Edhina lyaJehova otali ti shike kuJesus?

1-2. (a) Jesus okwa li a ningi shike ongulohi ye yahugunina manga inaa dhipagwa? (b) Omapulo geni tatu ka kundathana moshitopolwa shika?

OSHA LI Etine kongulohi, omasiku Nisan 14, mo 33 E.N, sho Jesus a li ta ka gwaalekwa, ta ka pangulwa, ta ka alelwa komuti gwomahepeko nokudhipagwa. Opo owala a adhika a mana okulya uulalelo wa ikalekelwa, pamwe naayapostoli ye aadhiginini pondunda yopombanda. Konima yuulalelo mboka, Jesus okwa li a ladhipike aayapostoli ye oshikando shahugunina. Manga ayehe inaa ya za mo mondunda ndjoka yopombanda, Jesus okwa li a galikana egalikano lya simana. Omuyapostoli Johannes okwa li a nyola kombinga yegalikano ndyoka, nota li adhika muJohannes ontopolwa 17.

² Egalikano lyaJesus otali holola shike kombinga yaashoka a li ta ipula nasho pethimbo ndyono? Egalikano ndyoka otali ulike ngiini kutya oshike sha li sha simana kuye pethimbo lyuukalele we kombanda yevi? Natu ka kundathaneni omayamukulo komapulo ngoka.

“NGAME ONDE YA TSEYITHILA EDHINA LYOYE”

3. Jesus okwa li a popi shike kombinga yedhina lyaJehova nokwa li a hala okutya ngiini? (Johannes 17:6, 26)

³ Jesus okwa galikana a ti: “Ngame onde ya tseyithila edhina lyoye.” Okwa li e shi popi lwiikando iyali kutya okwa tseyithila aalongwa ye edhina lyaJehova. (Lesha Johannes 17:6, 26.) Mbela okwa li a hala okutya ngiini? Mbela okwa li e na oku ya hololela edhina ndyoka kaaya li ye shi? Molwaashoka aalongwa yaJesus oya li Aajuda, oya li nale ye shi kutya edhina lyaKalunga oJehova. Edhina ndyoka olya holoka mo lwiikando omayovi mOmanyolo gOshihebeli. Onkene Jesus ka li a ukitha kedhina lyaKalunga lyopaumwene, ihe pehala lyaashono okwa li a ukitha kwaashoka tali ti. Okwa li a kwathele aalongwa ye ya tseye Jehova nawa, shoka sha kwatela mo elalakano Lye li nasha nevi nosho wo naantu, omaukwatya ge naashoka ta ka ninga.

4-5. (a) Ongiini tatu vulu okuthaneka shoka sha kwatelwa mo, mokutseya edhina lyomuntu? (b) Omomukalo guni aalongwa yaJesus ya tseya edhina lyaJehova?

⁴ Natu tye andola, megongalo lyeni omu na omundohotola gwedhina David, ngoka ha tanda. Omumwatate ngoka owa kala wu mu shi uule womimvo odhindji. Esiku limwe, owa li wa pumbwa epango lyopaunamiti lya endelela. Owa yi koshipangelo hoka omumwatate ha longo, nokwa li a longitha uunongo we wokupanga a hupithe omwenyo gwoye. Ngashingeyi owu hole omumwatate ngoka shi vulithe nale, nuuna wa uvu edhina lye, oho dhiladhila kwaashoka e ku ningila. Nongashingeyi David, ke shi owala omukuluntugongalo ngoka wu shi, ihe oku li wo omutandindohotola ngoka a hupitha omwenyo gwoye.

⁵ Momukalo gwa faathana, aalongwa yaJesus oya li nale ye shi edhina lyaJehova. Ihe omolwiizemo yuukalele waJesus, edhina ndyoka olya li li na lela eityo kuyo shi vulithe nale. Omolwashike tatu tile ngawo? Omolwaashoka Jesus okwa li a holele omaukwatya gaHe mu kehe shoka a popi nokuninga. Onkene aayapostoli ye oya li ya ‘tseya’ nawa Jehova mokupulakena komukalo moka Jesus a li ha longo nokwiilonga komukalo ngoka a li ha ungaunga naantu. — Joh 14:9; 17:3.

