Nkene tatu vulu okuhwepopaleka uunkulungu wetu muukalele —  Okunyola mboka yu ulika ohokwe

“Itonatela ano mwene nosho wo elongo lyoye.” (1 Tim. 4:16) Omayele ngaka omuyapostoli Paulus a nyolele Timoteus otagu ulike kutya atuhe, kutya nduno aape nenge otwa pyokoka, otwa pumbwa okulonga nuudhiginini tu hwepopale miilonga yokuuvitha. Opo tu shi ninge, mUukalele Wetu wUukwaniilwa otamu ka kala oshitopolwa oshipe shi na oshipalanyolo “Nkene tatu vulu okuhwepopaleka uunkulungu wetu muukalele.” Oshitopolwa kehe otashi ka kundathana kombinga yomaetopo gontumba ga simana nankene tatu vulu oku ga tula miilonga. Ayehe otaya ladhipikwa ya tule miilonga omaetopo ngoka momukokomoko gwomwedhi ngoka. Momwedhi gwa landula ko, pOkugongala kwoPailonga otapu ka kundathanwa oshitopolwa moka kehe gumwe e na ompito yokuhokolola nkene e shi enditha. Omwedhi nguka otatu ladhipikwa tu nyole mboka yu ulika ohokwe.

Omolwashike sha simana oku shi ninga: Opo tu gwanithe po oshilonga shoka twa pewa, otwa pumbwa okuninga oshindji shi vulithe owala okuuvitha. Otwa pumbwa okushuna kwaamboka yu ulika ohokwe, tu ya longe tse tu tekele ombuto yoshili ndjoka twa kuna. (Mat. 28:19, 20; 1 Kor. 3:6-9) Shika otashi pula tu shune ko komuntu ngoka tu popye naye kombinga yaashoka ti ipula nasho nokutsikila ko kwaashoka twa kundathanene naye. Onkee ano, ngele otwa tsakaneke gumwe tu ulike ohokwe, osha simana tu mu nyole membo lyetu.