Tsikila ‘okulandula’ Jesus konima yokuninginithwa

1-2. Omalalekonuuyamba geni omuntu ha mono ngele okwa ningithwa?

OHATU kala twa nyanyukwa, uuna twa ninginithwa nokuninga oshitopolwa shuukwanegumbo waJehova. Oshi li uuthembahenda okukala tu na ekwatathano lyopothingo naJehova, notatu tsu kumwe noohapu dhomupsalmi David, ngoka a ti: “Aanelago oomboka [Jehova] we ya hogolola nowe ya kaleke muuyapuki woye.” — Eps. 65:4.

² Jehova iha pitike owala kehe gumwe e ye muuyapuki we. Ngaashi twe shi kundathana moshitopolwa sha tetekele, oha hedha popepi naamboka ya ulika kutya oya hala okukala ye na ekwatathano lyopothingo naye. (Jak. 4:8) Uuna wa iyapulile Jehova e to ninginithwa, oho hedha popepyeelela naye momukalo gwa ikalekelwa. Konima ngele wa ninginithwa, oto vulu okukala nuushili kutya ote ke ku ‘lokithila eloolo lyomaliko guuyamba owindji.’ — Mal. 3:10; Jer. 17:7, 8.

3. Aakriste mboka ya iyapulila Jehova noya ninginithwa, oye na oshinakugwanithwa shini sha kwata miiti? (Omuuvithi 5:4, 5)

³ Eninginitho oli li owala etameko. Konima ngele wa katuka onkatu ndjono, oto ka kala wa hala okuninga ngaashi to vulu, opo wu kale metsokumwe neiyapulo lyoye, nokuli nuuna wu li momamakelo, nenge eitaalo lyoye tali makelwa. (Lesha Omuuvithi 5:4, 5.) Wu li omulongwa gwaJesus, oto ka ninga ngaashi to vulu, wu landule oshiholelwa she thiluthilu nokuvulika kiipango ye. (Mat. 28:19, 20; 1 Pet. 2:21) Oshitopolwa shika otashi ke ku kwathela wu mone nkene wu na oku shi ninga.

TSIKILA ‘OKULANDULA’ JESUS, NUUNA TO HEPEKWA NOTO MAKELWA

4. Omomukalo guni aalongwa yaJesus haya humbata “omuti gwomahepeko”? (Lukas 9:23, NW)

⁴ Konima ngele wa ninginithwa, itashi ti kutya ito ka adhika komaupyakadhi gasha monkalamwenyo yoye. Jesus okwe shi popi sha yela kutya aalongwa ye oye na okwiitsika ‘omuti gwomahepeko.’ Oshinima shono oye na oku shi ninga ‘esiku kehe.’ (Lesha Lukas 9:23.) Mbela Jesus okwa li a hala okutya aalongwa ye otaya ka kala aluhe taya mono iihuna? Hasho nando. Okwa li owala ta tsu omuthindo kutya kakele komayambeko ngoka taya ka mona, otaya ka adhika komashongo. Nokuli gamwe gomomashongo ngoka otashi vulika ga ka kale omadhigu noonkondo. — 2 Tim. 3:12.

5. Omayambeko geni Jesus a uvanekela mboka haya ningi omaiyambo?

⁵ Otashi vulika ho patanekwa nale kaantu yaandjeni, nenge tashi vulika wa yamba po iinima yopamaliko, opo wu pitithe Uukwaniilwa komeho. (Mat. 6:33) Ngele osho, oto vulu okukala nuushili kutya Jehova oku wete iilonga yoye yuudhiginini. (Heb. 6:10) Otashi vulika wa mona uushili woohapu ndhoka tadhi ti: “Kapu na ngoka a thiga po egumbo lye, nenge aamwayinamati, nenge aamwayinakadhona, nenge yina, nenge he, nenge oyana, nenge epya lye omolwandje nomolwonkundana ombwanawa, a kale ando itaa mono lwethele muuyuni mbuka omagumbo, aamwayinamati, aamwayinakadhona, ooyina, oyana, omapya, pamwe nomahepeko, nomuuyuni tawu ya omwenyo gwaaluhe.” (Mark. 10:29, 30) Omalalekonuuyamba ngoka wa mona, oge vule kokule omaiyambo ngoka wa ninga. — Eps. 37:4.

