Longitha o-jw.org muukalele woye

Epandja lyetu lyokOintaneta oli li oshilongitho sha simana shoku tu kwathela tu taandelithe onkundana ombwanawa ‘miilongo ayihe yokombanda yevi.’ (Iil. 1:8) Aanegumbo oyendji ihaya mono o-jw.org kuyo yene. Pehala lyaashono, ohaye yi tseya owala ngele ye yi ulukilwa komuuvithi. Onkee ano, manga inoo longitha ongodhi yoye muukalele tala ngele oshi li nawa oku shi ninga pehala mpoka shi na ko nasha negameno. Aluhe kala wa kotoka pomahala ngoka ge na omuyonena gu li pombanda. Ngele ku na ongodhi yopeke, oto vulu okupula omunegumbo momukalo omwaanawa ngele oto vulu oku mu ulukila o-jw.org kongodhi ye mwene.

Omutonateli omweendi gumwe oku na mongodhi ye okavidio Omolwashike wa pumbwa okukonakona Ombiimbeli? nohe ka ulukile aantu pompito kehe ta mono. Pashiholelwa, uuna ta yi miilonga yegumbo negumbo, oha ti: “Otandi ningi etalelopo paufupi ndi kwathele aantu ya mone omayamukulo gomapulo gatatu ga simana: Omolwashike uuyuni wu udha uupyakadhi? Ongiini Kalunga te ke wu kandula po? Nongiini tatu vulu okuungaunga nawo methimbo ndino? Okavidio haka okafupi otaka yamukula omapulo ngaka.” Opo nduno ohe ka dhana nokutala kutya omunegumbo oti inyenge ngiini. Okavidio okahokithi noonkondo naantu oyendji ihaya gamuna ko omeho gawo sigo ka pu. Nokonima omutonateli omweendi oha ti: “Owu uvu kutya oto vulu okupula ekonakonombiimbeli kOintaneta. Molwaashoka ondi li nale mpano, otandi ku ulukile ngashingeyi paufupi.” Ngele omunegumbo a zimine, ohe mu ulikile kutya ekonakono ohali ningwa ngiini ta longitha okabroshure Onkundana Ombwanawa. Ngele omunegumbo ke na ethimbo, oha ningi omalongekidho e shi ninge petalelopo tali landula. Ngele a yi pokafudhopo kokasitola kokoothiwa, oha popi sha faathana kugumwe ngoka a kuutumba pamwe naye konima ngele ya tameke oonkundathana dhuukuume. Mbela oho longitha ngaa o-jw.org muukalele woye?