OSHITOPOLWA SHOKUKONAKONWA 23
EIMBILO 2 Edhina lyoye oJehova
Edhina lyaJehova otali ti shike kutse?
“One oombangi dhandje.” — JES. 43:10. NW
SHOKA TATU KA ILONGA
Otatu ka ilonga nkene tatu vulu okudhana onkandangala mokuyapulitha nokuyukipalitha edhina lyaJehova.
1-2. Otu shi shi ngiini kutya edhina lyaJehova olya simana kuJesus?
KAPU NA shoka sha simana kuJesus shi vulithe edhina lyaJehova. Oye awike a ninga oshindji a tseyithe edhina lyaHe. Ngaashi twa ilonga moshitopolwa sha zi ko, Jesus okwa li e na ehalo lyokusa omolwedhina lyaJehova naashoka lya kwatela mo. (Mark. 14:36; Heb. 10:7-9) Nokonima yEpangelo lyOmimvo Eyuvi, Jesus ota ka kala e na ehalo lyokugandja oonkondopangelo adhihe kuHe, opo a yapulithe edhina lyaJehova. (1 Kor. 15:26-28) Ohole yaJesus yokuhola edhina lyaKalunga, otayi holola wo oshindji kombinga yekwatathano lye naHe. Otayi ulike kutya kapu na omalimbililo kutya Jesus okuhole mwene gwedhina ndyoka.
2 Jesus okwa li e ya kombanda yevi omolwedhina lyaHe. (Joh. 5:43; 12:13) Okwa li a tseyithile aalanduli ye edhina lyaHe. (Joh. 17:6, 26) Nokuli Jesus okwa li a pula Jehova a tonatele aalongwa ye ‘omolwedhina Lye.’ (Joh. 17:11) Onkee ano ngele Jesus osho a li e uvitile ngawo edhina lyaJehova, ongiini gumwe ta vulu okutya ye omulanduli gwaKristus gwashili, ngele ke shi noiha longitha edhina lyaHe?
3. Oshike tatu ka kundathana moshitopolwa shika?
3 Tu li Aakriste mboka haya kambadhala okulandula oshiholelwa shaJesus, otwa simaneka edhina lyaHe. (1 Pet. 2:21) Moshitopolwa shika, otatu ka tala nkene edhina lyaJehova hali ndhindhilikitha mo mboka haya uvitha ‘onkundana ombwanawa yUukwaniilwa’. (Mat. 24:14) Otatu ka tala wo nkene edhina lyaJehova lya simana kukehe gumwe gwomutse.
“AANTU MBOKA HAYA ITHANWA NEDHINA LYE”
4. (a) Jesus okwa li a gandja etompelo lini kaalongwa ye manga inaa shuna megulu? (b) Epulo lini tatu ka kundathana li na sha nelombwelo ndyono?
4 Manga Jesus inaa shuna megulu, okwa li a lombwele aalongwa ye a ti: “Otamu ka pewa oonkondo, uuna mwa tililwa ombepo ondjapuki, notamu ka gandja uumbangi kombinga yandje muJerusalem, muJudea ashihe nomuSamaria nosho wo kombanda yevi alihe.” (Iil. 1:8) Onkene onkundana ombwanawa oya li tayi ka uvithilwa kehe pamwe, ihe itayi ka uvithwa owala muIsraeli. Mokweendela ko kwethimbo, aantu yomiigwana ayihe oya li taya ka kala ye na ompito yokuninga aalongwa yaJesus. (Mat. 28:19, 20) Ihe Jesus okwa ti: “Ota mu ka gandja uumbangi kombinga yandje.” Mbela aalongwa mbaka aape oya li ye na okutseya edhina lyaJehova, nenge oya li owala taya ka gandja uumbangi kombinga yaJesus? Iiningwanima mbyoka ya nyolwa mIilonga ontopolwa 15, otayi tu kwathele tu yamukule epulo ndyoka.
