Iilanduliko iiwinayi yiita
Kapu na naanaa oshinima oshiwinayi shoka hashi ehameke aantu noonkondo shi vulithe iita nelongithonkondo. Muuyuni awuhe, aakwiita nosho wo aakwashigwana mboka ya li miita, oye shi oku shi pulwa noku shi hokolola.
AAKWIITA
Gary, gwokoBritania, okwa ti: “Iiningwanima iitilithi, iiponga mbyoka hayi lundulula onkalamwenyo yomuntu nenge eso, oho yi mono tayi ningwa momudhingoloko gwoye. Iinima mbyoka ohayi ningitha omuntu a kale e uvite inaa gamenwa.”
Wilmar, gwokoKolombia, okwa ti: “Onda li nda yahwa niikuti mombunda nomoshipala, nonda mona aantu oyendji ya dhipagwa, mwa kwatelwa aanona naakokele. Iita ohayi ku ningitha wu kale kuu na omaiyuvo.”
Zafirah, gwokoAmerika, okwa ti: “Uuna gumwe a yahwa momeho goye, ihashi kala oshipu okweetha po okudhiladhila kombinga yoshinima shoka. Oho kala wu uvite nowu wete momadhiladhilo goye, iikando niikando, omuntu ngoka ta kugu, nota mono iihuna. Ku na siku wu dhimbwe kombinga yomuntu ngoka.”
AAKWASHIGWANA
Oleksandra, gwokoUkraine, okwa ti: “Kanda li ndi shi ngele opu na esiku ndi ka kale nda nyanyukwa ishewe. Omuntu oho kala wa tila okusa, noho kala wo wa tila kutya yaandjeni nosho wo ookuume koye otaya ka dhipagwa.”
Daler, gwokoTajikistan, okwa ti: “Ohatu kala twa tila, uuna twa thikama momukweyo gwiikulya okuza pombali yongulonene sigo opomulongo nayimwe gwuusiku, nohatu kala tu shi kutya ethimbo kehe otatu vulu okuyahwa.”
Marie, gwokoRwanda, okwa ti: “Aavali yandje oya li ya dhipagelwa miita. Omolwiita, onda ningi othigwa noka pwa li pu na ngoka ta hekeleke ndje, nenge ta sile ndje oshimpwiyu.”
Aantu mboka ya popiwa metetekelo, oya li ya mono ombili, nonando oya li yi iyadha miilanduliko yinikitha oluhodhi yiita. Shimwe ishewe, oya tompwa kutya iita yoludhi kehe nosho wo elongithonkondo masiku otayi ka hula po. Oshifo shika shOshungolangelo, otashi ka longitha Ombiimbeli shi yelithe nkene shoka tashi ka ningwa.