‘EDHINA LYOYE, NDYOKA WA PE NDJE’

6. Jesus okwa li a hala okutya ngiini, sho a ti kutya Jehova okwe mu pa edhina Lye? (Johannes 17:11, 12)

⁶ Jesus okwa li a kwatele aalongwa ye megalikano sho a ti: “Ya tonatela omolwedhina lyoye, ndyoka wa pe ndje.” (Lesha Johannes 17:11, 12.) Mbela shono osha hala okutya Jesus okwa tseyika e li Jehova? Hasho nando. Ndhindhilika kutya sho Jesus a ti megalikano lye “edhina lyoye,” okwa li a ukitha kuJehova. Onkene edhina lyaJehova, kalya li lya ningi edhina lyaJesus lyopaumwene. Mbela Jesus okwa li a hala okutya ngiini sho a ti kutya okwa pewa edhina lyaKalunga? Shotango, Jesus okwa li omukalelipo nomupopili gwaJehova. Okwa li e ya kombanda yevi omolwedhina lyaHe nokwa li a longo iikumithalonga omolwedhina ndyoka. (Joh 5:43; 10:25) Shimwe ishewe, edhina lyaJesus otali ti “Jehova oye ehupitho.” Onkee ano opu na ekwatathano pokati kedhina lyaJehova lya simana nedhina lyaJesus.

7. Thaneka nkene Jesus a li a popi medhina lyaJehova.

⁷ Natu shi thaneke ngeyi, omukalelipo oha kalele po omupangeli, notashi vulika a popye oohapu dha za komupangeli ngoka. Onkene oohapu dhomukalelipo odhi na oonkondo dha fa dhomupangeli. Sha faathana, Jesus okwa li omukalelipo gwaJehova nokwa li ha popi naantu okupitila medhina Lye. — Mat. 21:9; Luk. 13:35.

8. Omolwashike Jehova a ti kutya edhina lye oli li “muJesus” manga nokuli Jesus inee ya kombanda yevi? (Eksodus 23:20, 21)

⁸ E li Ohapu, Jesus okwa li omupopikalelipo gwaJehova, ngoka a li ha gandja uuyelele nomalombwelo kiishitwa yilwe yopambepo yaKalunga nosho wo kaantu. (Joh 1:1-3) Jesus otashi vulika oye a li omuyengeli, ngoka Jehova a li a tumu a sile oshimpwiyu Aaisraeli sho ya li mombuga. Sho a lombwele Aaisraeli ya vulike komuyengeli ngoka, Jehova okwa ti: “Oshoka ongame nde mu tumu.”a (Lesha Eksodus 23:20, 21.) Jehova okwa li a popi oshinima shoka, molwaashoka Jesus okwa li omupopikalelipo gwe, nomuntu ngoka a li e shi kutya ashihe shoka Jehova ha ningi oshi li mondjila noshiyapuki.

“TATE, SIMANEKITHA EDHINA LYOYE”

9. Edhina lyaJehova olya li lya simana ngiini kuJesus? Shi yelitha.

⁹ Ngaashi twa zi noku shi kundathana, nokuli nomanga Jesus inee ya kombanda yevi, edhina lyaJehova olya kala lya simana kuye. Sho a li kombanda yevi, Jesus okwa li a ulike mukehe shimwe shoka a ningi kutya edhina lyaJehova olya simana shi thike peni kuye. Lwokuuka pehulilo lyuukalele we, Jesus okwa li a pula Jehova a ti: “Tate, simanekitha edhina lyoye.” Nziya, He okwa li e mu yamukula newi lyopombanda okuza megulu a ti: “Onde li simanekitha nale, notandi ke li simanekitha ishewe.” — Joh. 12:28.

10-11. (a) Jesus okwa li a simanekitha ngiini edhina lyaJehova? (Tala wo ethano.) (b) Omolwashike edhina lyaJehova lya pumbwa okuyapulithwa nokuyukipalithwa?

¹⁰ Jesus naye okwa li wo a simanekitha edhina lyaHe. Ngiini mbela? Omukalo gumwe omokuhololela yalwe omaukwatya gaHe omawanawa niilonga ye. Ihe osha li sha kwatela mo oshindji okusimanekitha edhina ndyoka. Edhina lyaJehova olya li lya pumbwa okuyapulithwa nokuyukipalithwa.b Jesus okwa li a ulike nkene oshinima shoka sha simana, sho a longo aalanduli ye okugalikana. Okwa ti: “Tate yetu ngoka wu li megulu, edhina lyoye nali yapulwe.” — Mat. 6:9.