5. Ongiini aayapostoli nosho wo aalumentu aakuluntu yomuJerusalem, ya ulike kutya aantu ayehe oya pumbwa okutseya edhina lyaJehova? (Tala wo ethano.)
5 Mo 49 E.N, aayapostoli nosho wo aakuluntu yomuJerusalem oya li ya gongala pamwe, ya kundathane shoka Aajuda mboka kaaye shi Aakriste noina ya pita etanda, ya pumbwa okuninga, opo ya taambiwe ko ye li Aakriste. Pehulilo lyoonkundathana dhawo, Jakob omumwayina gwaJesus, okwa popi oohapu ndhika: “[Petrus] okwa hokolola nawa nkene Kalunga a dhimbulukwa aantu yomiigwana yilwe, naamoka omo a tameke okwiilikolela aantu mboka taya ka ithanwa nedhina lye.” Mbela Jakob okwa li a ukitha kedhina lya lye? Okwa totha Moohapu dhaAmos, nokwa gwedha ko ta ti: “Opo aantu, mboka ya hupa po, ya vule okukonga Jehova ya mana mo, pamwe naantu yomiigwana ayihe, mboka haya ithanwa nedhina lyandje. Jehova osho ta ti.” (Iil. 15:14-18) Aalongwa mbaka aape kaya li owala taya ka ilonga kombinga yaJehova, ihe oya li wo ‘taya ka ithanwa nedhina Lye.’ Shika osha hala okutya otaya ka tseyithila yalwe edhina lyaKalunga, naantu otaya ka tseya kutya oya kalela po edhina ndyoka.
Pokugongala kolutuwiliki methelemumvo lyotango, aalumentu mboka aadhiginini oya li ye shi uvu ko sha yela kutya Aakriste oye na okwiithanwa nedhina lyaKalunga (Tala okatendo 5)
6-7. (a) Omolwashike Jesus a li e ya kombanda yevi? (b) Jesus okwa li e ya kombanda yevi omolwetompelo limwe ishewe lini lya simanenena?
6 Edhina lyaJesus otali ti “Jehova ehupitho” naJehova okwa longitha Jesus opo a hupithe aantu ayehe mboka ye na eitaalo. Jesus okwa li e ya kombanda yevi, opo a igandje omolwetu. (Mat. 20:28) Sho a gandja ofuto yekuliloyambo, okwe shi ningitha tashi wapa opo aantu ya hupithwe noya ka mone omwenyo gwaaluhe. — Joh. 3:16.
7 Ihe mbela omolwashike aantu ya li ya pumbwa okuhupithwa? Omolwoshinima shoka sha li sha ningwa moshikunino shaEden. Ngaashi sha popiwa moshitopolwa sha tetekele, aavali yetu yotango Adam naEva, oya li ya tukulile Jehova oshipotha nokungawo oya kanitha ompito yokukala nomwenyo sigo aluhe. (Gen. 3:6, 24) Nonando ongawo, opwa li pwa ningwa oshinima shimwe sha simanenena shi vule ehupitho lyaantu aalunde. Edhina lyaJehova olya li lya nyatekwa. (Gen. 3:4, 5) Onkee ano ehupitho lyoluvalo lwaAdam naEva, olya li lya kwatela mo oshinima oshinene, ano okuyapulitha edhina lyaJehova. Molwaashoka Jesus okwa li a kalela po Jehova nokwa li a humbata edhina Lye, okwa li a dhana onkandangala ya simana mokuyapulitha edhina lyaJehova.
Mbela ongiini gumwe ta vulu okutya ye omulanduli gwaKristus gwashili, ngele ke shi noiha longitha edhina lyaHe?
