‘Tokoleni ngoka tamu ka longela’

1. Oshike tu na okuninga, opo tu kale twa nyanyukwa shili, nomolwashike mbela? (Jesaja 48:17, 18)

TATE yetu gwomegulu oku tu hole noonkondo, nokwa hala tu nyanyukilwe onkalamwenyo ngashingeyi nosho wo monakuyiwa. (Omuuv. 3:12, 13) Okwe tu shita tu na uunkulungu wontumba wa dhenga mbanda, ihe ine tu pa oonkondo dhokwiipangela tse yene nomupondo nenge okutokola shoka shi li mondjila naashoka sha puka. (Omuuv. 8:9; Jer. 10:23) Oku shi kutya opo tu kale twa nyanyukwa shili, otwa pumbwa oku mu longela nokukala metsokumwe nomithikampango dhe. — Lesha Jesaja 48:17, 18.

2. Oshike shoka Satana a hala tu itaale, na Jehova okwa li a inyenge ngiini kiifundja mbyoka?

² Satana okwa hala oku tu itaalitha kutya otatu vulu okukala twa nyanyukwa nopwaa na Jehova, ano kutya aantu otaya vulu okwiipangela yoyene nomupondo. (Gen. 3:4, 5) Opo Jehova a ulike kutya Satana omufundja, okwa etha aantu ya ipangele yoyene uule wethimbo lyontumba. Oshi iwetikile kutya aantu itaya vulu okwiipangela yoyene. Nonando ongawo, mOmbiimbeli omwa udha iiholelwa oyindji yaalumentu naakiintu mboka ya li ye na onkalamwenyo tayi ti sha miilonga yaJehova. Miiholelwa mbyoka, omwa kwatelwa shaJesus Kristus, shoka sha dhenga mbanda. Tango, natu ka taleni komatompelo kutya omolwashike a li a hogolola okulongela Jehova. Opo nduno, otatu ka konakona kutya omolwashike twa pumbwa okulongela Tate yetu gwomegulu. Hugunina, otatu ka tala komatompelo gamwe kutya omolwashike twa hogolola okulongela Jehova.

OMOLWASHIKE JESUS A HOGOLOLA OKULONGELA JEHOVA?

3. Jesus okwa li a uvanekelwa shike nokwa ningi etokolo lini?

³ Sho Jesus a li kombanda yevi, okwa li e na okuninga etokolo kutya ota ka longela lye. Nziya konima sho Jesus a ninginithwa, Satana okwe mu uvanekele omaukwaniilwa agehe gomuuyuni, ngele okwe mu inyongamene. Jesus okwe mu yamukula a ti: “Za po Satana! Oshoka okwa nyolwa, ‘Jehova Kalunga koye oye awike wu na okwiinyongamena.’” (Mat. 4:8-10) Omolwashike Jesus a ningi etokolo ndyono? Natu taleni komatompelo gamwe.

4-5. Jesus okwa li a hogolola okulongela Jehova omolwomatompelo geni?

⁴ Etompelo lya simanenena kutya omolwashike Jesus a tokola okulongela Jehova, olyo ohole, ano kutya Jesus oku hole He noonkondo nohole ihaayi tengauka. (Joh. 14:31) Shimwe ishewe, Jesus oha longele Jehova molwaashoka oshinima shi li mondjila okuninga. (Joh. 8:28, 29; Eh. 4:11) Oku shi kutya Jehova oye oluthithiya lwomwenyo, omwiinekelwa noha gandja nehalo ewanawa. (Eps. 33:4; 36:9; Jak. 1:17) Jehova okwa li aluhe ha lombwele Jesus oshili nokwa li e mu pe iinima ayihe mbyoka a li e na. (Joh. 1:14) Mepingathano naashoka, Satana okwa etitha eso. Ye omuniifundja ngoka omunalwiho nokwiihole ye mwene. (Joh. 8:44) Molwaashoka Jesus okwa li e shi iinima ayihe mbyoka, ka li nando a holele Satana mokutukulila Jehova oshipotha. — Fil. 2:5-8.

⁵ Etompelo lilwe kutya omolwashike Jesus a hogolola okulongela Jehova olyo kutya, okwa li a halelela oku ka mona shoka iilonga ye yuudhiginini tayi ka gwanitha po. (Heb. 12:2) Okwa li e shi kutya ngele okwa kala omudhiginini, ota ka yapulitha edhina lyaHe note ke shi ningitha tashi wapa, opo okumona iihuna hoka kwa etithwa kOndiyapoli ku hule po.

OMOLWASHIKE TWA PUMBWA OKULONGELA JEHOVA?