¹¹ Omolwashike edhina lyaJehova lya pumbwa okuyapulithwa nokuyukipalithwa? Omolwaashoka moshikunino shaEden, Satana Ondiyapoli okwa li a popi iifundja kombinga yaJehova Kalunga noka li a simanekitha edhina lye. Satana okwa popi kutya Jehova omufundja nokwa li ta tindile Adam naEva oshinima oshiwanawa. (Gen. 3:1-5) Okwa li wo a popi kutya omukalo gwaJehova gwokuninga iinima kagu li mondjila. Iifundja yaSatana oya li ya nyateke edhina lyaJehova. Lwanima, pethimbo lyaJob, Satana okwa li a popi kutya mboka haya longele Jehova, ohaye shi ningi owala omolwiinima mbyoka he ya pe. Omalundilo ngono oga li taga vulu okuningitha aantu mboka ye hole Jehova ya dhiladhile kutya itaya vulu oku mu longela, uuna ye li muupyakadhi. (Job 1:9-11; 2:4) Opwa li pwa pumbwa okupita ethimbo, opo ku monike kutya olye omufundja, ngele Jehova nenge oSatana.

“ONDA GANDJA OMWENYO GWANDJE”

12. Oshike shoka Jesus a li a halelela okuninga omolwohole ye yokuhola edhina lyaJehova?

¹² Omolwohole ye yokuhola Jehova, Jesus okwa li a hala okuninga ngaashi ta vulu a yapulithe nokuyukipalitha edhina lyaJehova. Jesus okwa ti: “Onda gandja omwenyo gwandje.” (Joh. 10:17, 18) Eeno, okwa li a halelela okugandja omwenyo gwe omolwedhina lyaJehova.c Aantu yotango ya gwanenena Adam naEva, kaya li ya vulika kuJehova, ihe pehala lyaashono, oya li ya pulakene kuSatana. Mepingathano naashono, Jesus okwa li a halelela okuya kombanda yevi nokuulika kutya okuhole Jehova. Jesus okwa li e shi ulike mokuvulika kuJehova okukalamwenyo kwe akuhe. (Heb. 4:15; 5:7-10) Okwa li a kala omudhiginini kuJehova monkalamwenyo ye, sigo omeso lye komuti gwomahepeko. (Heb. 12:2) Momukalo gwatya ngawo, okwa li a ulike kutya oku hole Jehova nosho wo edhina Lye.

13. Omolwashike Jesus a li omuntu dhingi okuulika kutya Satana omufundja? (Tala wo ethano.)

¹³ Okutala kwaashihe shoka Jesus a ninga monkalamwenyo ye, kapu na omalimbililo kutya Satana oye omufundja, ihe ke shi Jehova. (Joh. 8:44) Kapu na nando omuntu gumwe a li ko e shi Jehova nawanawa ngaashi Jesus. Andola omalundilo ngoka ga popiwa kuSatana kombinga yaJehova oga li goshili, ando Jesus oku ga shi. Ihe Jesus okwa kala omudhiginini mokupopila edhina lyaJehova. Nokuli nuuna sha li tashi monika sha fa Jehova e mu thiga po, Jesus okwa li e na ehalo lyokusa pehala lyokwaavulika kuHe omunahole. — Mat. 27:46.d

“ONDA. . . GWANITHA IILONGA, MBYOKA WA LI WA PE NDJE”

14. Jehova okwa li a pe ngiini Jesus ondjambi omoluudhiginini we?

¹⁴ Ongulohi ndjoka ya tetekele eso lye, Jesus okwa li a vulu okutya: ‘Onda gwanitha iilonga, mbyoka wa li wa pe ndje.” Okwa li e na einekelo kutya Jehova ote ke mu pa ondjambi omoluudhiginini we. (Joh. 17:4, 5) Einekelo lyaJesus muHe, olya li oshinima shi li pandunge. Jehova ka li e mu etha a kale mombila. (Iil. 2:23, 24) Ihe okwa li a yumudha Jesus noku mu pa ondondo onene megulu. (Fil. 2:8, 9) Lwanima, Jesus okwa tameke okupangela e li Omukwaniilwa gUukwaniilwa waKalunga. Mbela Uukwaniilwa mboka otawu ka gwanitha po shike? Oshitopolwa oshitiyali shegalikano otashi tu lombwele kutya: “Uukwaniilwa woye nawu ye. Ehalo lyoye [lyaJehova] nali gwanithwe wo kombanda yevi ngaashi megulu.” — Mat. 6:10.

