Jehova okwa tala ndje ko ngiini?
1. Ombiimbeli oya fa esipili meityo lini?
1 Olungapi ho italele mesipili? Oyendji yomutse ohatu italele mo esiku kehe. Oku shi ninga ohaku tu kwathele tu mone mpoka twa pumbwa tu ininge nawa kolutu. Ombiimbeli oya fa esipili. Oku yi lesha esiku kehe, otaku tu kwathele tu mone shoka Jehova ha kala e wete momitima dhetu. (1 Sam. 16:7; Jak. 1:22-24) Oohapu dhaKalunga “otadhi holola puuyelele omahalo nomadhiladhilo gomomitima dhaantu.” (Heb. 4:12) Oku dhi lesha esiku kehe nokutedhatedha kudho, otashi tu kwathele ngiini tu mone iinima mbyoka twa pumbwa okuhwepopaleka tu kale aauvithi yevaangeli ya pyokoka? — Eps. 1:1-3.
2. Ombiimbeli otayi vulu ngiini oku tu kwathela tu ikonakone paumwene?
2 Ombiimbeli nayi kale ya fa esipili lyoye: Omahokololo ngoka ge li mOmbiimbeli taga popi kombinga yaapiya yaJehova aadhiginini otage tu longo omaukwatya ngoka ha hokwa. Pashiholelwa, David okwa li u ulike kutya edhina lyaKalunga oli na oonkondo. (1 Sam. 17:45, 46) Jesaja okwa li i iyamba u uvithe nuulaadhi miitopolwa moka mu na aantu ye na omitse omikukutu. (Jes. 6:8, 9) Jesus okwa li a tala ko uukalele wu li iikulya ye nohawu mu etele enyanyu. Ohole onene yokuhola He gwomegulu oyo ya li ye mu inyengitha. (Joh. 4:34) Aakriste mboka ya li ko omimvo 2000 nasha dha ka pita oya li aauvithi aalaadhi. Oya li yi inekela muJehova, noya li ya tokola yu uvithe kutya nduno otashi pula shike. (Iil. 5:41, 42; 2 Kor. 4:1; 2 Tim. 4:17) Okutedhatedha kiiholelwa yawo otashi ke tu kwathela tu itale nawa tse yene nelalakano tu hwepopaleke ongushu yiilonga yetu iiyapuki.
3. Omolwashike kaatu na okukwatakwata ngele tashi ya pokuninga omalunduluko?
3 Opaleka omapuko ngoka to mono: Itashi kwatha sha nando okwiitalela mesipili e to ipwililikile omapuko ngoka wu wete. Otatu vulu okupula Jehova e tu kwathele tu mone uukwatya wetu womeni notu ninge omalunduluko mpoka sha pumbiwa. (Eps. 139:23, 24; Luk. 11:13) Ethimbo ndyoka lya hupa ko efupi noonkondo, dho oomwenyo odhi li moshiponga. Onkee ano, katu na okukwatakwata mokuninga omalunduluko mpoka sha pumbiwa, molwaashoka iikwatakwata ohayi nika edhilo. — 1 Kor. 7:29; 1 Tim. 4:16.
4. Oshike tashi ka ningilwa omuntu ngoka hi italele mompango yaKalunga e to opaleke omapuko ge?
4 Shoka sha simana kuJehova uukwatya wetu womeni, ihe ha holoko po lyetu lyokombanda. (1 Pet. 3:3, 4) Oshike hashi ningilwa omuntu ngoka hi italele mompango yaKalunga, ye to opaleke omapuko ngoka ta mono? Omuntu ngoka ite ke “yi dhimbwa, ihe ote yi gwanitha, oye ota yambekwa moku shi ninga.” (Jak. 1:25) Odhoshili kutya otatu ka kala twa nyanyukwa notatu ka kala aakalele haya pondola momapya, sho tatu “monikila eadhimo lyOmuwa.” — 2 Kor. 3:18.