“Okukala popepi naKalunga” oshinima oshiwanawa kutse

1-2. (a) Oonkambadhala dhini twa pumbwa okuninga, opo tu pange uukuume nagumwe? (b) Oshike tatu ka kundathana moshitopolwa shika?

MBELA owu na kuume kopothingo? Owe shi ende ngiini, opo wu pange uukuume naye? Otashi vulika wa kala ethimbo pamwe naye, wa tseya kombinga yomaupyakadhi ge nosho wo shoka e hole naashoka e tonde. Owa mono kutya oku na omaukwatya omawanawa ngoka wa hala okuholela. Onkene owa tameke okukala wu hole kuume koye.

² Okupanga uukuume nagumwe ohashi pula ethimbo noonkambadhala. Shono osha faathana nokukokeka ekwatathano lyopothingo naJehova Kalunga. Oshitopolwa shika, otashi ka kundathana nkene tatu vulu okuhedha popepi naKalunga ketu nosho wo uuwanawa mboka hatu mono mo, uuna twe shi ningi. Tango, otatu ka tala kutya omolwashike oshiwanawa okuhedha popepi naKuume ketu, Jehova.

3. Omolwashike twa pumbwa okutedhatedha kuuwanawa mboka hawu zi mokuhedha popepi naJehova? Shi thaneka.

³ Kapu na omalimbililo oto tsu kumwe kutya okuhedha popepi naJehova oshinima oshiwanawa. Ihe okutedhatedha kunkene shi li lela oshinima oshiwanawa, otashi vulu oku tu inyengitha tu hedhe popepi naye. (Eps. 63:6-8) Pashiholelwa, otu shi kutya okuninga iinima ngaashi: Okulya iikulya yi na uundjolowele, okuninga omadhewo, okuthuwa po sha gwana nokunwa omeya ga gwana, ohashi tu etele uuwanawa. Nonando ongawo, oyendji ihaya gandja eitulomo kiinima mbyoka, noihaya kala ye na ko nasha nuukolele wawo. Ihe ngele otwa kala hatu gandja eitulomo kuukolele wetu, otatu ka vula oku wu kaleka po. Sha faathana, otashi vulika tu kale tu shi kutya okuhedha popepi naJehova oshinima oshiwanawa kutse, ihe okutedhatedha kuuwanawa mboka hawu zi moku shi ninga, otaku vulu oku tu inyengitha tu hedhe popepi naKuume ketu. — Eps. 119:27-30.

4. Ngaashi sha popiwa mEpisalomi 73:28, omupisalomi okwa li a holola omaiyuvo geni?

⁴ Lesha Episalomi 73:28. Omunyoli gwEpisalomi 73, okwa li Omulevi, ngoka a langekwa po e li omwiimbi motempeli yaJehova. Otashi vulika a kala nokulongela Jehova nuudhiginini uule wethimbo. Ihe okwa li natango e uvite a pumbwa okwiidhimbulukitha nosho wo yalwe kutya “okukala popepi naKalunga,” oshinima oshiwanawa kuye nokuyo wo. Omauwanawa geni hatu mono, ngele otwa ningi ngawo?

“OKUKALA POPEPI NAKALUNGA” OHAKU ETA ENYANYU

5. (a) Omolwashike okuhedha popepyeelela naJehova haku tu etele enyanyu? (b) Sha ikolelela kOmayeletumbulo 2:6-16, gandja iiholelwa yokondandalunde yankene uunongo waJehova tawu vulu oku ku etela uuwanawa noku ku gamena pauhandimwe.

⁵ Ngele otwa hedha popepi naJehova, otatu ka kala twa nyanyukwa. (Eps. 65:4) Opu na omatompelo ogendji gokukala twa nyanyukwa. Limwe lyomugo olyo kutya, ngele otwa tula miilonga owino ndjoka tayi adhika mOmbiimbeli, otatu ka mona mo uuwanawa. Owino ndjoka, ohayi tu gamene kenwethomo ewinayi nohayi tu kwathele wo kaatu ninge omayono ga kwata miiti. (Lesha Omayeletumbulo 2:6-16.) Nomolwaashoka Ombiimbeli ya ti: “Omunelago omuntu ngoka a likola owino, nomuntu ngoka a pewa oondunge.” — Omayel. 3:13.