6. Omolwashike wa pumbwa okutsikila okukondjitha “uuhalu wopantu” konima yokuninginithwa?

⁶ Oto ka pumbwa natango okukondjitha “uuhalu wopantu,” konima ngele wa ninginithwa. (1 Joh. 2:16) Shino otashi ningwa molwaashoka owu li natango oluvalo lwaAdam olulunde. Otashi vulika omathimbo gamwe ho kala wu uvite ngaashi omuyapostoli Paulus, ngoka a nyola a ti: “Meni lyandje onda hokwa ompango yaKalunga. Ihe ondi wete ompango onkwawo yi li molutu lwandje tayi kondjitha ndjoka ya ziminwa komadhiladhilo gandje. Oyo oya kwata ndje, ndi kale omupika gwompango yuulunde yi li molutu lwandje.” (Rom. 7:22, 23) Otashi vulika wu teke omukumo, molwaashoka owu na okukondjitha omahalo ga puka. Ihe nando ongawo, okudhiladhila keuvaneko ndyoka wa uvanekela Jehova, sho we mu iyapulila, otaku ka nkondopaleka etokolotoko lyoye lyokukondjitha omamakelo. Uushili owo kutya egano lyoye lyokwiiyapulila Jehova otali ke ku kwathela, uuna wa taalela omamakelo monkalamwenyo yoye. Ngiini mbela?

7. Okwiiyapulila Jehova otaku ke ku kwathela ngiini wu kale omudhiginini?

⁷ Uuna wa iyapulile Jehova, oho ihupula ngoye mwene. Shono osha hala okutya ito ka gwanitha po omahalo nomalalakano gopaumwene, ngoka Jehova inaa hokwa. (Mat. 16:24) Uuna wa taalela emakelo, ito ka pumbwa okukala to ipula kutya oshike wu na okuninga po. Owa tokola nale kutya oshike wu na okuninga, ano okukala omudhiginini kuJehova. Oto ka tsikila okukala wa tokola toko okunyanyudha Jehova. Oto ka ninga wo ngaashi Job a li a ningi. Nonando Job okwa li a taalela omashongo omadhigu, okwa li a tokola toko, a ti: “Itandi ki idhimbika uuyuuki wandje.” — Job 27:5.

8. Ongiini okutedhatedha kegalikano lyoye lyokwiiyapulila Jehova, taku vulu oku ku kwathela wu kondjithe emakelo?

⁸ Ngele owa kala ho tedhatedha kegalikano lyoye lyokwiiyapulila Jehova, otashi ke ku kwathela wu sinde emakelo kehe. Pashiholelwa, mbela oto ka dhana nomaiyuvo gakuume kopandjokana gwagulwe? Hasho nando. Owa popya nale kutya ito ka ninga oshinima sha tya ngawo. Ngele ino pitika omaiyuvo omawinayi ga tya ngawo ga koke mungoye, nena itashi ka kala oshidhigu kungoye oku ga vudha mo. Oto ka ‘gamuka mo mondjila yaakaanakalunga.’ — Omayel. 4:14, 15.

9. Ongiini okutedhatedha kegalikano lyoye lyokwiiyapulila Jehova, taku vulu oku ku kwathela wu tsikile okukala wa pititha komeho iinima yopambepo?

⁹ Ongiini ngele owa mono iilonga mbyoka tayi ke ku imba okuya kokugongala kwopaKriste pandjigilile? Oto ka kala wu shi shoka wu na okuninga. Manga inoo yi mona, owa adhika wa tokola nale kutya ito ka taamba ko iilonga mbyoka tayi ku imbi okuya kokugongala. Onkee ano ito ka makelwa wu yi taambe ko e to kala natango wu uvite wa pititha Jehova komeho. Ngele owa tedhatedha kunkene Jesus a li a tokola toko a nyanyudhe He, ito ka kakadhala okutinda kehe shoka wu shi kutya otashi yemateke Kalunga, ngoka wa iyapulila. — Mat. 4:10; Joh. 8:29.

10. Ongiini Jehova te ke ku kwathela konima ngele wa ninginithwa, wu tsikile ‘okulandula’ Jesus?

¹⁰ Uushili owo kutya omashongo nosho wo omamakelo ohage ku pe ompito wu ulike kutya owa tokola toko okutsikila ‘okulandula’ Jesus. Ngele owe shi ningi, oto vulu okukala nuushili kutya Jehova ote ke ku kwathela. Ombiimbeli oya ti: “Kalunga oku shi kwiinekelwa. Onkee ite mu ethele memakelo li vule oonkondo dheni. Ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata.” — 1 Kor. 10:13.

