Okafo Onkundana yUukwaniilwa onomola 38 otaka ka gandjwa muNovomba
1. Aantu ohayi ipula omapulo geni shi na ko nasha noonakusa, nomapulo ngono otaga ka yamukulwa ngiini muNovomba?
1 Eso oli li omutondi gwaantu ayehe, noihali yoolola kutya omuntu oku li meitaalo lini. (1 Kor. 15:26) Aantu oyendji ohayi ipula kutya oonakusa oye li peni nosho wo ngele onaye ke ya mone we ngaa. Onkee ano, omagongalo agehe kongonga yevi otaga ka kutha ombinga moshikonga shuule womwedhi taga andjaganeka okafo Onkundana yUukwaniilwa onomola 38, ke na oshipalanyolo: “Mbela oonakusa otaya ka yumuka ngaa ya kale nomwenyo?” Oshikonga shika shi ikalekelwa otashi ka tameka mesiku 1 lyaNovomba. Konima yoshikonga, okafo Onkundana yUukwaniilwa onomola 38, otaka ka kala nokulongithwa muukalele ngaashi uufo uukwawo.
2. Okafo Onkundana yUukwaniilwa onomola 38 okatya ngiini noshikalimo shako oshini?
2 Nkene katya noshikalimo shako: Oshipu okutonya okafo Onkundana yUukwaniilwa onomola 38, opo oshipalanyolo shako shi kale shu ukililathana noohapu ndhoka dhi li pevi lyako tadhi ti: Oto yamukula ngiini uuna wa pulwa epulo ndyoka. Mbela oto ka tya eeno? Nenge oto ka tya aawe? Nenge oto ka tya ngiika ngaa?” Uuna omuleshi a tala oshikalimo shokafo Onkundana yUukwaniilwa, ota ka mona nkene Ombiimbeli tayi yamukula epulo ndyoka li li oshipalanyolo naashoka omauvaneko gayo taga ti kuye. Ota ka mona wo omatompelo kutya omolwashike e na okwiitaala Ombiimbeli. Kombinga okwawo yokafo Onkundana yUukwaniilwa oku na epulo ehokithi ndyoka tali kwathele omuleshi a dhiladhile kombinga yOmbiimbeli nokukala a hala okwiilonga oshindji.
3. Okafo Onkundana yUukwaniilwa onomola 38 otaka ka gandjwa ngiini?
3 Nkene ke na okugandjwa: Oshikonga shika oshi na okuningwa sha fa owala oshikonga shokugandja okafo kokuhiya aantu kEdhimbuluko nosho wo koshigongi shoshitopolwa. Aakuluntugongalo otaya ka gandja omalombwelo kegongalo nkene li na okulonga, opo li maneko oshitopolwa shalyo. Omalombwelo ngoka otaga ka kala ge li metsokumwe nontumwafo yesiku 1 Apilili 2013 ndjoka ya li ya tuminwa aakuluntugongalo. Omagongalo ngoka ge na iitopolwa iishona otaga vulu okukwathela omagongalo gopopepi ngoka ge na iitopolwa iinene. Uuna to kutha uufo, kutha owala mboka to vulu okugandja muule woshiwike shimwe. Pethimbo lyoshikonga uufo otawu vulu okugandjwa muukalele womontaneho ngele omagumbo agehe moshitopolwa sheni omwe ga mana ko. Ngele omwe wu mana po manga omwedhi inaagu sa gandjeni iileshomwa. MOlyomokaya yotango yaNovomba otatu ka gandja eitulomo koshikonga shoka shi ikalekelwa, pehala lyokutameka omakonakonombiimbeli ngaashi shito. Momahuliloshiwike otatu vulu okugandja iifo mpoka tashi opalele. Mbela oto ningi ngaa omalongekidho opo wu ka kuthe ombinga moshikonga shika shi ikalekelwa?