6. Oshike sha ningitha omupisalomi a kanithe enyanyu lye?

⁶ Odhoshili kutya nookuume kaJehova, ohaya piti moonkalo dhi yemateka. Omunyoli gwEpisalomi 73 okwa li a kanitha enyanyu lye, sho a igandja komadhiladhilo omawinayi. Okwa tameke okukala a geya, molwaashoka okwa li ta dhiladhila kutya aantu mboka ihaaya longele Kalunga otaye shi enditha nawa monkalamwenyo, nokwa li nokuli a hala okukala e na shoka ye na. Onkene okwa li a thiki pehulithodhiladhilo lya puka kutya aantu mboka aakolokoshi noye na uuntsa, oya li aluhe aayamba noye na uukolele, noya li nokuli itaaya mono iihuna. (Eps. 73:3-7, 12) Pompito yimwe, omupisalomi okwa li a gwililwa po nokwa li ta ipula ngele oonkambadhala dhe dhokulongela Jehova otadhi ti sha ngaa. Okwa li e uvite nayi noonkondo nokwa popi a ti: “Itashi kwatha sha nani, sho ndi ikeelele kuuwinayi nonda kala inee yona?” — Eps. 73:13.

7. Uuna tu uvite nayi, oshike twa pumbwa okuninga? (Tala wo ethano .)

⁷ Omupisalomi ka li nando a etha ongeyo yi mu nkundipaleke. Okwa katuka oonkatu. Okwa yi “mongulu yaKalunga,” moka Jehova e mu kwathele a lundulule omadhiladhilo ge. (Eps. 73:17-19) Uuna twa yemata, Jehova Kuume ketu kopothingo oha kala e tu wete. Ngele otwa galikana kuye, e tu pe ewiliko nokutaamba ko ekwatho ndyoka te tu pe okupitila mOohapu dhe nomegongalo, otatu ka mona oonkondo tu idhidhimike uuna twa yemata. Nokuli nuuna twa gwililwa po kiimpwiyu, Jehova ote ke tu hekeleka. — Eps. 94:19.a

“OKUKALA POPEPI NAKALUNGA” OHAKU TU PE ELALAKANO NETEGAMENO

8. Omomikalo dhimwe dhini dha simana okukala popepi naKalunga haku tu etele uuwanawa?

⁸ Okukala popepi naKalunga ohaku tu etele ishewe uuwanawa momikalo mbali dha simana. Gwotango, onkalamwenyo yetu ohayi kala yi na eityo. Omutiyali, ohatu kala netegameno lya kola lyonakuyiwa. (Jer. 29:11) Natu ka kundathaneni uuwanawa mboka muule.

9. Okukala popepi naJehova ohaku ningitha ngiini onkalamwenyo yetu yi kale yi na eityo?

⁹ Okukala popepi naJehova ohaku tu etele enyanyu monkalamwenyo. Aantu oyendji mboka haya ti kutya Kalunga ke ko, ohaya dhiladhila kutya onkalamwenyo kayi na eityo noya itaala kutya monakuyiwa aantu itaya ka kala po we. Ihe sho twa konakona Oohapu dhaKalunga, otwa tompwa kutya Kalunga “oko e li nota futu ayehe mboka taye mu kongo.” (Heb. 11:6) Nokuli nongashingeyi, ohatu kala twa nyanyukwa monkalamwenyo, sho tatu longele Tate yetu gwomegulu, Jehova. — Deut. 10:12, 13.

10. Oohapu ndhoka dhi li mEpisalomi 37:29, otadhi holola shike kombinga yonakuyiwa yaamboka ye na etegameno muJehova?

¹⁰ Oyendji, kaye na etegameno lyashili lyonakuyiwa. Shampa owala taya yi kiilonga, taya putudha oyana nokupungula oshimaliwa ya ningila ngele ya penzelwa. Inaya tseya shoka Kalunga a uvaneka kombinga yonakuyiwa. Mepingathano naashoka, aapiya yaJehova oye na etegameno lya kankamena komauvaneko ge. (Eps. 25:3-5; 1 Tim. 6:17) Otwa inekela muKalunga ngoka twa hedha popepi naye notu na einekelo mwaashoka a uvaneka. Onakuyiwa yetu oya kwatela mo etegameno lyoku mu longela sigo aluhe mOparadisa. — Lesha Episalomi 37:29.

