYO YOPAKRISTE
Longeleni kumwe sho tamu uvithile miitopolwa moka hamu popiwa omalaka ogendji
Aantu olundji ohaya taamba ko etumwalaka lyUukwaniilwa uuna ye li uvithilwa momalaka gawo. Otashi vulika osho molwaashoka pOpentekoste yomo 33 E.N., Jehova a li e shi ningi tashi wapa, opo ‘Aajuda mboka haya simaneke Kalunga ya za kiilongo ayihe yokombanda yevi’ yu uve onkundana ombwanawa ‘melaka lyoshilongo shaandjawo,’ nonando elaka ndyoka lya li hali popiwa kwaayehe, Oshihebeli nenge Oshigreka. (Iil 2:5, 8) Miitopolwa moka hamu popiwa omalaka ogendji kunena, omagongalo ngoka haga ningi okugongala momalaka gi ili otashi vulika haga uvithile moshitopolwa shimwe. Ongiini aauvithi taya vulu okulongela kumwe, opo ya gandje uunzapo kukehe gumwe nokuyanda okweendulula oshitopolwa, shoka tashi ka ningitha aanegumbo ya kale taya ningilwa nayi?
Kundathaneni (Omayel 15:22): Aatonateli yiilonga naya kundathane yu uvathane kutya ongiini taya vulu okuuvitha onkundana ombwanawa momukalo ngoka tagu opalele omagongalo agehe. Ngele oshitopolwa oshishona, omagongalo gomalaka galwe otashi vulika ga pitilile po omagumbo moka mu na aantu ihaaya popi elaka hali popiwa megongalo lyawo. Ihe ngele ihaga vulu okumana ko oshitopolwa shago, molwaashoka oshinene unene, otaga vulu okupula omakwawo ga longe omagumbo agehe, ihe uuna ga mona mo omuntu u ulika ohokwe, nage ya tseyithile. (od-KY ep. 93, okat. 37) Nenge otaga vulu oku ga pula ge ga kwathele okukonga aantu mboka haya popi omalaka ngoka haga popiwa momagongalo gawo e tage ya tumine oondjukithi dhawo. (km 1/13 ep. 3, oshimpungu) Dhimbulukweni kutya poompito dhimwe, megumbo limwe otashi vulika mu kale hamu popiwa omalaka ogendji. Omalongekidho kehe taga ningwa gokuuvithila moshitopolwa shoka, naga kale metsokumwe noompango dhomoshilongo ndhoka tadhi indike okupula omauyelele gaakwashigwana inaashi pumbiwa.
Longeleni kumwe (Ef 4:16): Landuleni omalombwelo ngoka tamu pewa komutonateli gwiilonga. Mbela oho konakona nomuntu ngoka ha popi elaka ndyoka ihaali popiwa megongalo lyeni? Otashi vulika omukonakoni a hume komeho nziya ngele owe mu gandja po kegongalo lyopopepi nenge kongundu ndjoka hayi popi elaka lye.
Ilongekidha (Omayel 15:28; 16:1): Ngele omunegumbo oha popi elaka lilwe, kambadhala oku mu uvithila onkundana ombwanawa. Oto vulu okwiilongekidha mokutseya kutya omalaka geni haga popiwa kaantu moshitopolwa sheni nokutapela Oombiimbeli dhomalaka gawo nuuvidio moshikwaelektronika shoye. Oto vulu wo okulongitha o-JW Language, opo wi ilonge okupopitha aantu momalaka galwe.