Nkene to vulu okumona ombili, nonando opu na iita nelongithonkondo
Gary, ngoka a li omukwiita, okwa ti: “Manga inaa ndi tameka okukonakona Ombiimbeli,” kanda li ndi shi kutya omolwashike muuyuni mu udhililila onyanya, okwaanuuyuki nuupyakadhi. Ihe ngashingeyi, ondi na ombili yopamadhiladhilo. Ondi shi kutya Jehova ota ka ninga uuyuni wu kale ehala lya gamenwa.”
Gary haye awike ha kala e uvite ngawo. Tala nkene Ombiimbeli ya kwathela yalwe.
OMBIIMBELI OTAYI TI: “Omuwa, ongoye omunalukeno noho tu dhimine po.” — Episalomi 86:5.
NKENE SHIKA HASHI KWATHELE: Wilmar, gwokoKolombia, okwa ti: “Ovelise ndjika otayi shilipaleke ndje kutya Jehova omunahenda. Ondi shi kutya oku na ehalo lyokudhimina ndje po, omolwiinima ayihe mbyoka nda ninga monakuziwa, sho nda li handi kutha ombinga miita.”
OMBIIMBELI OTAYI TI: “Ongame otandi shiti egulu epe nevi epe. Mbiyaka yonale ihayi dhimbulukiwa we, nongaashi kaku na ngoka, te li idhiladhilile momwenyo gwe, aawe.” — Jesaja 65:17, OB-1977.
NKENE SHIKA HASHI KWATHELE: Zafirah, gwokoAmerika, okwa ti: “Ohandi adhika komandhindhiliko gokukala ndi na oshimpwiyu sha pitilila nosho wo epolimano, molwaashoka nda li muukwiita. Ihe enyolo ndyoka ohali dhimbulukitha ndje kutya masiku iinima ayihe iiwinayi mbyoka ye etithwa kiita otayi ka hula po, noitatu ka kala we tu na omalimbililo kombinga yegameno lyaantu mboka tu hole. Kayi na esiku yi ka kale momadhiladhilo nomomutima gwandje. Ngoka ka ge shi tuu omagano omawanawa lela!”
OMBIIMBELI OTAYI TI: “Uuyuuki nau pangele methimbo lye; ombili nayi kale moshilongo, manga omwedhi tagu minikile.” — Episalomi 72:7.
NKENE SHIKA HASHI KWATHELE: Oleksandra, gwokoUkraine, okwa ti: “Ohandi dhiladhila olundji kombinga yoohapu ndhoka. Masiku iinima ayihe iiwinayi mbyoka ye etithwa kiita, otayi ka hula po noitatu ka kala we tu na omalimbililo kombinga yegameno lyaantu mboka tu hole.”
OMBIIMBELI OTAYI TI: “Oonakusa yoye otaa ka ninga omwenyo ishewe. . . . Ayehe mboka ya kotha moombila, otaa ka penduka nokwiimba ekandanga.” — Jesaja 26:19.
NKENE SHIKA HASHI KWATHELE: Marie, gwokoRwanda, okwa ti: “Konyala aantu yaandjetu ayehe oya li ya dhipagwa, sho omuhoko gwAahutu gwa li tagu dhipaga Aatutsi. Ihe ovelise ndjika otayi shilipaleke ndje kutya otandi ke ya mona ishewe. Onda halelela oku ka uva omawi gawo genyanyu, sho taya ka yumudhwa.”
OMBIIMBELI OTAYI TI: “Aadhudhu otaa ka kana po mbala. . . Aayifupipiki otaa ka thigulula evi notaa ka mona uulinawa nombili.” — Episalomi 37:10, 11.
NKENE SHIKA HASHI KWATHELE: Daler, gwokoTajikistan, okwa ti: “Nonando iita oya hula, okwaanuuyuuki otaku tsikile natango nopu na aantu aakolokoshi. Oovelise ndhoka odha kwathela ndje lela noonkondo. Jehova oku wete kehe shimwe noku uvite ko onkalo yandje. Oku uvaneka kutya masiku okumona iihuna koludhi kehe otaku ka hulithwa po, notaku ka dhimbiwa.”
Oohandimwe mboka ya popiwa moshifo shika, oye li yamwe yomOombangi dhaJehova omamiliyona, mboka ya kwathelwa kOmbiimbeli ya mone ombili. Oyi ilonga nkene ye na okweetha po uutondwe wopamihoko, wopashigwana nowo ku tonda aantu ooyakwawo. (Aaefeso 4:31, 32) Oombangi dhaJehova ihadhi kutha ombinga mopolotika, nohadhi tindi okukutha ombinga melongithonkondo. — Johannes 18:36.
Oombangi dhaJehova ohadhi ambidhidhwa wo kaamwahe muuyuni awuhe, oshoka oye ya hole noonkondo. (Johannes 13:35) Pashiholelwa, Oleksandra, ngoka a popiwa metetekelo, okwa li a yi ontuku koshilongo shimwe nomumwayinakadhona omolwiita. Okwa ti: “Sho twa taaguluka oongamba,” nziya otwa mono Oombangi dhomoshitopolwa ndhoka dhe ya oku tu tsakaneka. Odha li dhe tu kwathele tu igilile onkalo yomoshilongo oshipe, tu li oontauki.”
Otatu ku hiya nesimaneko enene kokugongala kwetu, mpoka hatu ilongo kombinga yetumwalaka lyombili lyOmbiimbeli nankene tu na oku li tula miilonga. Inda kepandja lyetu lyokointaneta, jw.org, wu mone ehala ndyoka li li popepi nangoye, nenge wu ninge eindilo mu kundathane Ombiimbeli oshali ta mu longitha embo, Kala nonkalamwenyo ombwanawa sigo aluhe