6-7. Omolwashike oyendji kunena ihaaya longele Jehova, nomolwashike oye a gwana okulongelwa kutse?

⁶ Oyendji kunena ihaya longele Jehova, molwaashoka inaya tseya natango kombinga yomaukwatya ge omawanawa nokaye shi ashihe shoka e ya ningila. Aantu mboka oya faathana naantu yomuAtena, mboka ya li ya uvithilwa komuyapostoli Paulus. — Iil. 17:19, 20, 30, 34.

⁷ Paulus okwa yelithile aapulakeni ye kutya Kalunga kashili, “oye a pa aantu ayehe omwenyo nomufudho niinima ayihe.” Okwa gwedha ko a ti: “Oshoka omolwe, otu na omwenyo, tatu inyenge, notu li po.” Kalunga oye Omushiti, ngoka “a shiti aantu yomiigwana ayihe okuza momuntu gumwe,” onkene okwa gwana okulongelwa kutse. — Iil. 17:25, 26, 28.

8. Oshike shoka Jehova kee na esiku a ninge? Shi yelitha.

⁸ E li Omushiti nOmupangeli gweshito alihe, Jehova oku na oonkondo dhokuthiminika aantu ye mu longele. Ihe ke na esiku e shi ninge. Pehala lyaashono, okwe tu pa uumbangi wa yela kutya oko e li nonokutya oku hole kehe gumwe gwomutse noonkondo. Okwa hala aantu oyendji ngaashi tashi vulika, ya ninge ookuume ke sigo aluhe. (1 Tim. 2:3, 4) Nomolwaashono e tu dheula tu longe yalwe kombinga yomalalakano ge noku ya lombwela kombinga yiinima iiwanawa mbyoka ta ka ningila aantu monakuyiwa. (Mat. 10:11-13; 28:19, 20) Okwe tu unganeka nawa momagongalo nokwa langeka po aatonateli aanahole ye tu tonatele. — Iil. 20:28.

9. Ohole yaJehova oyi iwetikile ngiini?

⁹ Ohole yaJehova ondhindhilikwedhi, oyi iwetikile momukalo ngoka ha ungaunga naantu mboka haya hogolola okwiipwililikila kutya oko e li. Dhiladhila kwaashika: Mondjokonona ayihe, aantu omabiliyona oya hogolola okuninga shoka taya dhiladhila kutya oshi li mondjila nenge osha puka, pehala lyokuvulika kuJehova. Nonando ongawo, Jehova okwe ya pa shoka ya pumbwa, opo ya kale nomwenyo nokunyanyukilwa onkalamwenyo. (Mat. 5:44, 45; Iil. 14:16, 17) Omolwe, ohaya vulu okukala nekwatathano ewanawa nayalwe, ohaya vulu okukala nomaukwanegumbo nokunyanyukilwa iizemo iiwanawa yiilonga yawo yuudhiginini. (Eps. 127:3; Omuuv. 2:24) Uumbangi otawu shi ulike sha yela kutya Tate yetu gwomegulu oku hole aantu ayehe. (Ex. 34:6) Ngashingeyi natu ka idhimbulukitheni kombinga yomatompelo gamwe kutya omolwashike twa hogolola okulongela Jehova nonkene ha yambeke mboka ya hogolola oku mu longela.

OMOLWASHIKE TWA HOGOLOLA OKULONGELA JEHOVA?

10. (a) Etompelo lyetu lya simanenena lyokulongela Jehova olini? (Mateus 22:37) (b) Owa mona mo ngiini uuwanawa meidhidhimiko lyaJehova? (Episalomi 103:13, 14)

¹⁰ Ngaashi Jesus, natse ohatu longele Jehova, molwaashoka otu mu hole noonkondo. (Lesha Mateus 22:37.) Ohatu kala tu uvite twa hedha popepi naJehova, uuna twa ilongo kombinga yomaukwatya ge. Pashiholelwa, dhiladhila kunkene Jehova he tu idhidhimikile. Sho Aaisraeli ya li inaaya vulika kuye, okwa li e ya indile “ya ethe oondjila dhawo oombwinayi.” (Jer. 18:11) Jehova oku shi kutya inatu gwanenena nonokutya otse ontsi yevi. (Lesha Episalomi 103:13, 14.) Mbela ihashi ku inyengitha wu kale wa hala okulongela Jehova sigo aluhe, uuna to tedhatedha keidhidhimiko nosho wo komaukwatya ge galwe omawanawa?