11. Oshike hashi ningwa po, uuna twa panga uukuume naKalunga, nohashi mu ningitha a kale e uvite ngiini?

¹¹ Okukala popepi naKalunga oshinima oshiwanawa kutse momikalo dhimwe odhindji. Pashiholelwa, Jehova oku uvaneka okudhima po omayono gaamboka ya iyela ombedhi noya hedha popepi naye. (Jes. 1:18) Oshizemo, inatu pumbwa okukala tatu ipe oombedhi omolwomayono ngoka twa ninga monakuziwa. (Eps. 32:1-5) Uuna twa nyanyudha Jehova, ohashi tu nyanyudha wo. (Omayel. 23:15) Oto vulu okudhiladhila komalalekonuuyamba gamwe, ngoka haga zi mokukala wu na ekwatathano lyopothingo naKalunga. Ongiini nduno to vulu okutsikila okukala popepi naKalunga?

NKENE TO VULU OKUTSIKILA “OKUKALA POPEPI NAKALUNGA”

12. Oshike wa ninga po, opo wu hedhe popepi naKalunga?

¹² Ngele owu li Omukriste a ninginithwa, owa hedha nale popepi naJehova. Owa ilonga oshili kombinga yaJehova Kalunga naKristus Jesus, owa itedhulula omolwomayono goye gomonakuziwa, owu na eitaalo lya kola muKalunga nowa ninga oonkambadhala wu kale metsokumwe nehalo lye. Ihe opo tu kale popepi naKalunga, otwa pumbwa okutsikila okuninga iinima mbyoka. — Kol. 2:6.

13. Iinima itatu yini, tayi vulu oku tu kwathela tu tsikile okuhedha popepi naJehova?

¹³ Oshike tashi ke tu kwathela tu tsikile okuhedha popepi naJehova? (1) Otwa pumbwa okutsikila okulesha nokukonakona Ombiimbeli. Sho tatu shi ningi, elalakano lyetu inali kala owala okwiilonga omalongo gopetameko kombinga yaKalunga. Pehala lyaashono, natu kambadhale okukonakona shoka Kalunga a hala tu ninge nokuwilikwa komakotampango ge ngoka taga adhika mOmbiimbeli. (Ef. 5:15-17) (2) Otwa pumbwa okukokeka eitaalo lyetu mokutedhatedha komikalo odhindji ndhoka tadhi ulike kutya oku tu hole. (3) Otwa pumbwa okutsikila okukala tu tonde iinima mbyoka hayi yemateke Jehova, nokuyanda okupanga uukuume naantu mboka haya longo iilonga ya tya ngawo. — Eps. 1:1; 101:3.

14. Metsokumwe nAakorinto yotango 10:31, iinima yini tatu vulu okuninga monkalamwenyo yesiku kehe tu nyanyudhe Jehova? (Tala wo omathano.)

¹⁴ Lesha Aakorinto yotango 10:31. Osha simana okukala hatu ningi iinima mbyoka hayi nyanyudha Jehova. Shika osha kwatela mo oshindji, kaashi shi owala oku ya muukalele nokokugongala. Iilonga mbyoka hayi nyanyudha Jehova, oya kwatela mo shoka hatu ningi esiku kehe. Pashiholelwa, uuna tu li aanashili miinima ayihe nokutopolelathana nayalwe shoka tu na, ohatu nyanyudha Jehova. (2 Kor. 8:21; 9:7) Okwa hala wo tu ulike kutya otwa lenga omagano gomwenyo. Ohatu hedha popepi nOmugandji gwomwenyo, mokukala hatu li iikulya yi na uundjolowele, hatu nu pandjele nokugandja eitulomo kuukolele wetu. Uuna Jehova e wete sho tatu kambadhala tu mu nyanyudhe mukehe shoka tatu ningi, oha kala e tu hole shi vulithe nale. — Luk. 16:10.

