Omapulo Ga Za Kaaleshi

Oshitopolwa, “Edhina lyoye nali yapulwe,” mOshungolangelo yaJuni 2020 otashi yelitha ngiini eitaalo lyetu li na ko nasha nedhina lyaJehova nosho wo uunamapangelo we?

Moshitopolwa shika, otwa ilonga kutya oku na owala ompata yimwe ayike ya simana ndjoka iishitwa ayihe iinandunge ya taalela, ano okuyapulithwa kwedhina enene lyaJehova. Ompata ndjoka yi na ko nasha nuunamapangelo, otayi holola kutya omukalo gwaJehova gwokupangela ogo dhingi ngele tashi ya pokuyapulitha edhina lye. Sha faathana, ompata yi na ko nasha nuudhiginini womuntu oya kwatela mo okuyapulitha edhina enene lyaJehova.

Omolwashike ngashingeyi tatu tsu omuthindo kutya ompata ndjoka onene oyi na ko nasha nedhina lyaJehova noku li yapulitha? Natu ka taleni omatompelo gatatu.

Lyotango, Satana okwa li a nyateke edhina lyaJehova moshikunino shaEden. Epulo ndyoka Satana a li a pula Eva otali ulike kutya Jehova oKalunga omuluya nonokutya omalombwelo ngoka a li a tulile po Adam naEva kaga li pauyuuki. Opo nduno Satana okwa li a popi shi li ompinge naashoka Jehova a popi, nokungawo okwa ti kutya Jehova omufundja. Shimwe ishewe, okwa nyateke edhina lyaJehova. Okwa ningi “omuhindadhi,” shoka tashi ti “omulundili.” (Joh. 8:44) Molwaashoka Eva okwa li a itaale iifundja yaSatana, ka li a vulika kuKalunga, shoka tashi ulike kutya ka li a hala okupangelwa kuJehova. (Gen. 3:1-6) Sigo okunena, Satana ota tsikile okulundila Jehova nota taandelitha iifundja kombinga ye. Mboka haya itaale iifundja mbyoka ihaya vulika kuJehova. Ano kaapiya yaJehova, okupopya iifundja kombinga yedhina lyaJehova eyapuki kashi li pauyuuki. Shoka osho sha etitha uupyakadhi awuhe mboka nosho wo uukolokoshi muuyuni.

Oshitiyali, opo eshito alihe li mone mo uuwanawa, Jehova okwa tokola toko okuyukipalitha edhina lye noku li yeleka kondhino ayihe ndjoka. Shoka osho sha simanenena kuJehova. Okwa ti: ‘Otandi ka ulukila iigwana uuyapuki wedhina lyandje enene.’ (Hes. 36:23). Jesus okwe shi yelitha kutya oshike shi na okukala sha simanenena momagalikano gaapiya yaJehova ayehe aadhiginini, sho a ti: “Edhina lyoye nali yapulwe.” (Mat. 6:9) Ombiimbeli oya popya lwiikando esimano lyokusimaneka edhina lyaJehova. Natu taleni kiiholelwa yimwepo: “Hambeleleni edhina lyOmuwa lyeadhimo.” (1 Ondjal. 16:29; Eps. 96:8) “Tangeni esimano lyedhina lye.” (Eps. 66:2) “Otandi ka hokolola uunene woye sigo aluhe.” (Eps. 86:12) Oshikando shimwe sho Jehova li a popi ye mwene okuza megulu, osha li sha ningwa motempeli muJerusalem, sho Jesus a galikana a ti: “Tate, simanekitha edhina lyoye.” Jehova okwa yamukula a ti: “Onde li simanekitha notandi li simanekitha natango.”—Joh. 12:28.a

Oshititatu, Elalakano lyaJehova aluhe oli na ko nasha nedhina lye. Natu ka kundathaneni kutya oshike tashi ka ningwa po konima yemakelo lyahugunina pehulilo lyElelo lyOomvula Eyuvi lyaKristus. Mbela iishitwa iinandunge otayi ka tsikila okukala ya topagulwa kompata onene yi na ko nasha nedhina lyaJehova? Opo tu yamukule epulo ndyoka, natu dhimbulukweni iinima iyali mbyoka ye li pamba, ano uudhiginini waantu nosho wo uunamapangelo weshito alihe. Mbela aantu otaya ka taalela eshongo lyokutsikila okukala aadhiginini? Aawe. Otaya ka kala ya gwanenena, oshoka oya pita nale memakelo lyahugunina. Otaya ka mona omwenyo gwaaluhe. Mbela uunamapangelo weshito alihe nenge etopoko otayi ka kala nokukundathanwa aluhe mokati kiishitwa iinandunge? Aawe. Omukalo gwaJehova gwokupangela pauyuuki nogwa dhengambanda otagu ka taambwa ko kwaayehe. Ihe ongiini shi na ko nasha nedhina lyaJehova?

Pethimbo ndyono kehe gumwe ota ka tseya oshili kombinga yaJehova, edhina Lye otali ka simanekwa notali ka yapulwa. Nonando ongawo, edhina lyaJehova otali ka tsikila okukala lya simanenena kaapiya ye ayehe. Omolwashike mbela? Omolwaashoka otaya ka mona nkene Jehova ta tsikile okuninga iinima iikumithi. Natu taleni kutya molwashoka Jesus ota ka shunitha neifupipiko epangelo kuJehova, Kalunga “ota ka ninga oye awike omupangeli gwaayihe.” (1 Kor. 15:28) Konima yaashono, aantu kombanda yevi otaya ka kala ya nyanyukilwa ‘emanguluko nomeadhimo lyaana yaKalunga.’ (Rom. 8:21) Jehova ota ka gwanitha po thiluthilu elalakano lye, lyokuhanganitha iishitwa ayihe yomegulu noyokombanda yevi, yi kale uukwanegumbo wa hangana.—Ef. 1:10.

Konima ngele iinima ayihe mbyoka ya ningwa, uukwanegumbo waJehova womegulu nowokombanda yevi otawu ka kala wu uvite ngiini? Odhoshili kutya otatu ka kala tu na lela ehalo okutanga edhina lyaJehova. Omupisalomi David okwa nwethwa mo a nyole ta ti: “Esimano nali ninge lyOmuwa, Kalunga . . . Esimano nali ninge lyedhina lye sigo aluhe!” (Eps. 72:18, 19) Otatu ka tsikila okukala tu na omatompelo omape nomawanawa goku shi ninga.

Edhina lyaJehova oli lile po kehe shimwe tashi popi kombinga ye. Uuna tatu dhiladhila kombinga yedhina lyaJehova, ohashi tu dhimbulukitha ohole ye. (1 Joh. 4:8) Otatu ka dhimbulukwa aluhe ohole ndjoka Jehova e tu ulukila sho e tu shiti, sho e tu pe ekuliloyambo notatu ka dhimbulukwa kutya omukalo gwe gwokupangela ogwopauyuuki nogwopahole. Ihe otatu ka tsikila okukala tu uvite kutya Jehova oku tu hole sigo aluhe. Otatu ka hedha aluhe popepi naTate yetu gwomegulu, noku mu imbila omahambelelondjimbo omolwedhina lye lya simana.—Eps. 73:28.