11. Omolwomatompelo gamwe geni twa hogolola okulongela Tate yetu gwomegulu?

¹¹ Ohatu longele wo Jehova molwaashoka oshinima shi li mondjila okuninga. (Mat. 4:10) Shimwe ishewe, otu shi iizemo mbyoka tayi ka za mokulongela kwetu Jehova nuudhiginini. Uuna tatu mu longele nuudhiginini, ohatu yapulitha edhina lye, ohatu ulike kutya Satana omuniifundja nohatu nyanyudha omutima gwaTate yetu. Nongele otwa hogolola okulongela Jehova ngashingeyi, otatu ka kala netegameno lyoku mu longela sigo aluhe. — Joh. 17:3.

12-13. Oshike tatu ilongo koshimoniwa shaJane naPam?

¹² Manga tu li aashona, otatu vulu okukokeka ohole yomuule yokuhola Jehova, ndjoka tayi ka kala ya kolelela sho tatu ende tatu koko. Natu taleni koshiholelwa shaamwayina yaali, Jane naPam. a Sho ya tameke okukonakona Ombiimbeli, Jane okwa li e na omimvo 11 omanga Pam a li e na omimvo 10. Nonando aavali yawo kaya li ye na ohokwe yokukonakona, oya pe Jane naPam epitikilo lyokweendathana nOombangi shampa owala Jane naPam taya kala haya yi kongeleka pamwe nayo ye li uukwanegumbo. Jane okwa ti: “Shoka Oombangi dha longa ndje okuza mOmbiimbeli, osha kwathela ndje ndi vule okukondjitha omathiminiko okuza koomakula, sho taya thiminike ndje ndi longithe iingangamithi nondi kuthe ombinga momilalo dha nyata.”

¹³ Konima yomimvo omishona, ayehe oya ningi aauvithi. Lwanima, oya ningi aakokolindjila, omanga taya sile oshimpwiyu aavali yawo aakokele. Okutala koshimoniwa shawo, Jane okwa ti: “Ondi ilonga kutya Jehova omudhiginini noha sile oshimpwiyu ookuume ke nosho wo kutya ‘Omuwa oku ya shi mboka ye,’ ngaashi sha popiwa mu Timoteus omutiyali 2:19.” Kapu na omalimbililo kutya Jehova oha sile oshimpwiyu mboka ya hogolola okukala ye mu hole noku mu longela.

14. Ongiini oohapu noonkatu dhetu hadhi kwathele mokuyelitha edhina lyaJehova komalundilo? (Tala wo omathano.)

¹⁴ Otwa hala okukwathela mokuyelitha edhina lyaJehova komalundilo agehe. Natu taleni konkalo ndjika: Natu tye ando owu na kuume kopothingo ngoka omunahenda, ha gandja nehalo ewanawa noha dhimine po yalwe. Esiku limwe, owa uvu gumwe ta lundile kuume koye kutya omukwanyanya noku na iifundja. Oto ka inyenga ngiini? Oto ke mu popila. Sha faathana, uuna Satana nosho wo mboka a nwetha mo, ya kambadhala okunyateka edhina lyaJehova mokutaandelitha iifundja kombinga Ye, ohashi tu ningitha tu lombwele yalwe oshili kombinga yaJehova nokupopila edhina Lye. (Eps. 34:1; Jes. 43:10) Ohatu ulike kutya otwa hala okulongela Jehova nomutima aguhe, okupitila moohapu nomoonkatu dhetu.

15. Omuyapostoli Paulus okwa li a mono ngiini uuwanawa, sho a lundulula omalalakano ge? (Aafilippi 3:7, 8)

¹⁵ Otwa halelela okuninga omalunduluko monkalamwenyo yetu, opo tu longele Jehova momukalo ngoka a hokwa nenge tu ninge oshindji miilonga ye. Pashiholelwa, omuyapostoli Paulus okwa li a hogolola okweetha po ondondo ye ya simana moshitopolwa she, opo a landule Kristus nokulongela Jehova. (Gal. 1:14) Oshizemo, okwa li e na onkalamwenyo tayi ti sha, sho ta longele Jehova nokwa li a pewa ompito yoku ka pangela pamwe naKristus megulu. Ka li nando a ipe oombedhi omolwetokolo ndyoka a ninga a longele Jehova, onkene natse katu na esiku tu ka ipe oombedhi. — Lesha Aafilippi 3:7, 8.

