NKENE TO VULU OKUYANDA UUTONDWE

1 | Ino kala nokatongo

Shoka Ombiimbeli tayi ti:

“Nena Petrus okwa tameke ihe okupopya ta ti: ‘Ngame ngashingeyi onde shi tseya kutya Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.’” — IILONGA 10:34, 35.

Shoka tatu ilongo menyolo ndika:

Jehovaa Kalunga ihe tu pangula shi ikolelela keholokopo lyetu, komuhoko gwetu, koshipa shetu nenge keputuko lyetu. Pehala lyaashono, oha gandja eitulomo kwaashoka sha simana lela, ano kuuntu wetu womeni. Ombiimbeli otayi ti wo kutya “omuntu oha tala kombanda, ihe ngame [Jehova] ondi wete momutima.” — 1 Samuel 16:7.

Shoka to vulu okuninga:

Nonando ihatu vulu okulesha omitima dhaantu, otatu vulu okuholela Kalunga mokukala ihatu tongola aantu. Kambadhala okutala ko aantu pauhandimwe, pehala lyoku ya tala ko ye li ongundu. Ngele owa mono kutya owu na etaloko ewinayi li na ko nasha nayalwe, tashi vulika molwaashoka yomuhoko gulwe nenge yokoshilongo shilwe, galikana Kalunga e ku kwathele wu li vudhe mo. (Episalomi 139:23, 24) Ngele owa galikana kuJehova nomutima aguhe e ku kwathele kuu kale wu na okatongo, oto vulu okukala nuushili kutya ota ka pulakena kegalikano lyoye note ke ku kwathela. — 1 Petrus 3:12.

a Jehova edhina lyaKalunga. — Eksodus 15:3, OB-1954.

TITUS ota ti: “Kandi na esiku nda kuutumbile nombili nomutiligane. Onda li lela ndi uvite ndi li oshitopolwa shuumwayinathana shomuuyuni awuhe.”

Iinima ya ningwa shili—TITUS

Okwe etha po uutondwe

Molwaashoka Titus okwa li a geya nayi omolwoompango ndhoka dha li dha tulilwa po aaluudhe kaatiligane, okwa tokola a ninge gumwe gwomwaamboka ya li haya longo iikulumuna. Okwa ti: “Otwa li hatu yi komahala ngoka ge li mondoolopa, ngaashi koohotela nokomahala gomanwino hoka kwa li inaaku pitikilwa aaluudhe, opo tu ka hinde aatiligane.” Titus ota ti kutya okwa li e na uutondwe noonkondo naashika oshe mu ningitha a kale omugeyentu. Okwa gwedha ko a ti: “Ngele onda tamanana nomuntu, kutya nduno omulumentu nenge omukiintu, ongaye nda li handi tameke olugodhi tango.”

Titus okwa tameke okuninga omalunduluko sho a tameke okukonakona Ombiimbeli nOonzapo dhaJehova. Sho a lesha Ombiimbeli, oshe mu gumu noonkondo. Euvaneko ndyoka tali ti kutya ‘itaku ka kala we eso, oluhodhi, elilo nenge uuwehame,’ olyo lya li lye mu gumu unene. — Ehololo 21:3, 4.

Petameko, osha li oshidhigu kuye okweetha po uutondwe. Ota ti: “Osha li oshidhigu lela kungaye okulundulula okudhiladhila kwandje neihumbato lyandje.” Ihe shoka i ilongo mIilonga 10:34, 35 kutya Kalunga ke na okatongo, osha li she mu kwathele.

Oshizemo? Ota ti: “Sho nda mono ohole ndjoka Oonzapo dhaJehova hadhi ulukilathana mokati kadho, nonando odhomomihoko dha yoolokathana, onda li nda tompwa kutya ndika olyo elongelokalunga lyashili. Nokuli nomanga inaandi ninginithwa, omumwatate gumwe omutiligane gwomegongalo lyetu okwa li a hiya ndje tu ka lye pamwe naye kegumbo lye. Kanda li tandi shi itaale. Kandi na esiku nda kuutumbile nombili nomutiligane, tatu li pamwe megumbo lye. Onda li lela ndi uvite ndi li oshitopolwa shuumwayinathana shomuuyuni awuhe.”