Pethimbo lyoomwedhi dhEdhimbuluko, oto ka holela ngaa uulaadhi waJehova naJesus?
1. Oonzapo dhaJehova ohadhi ningi oonkambadhala dhi ikalekelwa dhi ninge shike pethimbo lyoomwedhi dhEdhimbuluko?
1 Jehova oha gwanitha elalakano lye nuulaadhi. Mokuulika komalaleko nuuyamba gamwe gUukwaniilwa waKalunga, Jesaja 9:7 ota ti: “Uulaadhi wOmuwa [“Jehova,” NW] Omunankondoawike otau shi ningi.” Sha faathana, pethimbo lyuukalele we kombanda yevi, Omwana gwaKalunga okwa li u ulike uulaadhi wa dhenga mbanda welongelokalunga lyashili. (Joh. 2:13-17; 4:34) Omumvo kehe pethimbo lyoomwedhi dhEdhimbuluko, aauvithi omamiliyona muuyuni awuhe ohaya ningi oonkambadhala dhi ikalekelwa ya holele uulaadhi waJehova naJesus mokutamununa mo iilonga yawo muukalele. Oto ka kala ngaa gumwe gwomuyo?
2. Uulaadhi otawu ke tu inyengitha tu ninge shike okuza mu-7 gaMaalitsa?
2 Oshikonga shEdhimbuluko: Oshikonga shonuumvo shokuhiya aantu kEdhimbuluko otashi ka tameka mOlyomakaya, mu-7 gaMaalitsa. Unganeka ngashingeyi wu ka longe nuulaadhi muukalele. Omagongalo otaga ka kala ga tuntukwa noonkondo sho taga hiya aantu oyendji ngaashi tashi vulika miitopolwa yago. Ninga oonkambadhala dha mana mo wu hiye aakonakonimbiimbeli yoye, omaishunoko, aaniilonga pamwe nangoye, aakwanezimo yoye naanasikola ooyakweni moku ya pa ehiyo nenge mokulongitha o-jw.org.
3. Ongiini tatu vulu okutamununa mo uukalele wetu muMaalitsa naApilili?
3 Uukwathelikokolindjila: Uulaadhi otawu ke tu inyengitha tu tamunune mo uukalele wetu. Nopwaahe na omalimbililo oyendji otaya ka vula okukutha uukwathelikokolindjila muMaalitsa naApilili, molwaashoka otatu ka vula okuhogolola ngele otwa hala okulonga oowili 30. Pelongelokalunga lyeni lyuukwanegumbo nenge pekonakono lyopaumwene, dhiladhila pamwe negalikano kunkene to vulu oku shi ninga. (Omayel. 15:22) Okulonga kwoye nuulaadhi moshikonga otaku vulu okunwetha mo yalwe ya longe wo nuulaadhi. Ngele owa ningi omalunduluko paumwene opo wu ninge oshindji muukalele, oto ka holela uulaadhi waJesus. — Mark. 6:31-34.
4. Ondjambi yini hatu mono sho tatu holele uulaadhi waJehova naJesus?
4 Okuholela uulaadhi waJehova naJesus pethimbo lyoomwedhi dhEdhimbuluko otaku ke tu etela omalaleko nuuyamba. Oyendji moshitopolwa otaya ka mona uunzapo. Otatu ka mona enyanyu negwaneno ndyoka hali zi mokulongela Jehova nomoku pa yalwe. (Iil. 20:35) Shoka sha simanenena, otatu ka nyanyudha Kalunga ketu omulaadhi nosho wo Omwana.