8. Ayehe mboka ya itaala muJesus oye na okukala ye shi shike?
8 Aantu ayehe mboka ya li taya ka ulika eitaalo muJesus, mboka Aajuda naamboka kaaye shi Aajuda, oya li ya pumbwa okundhindhilika kutya Onzo yawo yehupitho, oHe yaJesus, Jehova Kalunga. (Joh. 17:3) Shimwe ishewe, ngaashi Jesus, oya li taya ka ndhindhilikwa mo, okupitila medhina lyaJehova. Oya li wo ye na okundhindhilika nkene sha simana okuyapulitha edhina ndyoka. Ehupitho lyawo olya li lyi ikolelela kwaashoka. (Iil. 2:21, 22) Onkee ano aalanduli ayehe yaJesus aadhiginini, oya li ya pumbwa okwiilonga kombinga yaJehova nosho wo kombinga yaJesus. Nomolwaashono Jesus a hulitha egalikano lye ndyoka li li muJohannes 17 noohapu tadhi ti: “Ngame onde ya tseyithila edhina lyoye, notandi ke li tseyitha natango, opo wu kale wu ya hole, ngaashi wu hole ndje, nondi kale nda hangana nayo.” — Joh. 17:26.
“ONE OOMBANGI DHANDJE”
9. Ongiini tatu vulu okuulika kutya edhina lyaJehova olya simana kutse?
9 Aalanduli ayehe yaJesus yashili, oye na okukala ye na ohokwe mokuyapulitha edhina lyaJehova. (Mat. 6:9, 10) Oya pumbwa oku tala ko edhina lyaJehova lya simana li vule galwe. Shika osha kwatela mo oku shi ulika moonkatu dhawo. Ihe ongiini nduno tatu vulu okukutha ombinga mokuyapulitha edhina lyaJehova, nenge okuyaneka pomutenya iifundja mbyoka Satana a popya kombinga yaJehova?
10. Oshike tatu lesha montopolwa 42 sigo 44, dhembo lyaJesaja? (Jesaja 43:9; 44:7-9) (Tala wo ethano.)
10 Ontopolwa 42 sigo 44 dhembo lyaJesaja, otadhi ulike nkene onkandangala ndjoka tatu dhana tu yapulithe edhina lyaJehova, ya simana. Moontopolwa ndhoka, Jehova ota pula aantu mboka ihaaye mu longele ya ulike nenge, ya gandje uumbangi kutya iikalunga mbyoka haya longele oko yi li shili. Ngaashi owala hashi kala mompangu, ota ithana wo Oombangi dhi koleke oshinima shoka, ngele iikalunga mbyoka oko yi li shili. Ihe kapu na ngoka ta vulu okukoleka oshinima shoka. — Lesha Jesaja 43:9; 44:7-9.
Otwa kwatelwa mo mompangu yopathaneko momikalo odhindji (Tala okatendo 10-11)
11. MuJesaja 43:10-12, Jehova ota lombwele shike oshigwana she?
11 Lesha Jesaja 43:10-12. Jehova ota ti ngeyi koshigwana she: ‘One Oombangi dhandje. . . . na ongame Kalunga.’ Jehova ote ya pula ya yamukule epulo ndika: “Oku na tuu Kalunga gulwe omunankondo inaandi mu uva?” (Jes. 44:8) Onkee ano otu na uuthembahenda woku yamukula epulo ndyoka. Ohatu gandja uumbangi okupitila moohapu nomoonkatu dhetu, kutya Jehova oye awike Kalunga kashili. Edhina lye olya simana li vule omadhina agehe. Okukalamwenyo kwetu oha ku ulike kutya otu hole Jehova shili notu li aadhiginini kuye, kutya nduno Satana oku kambadhale oku shi ningitha oshidhigu kutse. Momukalo gwa tya ngeyi, otu na ompito yokukwathela tu yapulithe edhina lyaJehova.