16. Oshike tatu ilongo koshimoniwa shaJulia? (Tala wo omathano.)

¹⁶ Ngele otwa gandja eitulomo kokulongela Jehova, otatu ka kala tu na onkalamwenyo tayi ti sha ngashingeyi nomonakuyiwa. Natu taleni koshimoniwa shomumwameme gwedhina Julia. Manga inaa tseya oshili, Julia okwa li e li mongundu yolwiimbo lwongeleka, okuza sho a li omushona. Omwiimbi gumwe a pyokoka, okwa li a ndhindhilike oshitalenti shaJulia shokwiimba nokwe mu dheula a kale omwiimbi dhingi. Mathimbo hamale, Julia okwa kala e shiwike nawa nokwa kala ha imbi momahala ga simana. Manga a li mootundi dhokwiilonga omusika kosikola yimwe ya tseyika nawa, omunasikola pamwe naye okwa li e mu lombwele kombinga yaKalunga nosho wo kutya edhina lye oJehova. Inapu pita ethimbo ele, naJulia okwa tameke okukonakona Ombiimbeli lwaali moshiwike. Lwanima, okwa li a tokola okugandja eitulomo kokulongela Jehova monkalamwenyo ye, pehala lyokulalakanena okukala omwiimbi dhingi. Kasha li oshipu okuninga etokolo ndyoka. Okwa ti: “Aantu oyendji oya lombwele ndje kutya otandi hepitha omagano gandje, ihe ngame onda li nda hala okulongela Jehova pakuudha onkalamwenyo yandje ayihe.” Mbela oku uvitile ngiini ehogololo ndyoka a ninga, pwa pita ngashingeyi omimvo dhi vulithe po 30? Okwa ti: “Ondi na ombili yopamadhiladhilo nonda inekela kutya ashihe shoka nda pumbwa, Jehova ote ke shi gwanitha po monakuyiwa.” — Eps. 145:16.

TSIKILA OKULONGELA JEHOVA

17. Uushili kutya ehulilo ota li hedha popepi, ohawu gumu ngiini mboka ya hogolola okulongela Kalunga nosho wo mboka inaaye shi ninga natango?

¹⁷ Otu li lela pomasiku gahugunina. Omuyapostoli Paulus okwa nyola a ti: “Oku na ‘okathimbo okafupi kowala’, ‘ngoka e na okuya, ote ya ihe, ye ita kala ko.’” (Heb. 10:37) Shono ohashi tu gumu ngiini? Oshi li mpano kutya, oku na owala ethimbo efupi, opo aantu ya hogolole okulongela Jehova. (1 Kor. 7:29) Nongele otwa ninga nale ehogololo lyokulongela Kalunga, otu shi kutya nonando otatu idhidhimikile omashongo, otatu shi ningi “okathimbo okafupi kowala.”

18. Jehova naJesus oya hala tu ninge shike?

¹⁸ Jesus okwa li a ladhipike aantu ya tameke oku mu landula nokutsikila oku shi ninga. (Mat. 16:24) Onkene ngele otwa kala nokulongela Jehova uule womimvo, natu kale twa tokola toko kaatu sholole. Otu na okulonga nuudhiginini tu kale metsokumwe netokolo lyetu lyoku mu longela. Otashi vulika itaashi ka kala oshipu, ihe otatu ka nyanyukilwa omalalekonuuyamba ngashingeyi. — Eps. 35:27.

19. Oshike tatu ilongo koshimoniwa shaGene?

¹⁹ Yamwe ohaya kala ye uvite kutya okulongela Jehova okwa kwatela mo okuninga omaiyambo ogendji. Ngele owu li omugundjuka, mbela oho kala wu uvite kutya ngele oho longele Jehova, ito ka tyapula onkalamwenyo ? Omumwatate gumwe omugundjuka gwedhina Gene okwa ti: “Onda li ndi uvite nda ngambekwa, sho ndi li gumwe gwomOombangi dhaJehova. Aanona oyendji mboka twa putuka nayo, oya li taya nyanyukilwa iinima ngaashi okuya kuututhi, okweendelathana nenge okudhana uudhano wuuvidio welongithonkondo, omanga ngame tandi yi kokugongala nomuukalele.” Okudhiladhila kwa tya ngawo okwa li kwa gumu ngiini Gene? Okwa ti: “Onda tameke okukala ndi na onkalamwenyo yopaali, nonda li nde yi tyapula uule wokathimbo.” Ihe inayi etela ndje enyanyu ta li kalelele. Onda tameke okudhiladhila kombinga yoshili yOmbiimbeli ndjoka nda kala nokwiipwililikila, nonda tokola okulongela Jehova nomutima gwandje aguhe. Okuza mpoka, onda mona nkene Jehova a kala ta yamukula omagalikano gandje agehe.

20. Otwa pumbwa okukala twa tokola toko okuninga shike?

²⁰ Omupisalomi okwa imbile Jehova a ti: “Aanelago oomboka we ya hogolola nowe ya kaleke muuyapuki woye.” (Eps. 65:4) Natu kale twa tokola toko okuninga ngaashi Josua a popi sho a ti: “Ihe ngame negumbo lyandje, tse otatu longele Omuwa.” — Jos. 24:15.