Nkene tu na okulongitha iikwamawi yetu
1. Kakele kiinima mbyoka ya nyolwa, oshike ishewe tu na tashi vulu oku tu kwathela?
1 Aantu oyendji oye hole okulongitha epandja lyetu lyokointaneta, jw.org, ya leshe oohapu dhaKalunga dho opala nodhoshili. (Omuuv. 12:10) Mbela owa longitha ngaa nale iikwamawi yehangano lyetu? Shika ohashi shi ningitha oshipu okupulakena kuuyelele owundji mboka wu li kepandja lyetu. Ongiini tatu vulu okumona uuwanawa miinima mbyoka yi li molupe lwomawi?
2. Ongiini tatu vulu okulongitha iikwamawi sho tatu konakona paumwene nenge nuukwanegumbo wetu?
2 Iikwamawi otse ya nuninwa sho tatu konakona paumwene nenge nuukwanegumbo wetu: Okupulakena kiinima mbyoka ya kwatwa momawi ngaashi Ombiimbeli, iifo nenge iileshomwa yilwe uuna tu li momalweendo nenge twi ipyakidhila niilonga yetu yesiku kehe, otashi ke tu kwathela tu longithe ethimbo lyetu nawa. (Ef. 5:15, 16) Otatu vulu okupulakena kiinima yi ili noyi ili pelongelokalunga lyetu lyuukwanegumbo. Sho tatu pulakene natu landule wo miileshomwa yetu. Okulongitha iikwamawi pethimbo lyekonakono lyopaumwene, oshi li lela ekwatho uuna wa hala okuhwepopaleka okulesha kwoye, nenge to ilongo elaka lilwe.
3. Oolye moshitopolwa shetu taya vulu okumona uuwanawa mokupulakena kiikwamawi yetu?
3 Muukalele: Aantu mboka haya kala yi ipyakidhila noonkondo noihaya mono ethimbo lyokulesha, otashi vulika ya kale ya hala okupulakena kiinima mbyoka ya kwatwa momawi. Nenge otashi vulika tu tsakaneke omuntu ngoka ihaa popi elaka lyetu nokwa hala okuuva oshindji kombinga yetumwalaka lyOmbiimbeli ‘melaka lyoshilongo shaandjawo.’ (Iil. 2:6-8) Aantu momaputuko gamwe oye hole okupalakena omahokololo. Pashiholelwa, aagundjuka yomuhoko gwAahmong ohaya hokololelwa ondjokonona yawo nohaya dhimbulukwa nawa uuyelele mboka yu uva. Aantu yomaputuko ogendji muAfrika lyomutenya, oye hole okwiilonga iinima mokupulakena komahokololo.
4. Omapulo geni tu na okwiipula sho tatu kwathele aantu moshitopolwa shetu?
4 Moshitopolwa sheni, mbela oshi li ngaa nawa okupa omunegumbo a pulakene kiinima mbyoka ya kwatwa momawi melaka lye? Ngele owa tumine omuntu oshinima molupe lwiikwamawi noe-mail mbela ota ka mona mo ngaa uuwanawa washa? Mbela itatu vulu okutapela moka-CD oshileshomwa shontumba shoka shi li molupe lwewi noku shi gandja komunegumbo ngoka u ulika ohokwe pamwe noshileshomwa shoshene? Uuna wa tumine omuntu iileshomwa mbyoka hatu gandja muukalele ngaashi: omambo, uumbo, iifo nenge uufo noshikwaelektronika owu na oku yi yalula. Iinima mbyoka yi li molupe lwomawi oya longekidhwa nelalakano tu yi longithe pethimbo lyekonakono lyopaumwene. Oya longekidhwa wo yi tu kwathele sho tatu kunu oombuto dhoshili yUukwaniilwa. — 1 Kor. 3:6.