12. Ehunganeko ndyoka tali adhika muJesaja 40:3, 5, olya li lya gwanithwa ngiini?
12 Uuna tatu popile edhina lyaJehova, otatu holele Jesus Kristus. Jesaja okwa li wo a hunganeke kutya opu na omulongekidhindjila ngoka a li ta ka ‘longekidhila omuwa ondjila.’ (Jes. 40:3) Mbela shoka osha li sha gwanithwa ngiini? Johannes omuninginithi okwa li a longekidhile Jesus ondjila, ngoka a li e ya medhina lyaJehova nokwa li a popi medhina lyaJehova. (Mat. 3:3; Mark. 1:2-4; Luk. 3:3-6) Ehunganeko olyo tuu ndyoka olya ti: “Eadhimo lyOmuwa otali iholola.” (Jes. 40:5) Mbela omolwashike sha li shi li ngawo? Sho Jesus a li e ya kombanda yevi, okwa li a kalele po Jehova thiluthilu nosha li owala sha fa Jehova oye mwene e ya kombanda yevi. — Joh. 12:45.
13. Ongiini tatu vulu okuholela Jesus?
13 Ngaashi Jesus, natse otu li Oombangi dhaJehova. Otwa humbata edhina lyaJehova noha tu lombwele kehe gumwe ngoka tatu tsakaneke, kombinga yiilonga ye iikumithi. Opo tu pondole mwaashoka, otwa pumbwa wo okutseyithila yalwe kombinga yonkandangala ndjoka Jesus ta dhana, mokuyapulitha edhina lyaJehova. (Iil. 1:8) Jesus oye Ombangi yaJehova yotango nohatu landula ewiliko lye. (Eh. 1:5) Ihe mbela edhina lyaJehova, olya simana shi thike peni kukehe gumwe gwomutse?
NKENE EDHINA LYAJEHOVA LYA SIMANA KUTSE
14. Ohatu kala tu uvitile ngiini edhina lyaJehova, ngaashi sha popiwa mEpisalomi 105:3?
14 Otu uvite uugumbo omolwedhina lyaJehova. (Lesha Episalomi 105:3.) Jehova oha kala a nyanyukwa noonkondo, uuna tatu itangele edhina Lye. (Jer. 9:23, 24; 1 Kor. 1:31; 2 Kor. 10:17) ‘Okwiitangela Jehova,’ osha hala okutya, okukala tu uvite uuntsa sho Jehova e li Kalunga ketu. Otwe shi tala ko shi li uuthembahenda, okusimaneka edhina Lye nokuli popila. Inatu pumbwa okukala twa sa ohoni okulombwela aaniilonga pamwe natse, aanasikola yomongundu yetu, aashinda nosho wo yalwe, kutya tse Oombangi dhaJehova. Ondiyapoli oya hala tu hulithe po okulombwela yalwe kombinga yaJehova. (Jer. 11:21; Eh. 12:17) Satana nosho wo aahunganeki ye yiifundja, oya hala oku ningitha aantu ya dhimbwe edhina lyaJehova. (Jer. 23:26, 27) Ihe ohole yetu yokuhola edhina lyaJehova, ohayi tu kwathele tu kale twa nyanyukwa “esiku alihe.” — Eps. 5:11; 89:16.
15. Mbela osha hala okutya ngiini okwiithana edhina lyaJehova?
15 Ohatu tsikile nokwiithana edhina lyaJehova. (Joel 2:32; Rom. 10:13, 14) Okwiithana edhina lyaJehova, osha kwatela mo oshindji, kaashi shi owala okutseya nokulongitha edhina lyaKalunga lyopaumwene. Ohatu tseya Kalunga nawa e li Omuntu, ohatu ilongo okukala twe mu inekela nohatu mu pula ekwatho newiliko. (Eps. 20:7; 99:6; 116:4; 145:18) Ohatu tseyithile wo yalwe edhina Lye nosho wo omaukwatya ge, noku ya ladhipika ya itedhulule nokukatuka oonkatu, opo ya kale ya hokiwa kuJehova. — Jes. 12:4; Iil. 2:21, 38.