NKENE TO VULU OKUTSIKILA OKULANDULA JESUS

11. Omomukalo gumwe guni gwa dhenga mbanda to vulu okutsikila ‘okulandula’ Jesus? (Tala wo ethano.)

¹¹ Jesus okwa li omudhiginini nokwa kala ha galikana kuJehova. (Luk. 6:12) Uushili owo kutya omukalo gumwe gwa dhenga mbanda moka to vulu okutsikila okulandula Jesus konima ngele wa ninginithwa, okuninga iinima mbyoka tayi ku hedhitha popepi naJehova. Ombiimbeli oya ti: “Natu humeni owala komeho nondjila naanaa ndjoka twe ende nayo sigo oompaka.” (Fil. 3:16) Omathimbo nomathimbo, ohatu uvu iimoniwa yaamwatate naamwameme, mboka ya tokola okulonga oshindji miilonga yaJehova. Otashi vulika ya hita Osikola yAauvithi yUukwaniilwa, nenge ya tembukila hoka ku na ompumbwe onene. Ngele oto vulu okwiitulila po elalakano ndyoka, shi ninga. Oshigwana shaJehova osha halelela okutamununa mo uukalele washo. (Iil. 16:9) Ongiini ngele ngashingeyi ito vulu oku shi ninga? Ino dhiladhila kutya owu vulike kwaamboka taya vulu oku shi ninga. Shoka sha simana, okutsikila okwiidhidhimika. (Mat. 10:22) Ino dhina ongushu yokulongela Jehova sha ikolele kwokuvula kwoye nokoonkalo dhoye. Ngoka ogwo omukalo gwa simana to vulu okutsikila okulandula Jesus konima yokuninginithwa. — Eps. 26:1.

12-13. Oshike to vulu okuninga ngele owa tameke okukala kuu na uulaadhi wokulongela Jehova? (1 Aakorinto 9:16, 17) (Tala wo oshimpungu “Kala methigathanopo.”)

¹² Ongiini ngele oho galikana omagalikano wu wete itaaga zi komutima, nenge wu wete itoo shi enditha we nawa muukalele ngaashi nale? Ongiini ngele owu wete kutya ku hole we okulesha Ombiimbeli ngaashi nale? Ngele owa iyadha moonkalo dha tya ngawo konima ngele wa ninginithwa, ino thika pehulithodhiladhilo kutya ombepo yaJehova kayi po we pungoye. Omaiyuvo gomuntu inaa gwanenena ohaga vulu okulunduluka. Ngele oto ende to kanitha uulaadhi, tedhatedha koshiholelwa shomuyapostoli Paulus. Nonando okwa li a kambadhala okuholela Jesus, okwa li e shi kutya omathimbo gamwe otashi vulika a kale kee na oonkondo dhokulonga shoka a hala. (Lesha 1 Aakorinto 9:16, 17.) Okwa ti: “Ihe ngashingeyi itandi longo pahogololo lyandje mwene; oshilonga shika onde shi pewa, shi kale oshinakugwanithwa shandje.” Shono osha hala okutya Paulus okwa li a tokola toko a gwanithe po uukalele we, kashi na nduno mbudhi kutya oku uvite ngiini pethimbo ndyoka.

¹³ Sha faathana, molwaashono ino gwanenena, ino etha omaiyuvo goye ge ku pangele sho to ningi omatokolo. Kala wa tokola toko wu ningi shoka sha uka, kutya nduno owu uvite ngiini. Mokweendela ko kwethimbo, oonkatu dhoye otadhi ke ku kwathela wu ninge shoka shi li mondjila. Niishewe, ngele owa kala wu na ondjigilile yokuninga iinima yopambepo, otashi ke ku kwathela wu tsikile okulandula Jesus konima yokuninginithwa. Ngele owe shi ningi, otashi ka tsa wo omukumo ooitaali ooyakweni. — 1 Tes. 5:11.

“IKONAKONENI, NE MU IYELEKE”

14. Oshike wu na okukala ho konakona pandjigilile, nomolwashike? (2 Aakorinto 13:5)

¹⁴ Otashi ke ku kwathela wo ngele owa kala ho ikonakona pandjigilile, konima ngele wa ninginithwa. (Lesha 2 Aakorinto 13:5.) Omathimbo nomathimbo, kala ho tala konkalamwenyo yoye nokiikala yoye, wu tale ngele oho galikana ngaa esiku kehe, oho lesha Ombiimbeli noku yi konakona, oho kala pokugongala noho yi muukalele. Konga omikalo dhankene to vulu okunyanyukilwa nokumona uuwanawa miinima mbyoka. Pashiholelwa, oto vulu okwiipula omapulo ngaashi: ‘Mbela ohandi yelithile ngaa yalwe shoka Ombiimbeli tayi ti? Mbela opu na omikalo dhilwe moka tandi vulu okunyanyukilwa uukalele? Mbela ohandi galikana ngaa omagalikano gokondandalunde, nohaga ulike ngaa kutya ondi inekela muJehova thiluthilu? Ohandi kala ngaa pokugongala pandjigilile? Ongiini tandi vulu okuhwepopaleka omukalo gwandje gwokugandja eitulomo nokukutha ombinga pokugongala?’