15. Oshike ishewe Jesus ta ka gwanitha po?

¹⁵ Monakuyiwa yi li popepi, Jesus ota ka kondjitha aatondi yaKalunga nokuhanagula po aakolokoshi puArmagedon. (Eh. 16:14, 16; 19:11-16) Nziya konima yaashono, ota ka umbila Satana “molumbogo,” moka ta ka kala a fa a sa noita vulu okulonga sha. (Eh. 20:1-3) Pethimbo lyEpangelo lye lyOmimvo Eyuvi, Jesus ote ke etulula ombili kombanda yevi, naantu otaya ka kala ya gwanenena. Ota ka yumudha aasi, nota ka ninga evi alihe oparadisa. Elalakano lyaJehova otali ka gwanithwa po. — Eh. 21:1-4.

16. Oshike tashi ka kala sha gwanithwa po, pehulilo lyEpangelo lyOmimvo Eyuvi?

¹⁶ Oshike twa tegelela shi ka ningwe pehulilo lyEpangelo lyOmimvo Eyuvi lyaJesus? Uulunde nokwaagwanenena itayi ka kala po we. Aantu itaya ka pumbwa we okupula ya dhiminwe po oondjo dhawo pakankameno lyekuliloyambo, noita pu ka pumbwa we omupokati nenge aayambi. ‘Nomutondi gwahugunina e na okusindwa, oye eso [ngoka a etithwa kuAdam].’ Moombila otamu ka kala mu li owala, oshoka aasi otaya ka yumudhwa. Kehe gumwe kombanda yevi ota ka kala a gwanenena. — 1 Kor. 15:25, 26.

17-18. (a) Oshike tashi ka ningwa po pehulilo lyEpangelo lyOmimvo Eyuvi? (b) Jesus ota ka ninga shike ngele ethimbo lye lyokupangela lya puko? (1 Aakorinto 15:24, 28) (Tala wo ethano.)

¹⁷ Oshike ishewe tashi ka ningwa po pehulilo lyEpangelo lyOmimvo Eyuvi? Pethimbo ndyoka, ota pu ka ningwa oshinima sha ikalekelwa. Ompata ndjoka ya kwatela mo okuyapulitha edhina lyaJehova otayi ka hulithwa po. Ngiini mbela? Moshikunino shaEden, Satana okwa li a popi kutya Jehova omufundja noiha pangele aantu ta inyengithwa kohole. Okuza pethimbo ndyono, edhina lye olya kala nokuyapulithwa lwiikando kwaamboka haye mu longele noye mu simaneka. Onkee ano pehulilo lyEpangelo lyOmimvo Eyuvi, Jehova ota ka kala a yukipalitha edhina Lye thiluthilu. Ota ka ulika kutya oku li Tate omunahole noita pu ka kala omalimbililo kombinga yaashoka.

¹⁸ Hugunina, iifundja yaSatana otayi ka anekwa pomutenya lumwe aluke. Jesus ota ka ninga po shike ngele ethimbo lye lyokupangela lya puko? Mbela ota ka landula oshiholelwa sha Satana noku tukulila Jehova oshipotha? Hasho nando! (Lesha 1 Aakorinto 15:24, 28.) Jesus ota ka shunithila He Uukwaniilwa. Naye ota ka vulika kepangelo lyaJehova. Jesus inafa Satana, oshoka omolwohole ye yokuhola Jehova, Jesus oku na ehalo lyokuthiga po kehe shimwe. Nuuna Satana a hanagulwa po, Jehova ota ka yapulitha nokuyukipalitha edhina Lye.

19. Edhina lyaJehova otali ti shike kuJesus?

¹⁹ Ngashingeyi otu shi uvite ko, kutya omolwashike Jehova a li e na ehalo lyoku gandja edhina lye kuJesus. Jesus okwa li a ulike kutya He okwa tya lela ngiini, okupitila moshiholelwa she. Edhina lyaJehova otali ti ngiini nduno kuJesus? Olya simana kuye li vule kehe shimwe. Okwa li e na ehalo lyokusa omolwedhina ndyono, nota ka kala e na ehalo lyoku shunithila Jehova kehe shimwe pehulilo lyEpangelo lyOmimvo Eyuvi. Ongiini tatu vulu okulandula oshiholelwa shaJesus? Eyamukulo kepulo ndyoka, otatu ke li kundathana moshitopolwa tashi landula.