15. Jehova okwa tegelela tu ungaunge ngiini nayalwe?

¹⁵ Jehova oha ungaunga nawa naamboka aayuuki naamboka kaaye shi aayuuki. (Mat. 5:45) Okwa hala tu ningile yalwe sha faathana. Pashiholelwa, katu na ‘okupopila yalwe muuwinayi, okutamanana, ihe otu na okukala nolukeno naantu ayehe.’ (Tit. 3:2) Tu na oshinima shoka momadhiladhilo, katu na okukala twa dhina yalwe molwaashoka inaaya itaala shoka twa itaala. (2 Tim. 2:23-25) Ohatu hedha popepi naJehova mokuungaunga nayalwe nolukeno nokuulika kutya otu na ko nasha naantu ayehe.

OTATU VULU “OKUKALA POPEPI NAKALUNGA” NOKULI NUUNA TWA NINGA OMAPUKO

16. Konima yethimbo, omunyoli gwEpisalomi 73 okwa tameke okukala e uvite ngiini?

¹⁶ Ongiini ngele mokweendela ko kwethimbo, owa tameke okukala wu uvite kutya Jehova ke ku hole? Ngaashi sha kundathanwa, omunyoli gwEpisalomi 73, okwa li a ningilwa oshinima sha faathana. Okwa ti: “Ihe ngame ando nda kanitha einekelo; okonyala ndaa na we eitaalo.” (Eps. 73:2) Okwa li e shi zimine kutya “okwa geya” nokwa ninga “egoya,” ‘a fa oshiyamakuti’ koshipala shaJehova. (Eps. 73:21, 22) Mbela okwa li a thiki pehulithodhiladhilo kutya Jehova ke mu hole we noite ke mu dhimina po?

17. (a) Omupisalomi okwa li a ningi po shike, nokuli nuuna a li teka omukumo? (b) Oshiilongomwa shini tatu vulu okwiilonga koshimoniwa she? (Tala wo omathano.)

¹⁷ Ngele omupisalomi okwa li e uvite a ekelwahi kuJehova, omaiyuvo ngoka oga li owala gopakathimbo. Sho a li a teka omukumo, okwa ndhindhilike kutya okwa pumbwa okuhedha popepi naKalunga, sho a ti: “Ihe nando ongeyi, ondi li aluhe pungoye [Jehova]; owa kwata ndje koshikaha. Otandi wilikwa komaudhikilo goye, nopehulilo oto ka thikitha ndje meadhimo.” (Eps. 73:23, 24) Natse otatu vulu wo okupula Jehova e tu nkondopaleke, uuna tu uvite twa nkundipala notwa teka omukumo. (Eps. 73:26; 94:18) Nokuli nuuna twa yona sha kwata miiti, otatu vulu okugalukila kuJehova tu na einekelo kutya okwiilongekidha oku tu ‘dhimina po.’ (Eps. 86:5) Otwa pumbwa okuhedha popepi naKalunga ketu, unene tuu uuna twa gwililwa po. — Eps. 103:13, 14.

“OKUKALA POPEPI NAKALUNGA” SIGO ALUHE

18. Omolwashike tu na okutsikila okuhedha popepi naJehova sigo aluhe?

¹⁸ Otatu vulu okutsikila okuhedha popepi naJehova sigo aluhe nokwiilonga oshindji kombinga ye. Ombiimbeli otayi ti kutya oondjila dhaJehova, uunongo nontseyo ye ‘kapu na ngoka ta vulu oku yi uva ko.’ — Rom. 11:33.

19. Oohapu dhEpisalomi 73 otadhi tu pe eshilipaleko lini?

¹⁹ Episalomi 79:13 otali ti: “Otse aantu yoye noonzi dhuusita woye; otatu ku pandula aluhe notatu ku hambelele aluhe sigo aluhe.” Sho to tsikile nokuhedha popepi naJehova, nangoye wo oto vulu okukala wa shilipalekwa kutya oto ka mona omalalekonuuyamba taga kalelele noto vulu okupopya nomukumo to ti: “Kalunga oye oonkondo dhandje; oye awike nda pumbwa.” — Eps. 73:26.