15-16. Oshike to ilongo koshimoniwa shomumwatate gumwe, shi na ko nasha nokukondjitha emakelo?

¹⁵ Osha simana wo okukala wu shi omaunkundi goye. Oshimoniwa shomumwatate Robert otashi tu kwathele tu uve ko nawa oshinima shika. Okwa ti: “Sho nda li ndi na omimvo 20 lwaampono, onda li ndi na iilonga yomalupita. Esiku limwe konima yiilonga, omukiintu gumwe ngoka hatu longo naye okwa li a hiya ndje kegumbo lye. Okwa ti kutya otatu ka kala otse atuke, notatu ka nyanyukilwa pamwe. Tango, onda li nda gandja omaipopilo ganathangwa, ihe lwanima onda tindi, nonde mu yelithile kutya omolwashike.” Robert okwa li a sindi emakelo, naashoka oshi shi okupandulwa. Ihe lwanima sho a dhiladhila koshinima shono, okwa mono kutya ka li naanaa e shi enditha nawa. Okwa ti: “Kanda li nda tindi meendelelo, nenge nondjungu, ngaashi Josef a li a tindi omukulukadhi gwaPotifar. (Gen. 39:7-9) Uushili owo kutya osha li sha kumitha ndje okumona nkene sha li oshidhigu okutinda. Oshinima shono osha li sha kwathele ndje ndi mone kutya onda pumbwa okukoleka ekwatathano lyandje naJehova.”

¹⁶ Ngele owa kala ho ikonakona mwene, ngaashi Robert a li a ningi, otashi ke ku etela uuwanawa. Nokuli nuuna wa sindi emakelo, ipula kutya: ‘Osha pula ndje ethimbo li thike peni, opo ndi tinde.’ Ngele owa mono kutya owa pumbwa okuninga omalunduluko, ino teka omukumo. Kala wa nyanyukwa sho wu shi uunkundi woye. Galikana kombinga yasho e to katuka oonkatu wa mana mo, wu koleke etokolotoko lyoye lyokukala metsokumwe nomithikampango dhaJehova dhopamikalo. — Eps. 139:23, 24.

17. Edhina lyaJehova olya li lya kwatelwa mo ngiini moshimoniwa shaRobert?

¹⁷ Natango opu na sha shimwe shoka tatu vulu okwiilonga moshimoniwa shaRobert. Okwa ti: “Konima sho nda tindi ehiyo lyomuniilonga pamwe nangame, okwa ti: ‘Owa ninga nawa.’ Onde mu pula kutya okwa hala okutya shike. Okwa yelitha kutya kuume ke ngoka a li Onzapo, okwe mu lombwele kutya aagundjuka ayehe yomOonzapo dhaJehova oye na onkalamwenyo yopaali, nohaya ningi shoka inaashi uka meholamo. Omukadhona ngoka okwa li a lombwele kuume ke kutya okwa li owala ta tala ndje po ngele nangaye osho ndi li. Onda mono kutya nani onda li nda simanekitha edhina lyaJehova.”

18. Owa tokola toko okuninga shike, konima ngele wa ninginithwa? (Tala wo oshimpungu “Iitopolwa ya pambathana mbyoka to ka nyanyukilwa.”)

¹⁸ Ngele owa iyapulile Jehova e to ninginithwa, oto ulike kutya owa hala okuyapulitha edhina lye, kashi na nduno mbudhi kutya otashi pula shike. Oto vulu okukala nuushili kutya Jehova oku shi omashongo ngoka to piti mugo nomamakelo ngoka to kondjitha. Ota ka laleka nuuyamba oonkambadhala dhoye wu kale omudhiginini. Kala wu na einekelo kutya kekwatho lyombepo ondjapuki, ote ke ku nkondopaleka wu shi ninge. (Luk. 11:11-13) Kekwatho lyaJehova, oto ka vula okutsikila okulandula Jesus, konima yokuninginithwa.