16. Ongiini tatu vulu okuulika kutya Satana omufundja?
16 Otu na ehalo lyokumona iihuna omolwedhina lyaJehova. (Jak. 5:10, 11) Ngele otwa kala aadhiginini kuJehova, nonando otatu mono iihuna, otatu ka ulika kutya Satana omufundja. Pethimbo lyaJob, Satana okwa li a lundile mboka haya longele Jehova a ti: “Omuntu ota gandja po iinima ye ayihe, opo a kale e na omwenyo.” (Job 2:4) Satana okwa li a popi kutya aantu otaya ka longela owala Jehova, uuna iinima tayi ende nawa, ihe uuna ya adhika komaudhigu, otaya ka thiga po Jehova. Omolwuudhiginini we, Job okwa li a ulike kutya shoka kashi shi shoshili. Natse otu na uuthembahenda wokuulika kutya katu na esiku tu ethe po okulongela Jehova, nonando Satana oku kambadhale oku tu teya omukumo. Otatu vulu okukala nuushili kutya Jehova ote ke tu tonatela omolwedhina lye. — Joh. 17:11.
17. Ngaashi sha popiwa mu Petrus gwotango 2:12, omomukalo guni ishewe tatu vulu okusimanekitha Jehova?
17 Ohatu ulike kutya otwa simaneka edhina lyaJehova. (Omayel. 30:9; Jer. 7:8-11) Molwaashoka otwa kalela po Jehova notwa humbata edhina lye, shoka hatu ningi otashi ka ulika ngele otwe mu simaneka nenge hasho. (Lesha 1 Petrus 2:12.) Onkee ano, otwa hala okuninga kehe shimwe tatu vulu tu simaneke Jehova okupitila moohapu nomeihumbato lyetu. Momukalo gwa tya ngawo, otatu ka ninga ngaashi tatu vulu tu simanekithe edhina lye nonando inatu gwanenena.
18. Omomukalo guni ishewe tatu okuulika kutya edhina lyaJehova olya simana kutse? (Tala wo enyolo lyopevi.)
18 Otwa simaneka unene edhina lyaJehova shi vulithe epopilo lyetu. (Eps. 138:2) Omolwashike shoka sha simana? Omolwaashoka, ohole yetu yokuhola Jehova, otashi vulika yi ningithe yalwe yetu popile muuwinayi. a Jesus okwa li e na ehalo lyokusa eso esithahoni a fa omukolokoshi, opo a simanekithe edhina lyaJehova. Okwa li a “idhidhimikile esheko,” ano kutya ka li a gwililwa po nenge ta ipula sha pitilila kombinga yaashoka yalwe ya li ta ya dhiladhila kombinga ye. (Heb. 12:2-4) Okwa li a gandja eitulomo kokulonga ehalo lyaKalunga. — Mat. 26:39.
19. Owu uvitile ngiini edhina lyaJehova, nomolwashike wu uvite ngawo?
19 Otu uvite uuntsa omolwedhina lyaJehova noshi li uuthembahenda sho hatu ithanwa Oombangi dhaJehova. Omolwoshinima shoka, otu na ehalo lyoku idhidhimikila kehe shimwe tashi vulika tu taalele. Edhina lyaJehova olya simanenena kutse li vule epopilo lyetu. Onkee ano natu kaleni twa tokola toko okutsikila okutanga edhina lyaJehova, nonando Satana oku kambadhale oku tu teya omukumo. Momukalo gwa tya ngawo, otatu ka ulika kutya edhina lyaJehova olya simanenena kutse, ngaashi owala lya simana kuJesus.
EIMBILO 10 Natu tangeni Jehova Kalunga ketu!
a Nokuli nomulumentu omudhiginini Job, okwa li a gandja eitulomo lya pitilila kepopilo lye, sho a ookuume ke yatatu ya li ta ye mu popile muuwinayi. Petameko, sho a kanitha oyana ye ayehe nomaliko ge agehe, “Job ina yona a pe ando Kalunga ombedhi.” (Job 1:22; 2:10) Ihe sho Job a lundilwa kutya okwa ninga sha sha puka, okwa li a popi ‘oohapu inaadhi dhiladhilwa nawa.’ Okwa li unene a gandja eitulomo kokupopila edhina lye pehala lyoku yapulitha edhina lyaJehova noku li popila. — Job 6:3; 13:4, 5; 32:2; 34:5.