‘Kaleni nombili naantu ayehe’
1. Omayele gopaMbiimbeli geni tatu vulu okulandula ngele otwa tsakaneke omunegumbo ngoka e tu uvitile uudhigu?
1 Oshigwana shaJehova oshi hole ombili, niilonga yetu yuukalele oyombili. (Jes. 52:7) Nonando ongawo, omathimbo gamwe ohatu tsakaneke aantu mboka yu uvite uudhigu sho tatu talele po omagumbo gawo. Moonkalo dha tya ngawo, oshike tashi ke tu kwathela tu kale tu na ombili? — Rom. 12:18.
2. Omolwashike sha simana okuuva ko oonkalo dhaantu?
2 Uva ko oonkalo dhaantu: Nonando yamwe ohaya kala ya geya molwaashono kaaye hole oshili, yalwe otashi vulika tu adhe yu uvithwa nale nayi koshinima shilwe. Tashi vulika twe ya pethimbo lya puka. Omunegumbo otashi vulika e na uupyakadhi wontumba wopaumwene. Nonando onkundana ombwanawa oyo ye mu geyitha, natu kale tu shi shi kutya otashi vulika ti inyenge ngaaka shaashi a pukithwa. (2 Kor. 4:4) Ngele otu uvu ko oonkalo dhaantu, otashi ke tu kwathela tu kale twa ngungumana, molwaashoka otu shi shi kutya hatse a geela. — Omayel. 19:11.
3. Ongiini tatu vulu okuulukila omunegumbo esimaneko?
3 Ulika esimaneko: Oyendji moshitopolwa oya dhama momaitaalo gawo. (2 Kor. 10:4) Oye na uuthemba okuhogolola ngele oya hala okupulakena nenge inaya hala. Katu na nando okudhina omunegumbo nenge tu mu ninge a kale u uvite kutya ke na sho e shi shaashi ando tu shi Ombiimbeli tu mu vule. Ngele okwe tu pula tu ze po pegumbo lye, natu shi ninge nombili.
4. Oshike sha kwatelwa mokupopya oohapu oombwanawa?
4 Popya oohapu oombwanawa: Nonando otu ulwe nayi, otu na okuyamukula noohapu tadhi talaleke noombwanawa. (Kol. 4:6; 1 Pet. 2:23) Pehala lyokunyenyeta nomunegumbo, kambadhala okupopya kombinga yiinima mbyoka tamu tsu kumwe naye. Pamwe otatu vulu okupula kutya omolwashike inaa taamba ko shoka tatu popi. Nokuli ethimbo limwe otashi ka kala oshiwanawa waa tsikile noonkundathana, opo waahe mu uvithe nayi. — Omayel. 9:7; 17:14.
5. Uuwanawa wuni hawu zi mokukala tu na ombili naantu muukalele?
5 Ngele otu na ombili nomunegumbo, otashi vulika e shi koneke e tashi mu ningitha a pulakene oshikando shilwe uuna tu uvithilwa. (Rom. 12:20, 21) Nonando ote tu pataneke a mana mo, otashi vulika a ka ninge omumwatate esiku limwe. (Gal. 1:13, 14) Kutya nduno ina ka taamba oshili, otatu ka simanekitha Jehova nosho wo elongo lyetu ndyoka tali popi Kalunga, ngele otwi idhidhimike nokukala nombili naye. — 2 Kor. 6:3.