Mbela owi “ilonga oshiholekwa” shokukala wa gwanenwa?

1. Okukala twa gwanenwa, nokukala inaatu gwanenwa osha hala okutya ngiini?

MBELA owa gwanenwa kwaashoka wu na? Omuntu ngoka a gwanenwa oha kala e na enyanyu nombili, uuna ta gandja eitulomo komayambeko ngoka e na. Iha kala a lulilwa nenge a geya omolwiinima mbyoka kee na. Nonando ongawo, okukala twa gwanenwa inashi hala okutya katu na ko nasha niinima yilwe. Pashiholelwa, inashi puka kOmukriste okukala a hala okulonga oshindji miilonga yaJehova. (Rom. 12:1; 1 Tim. 3:1) Nonando ongawo, Omukriste iha kanitha enyanyu lye ngele ina mona uuthembahenda miilonga yaJehova nziya ngaashi a li a tegelela.

2. Omolwashike sha nika oshiponga okukala inaatu gwanenwa?

² Okukala inaatu gwanenwa otaku vulu oku tu etela iilanduliko ya kwata miiti. Mboka inaaya gwanenwa kwaashoka ye na otashi vulika ya longe oowili odhindji, opo yi ilikolele iinima yopamaliko mbyoka inaaya pumbwa naanaa. Shiyemateka, Aakriste yamwe oya li ya yaka iimaliwa niinima yilwe mbyoka ya li ya hala. Otashi vulika ya li yi ipopile taya ti, ‘Oshinima shika onde shi pumbwa,’ ‘onda kala nda tegelela ethimbo nuule,’ nenge ‘oshimaliwa otandi ke shi futila po nale.’ Ihe Jehova ina hokwa okuyaka kwoludhi kehe, noihaku mu simanekitha. (Omayel. 30:9) Yamwe oya li ya uvu nayi noonkondo sho inaaya pewa oshinakugwanithwa shontumba miilonga yaJehova, naashono oshe ya ningitha ya ethe po okulongela Jehova. (Gal. 6:9) Mbela omolwashike omupiya gwaJehova ngoka e mu iyapulila, e na okuninga oshinima sha tya ngawo? Otashi vulika omuntu ngoka inaa gwanenwa we ngaashi nale.

3. Oshiilongomwa shini tashi tsu omukumo tatu ilongo mAafilippi 4:11, 12?

³ Atuheni otatu vulu okukala twa gwanenwa. Omuyapostoli Paulus okwa nyola a ti: “Onda ilonga okukala nda gwanenwa monkalo kehe.” (Lesha Aafilippi 4:11, 12.) Okwa nyola oohapu ndhoka sho a li mondholongo. Nonando ongawo, ka li a kanitha enyanyu lye. Okwi “ilonga oshiholekwa” shokukala a gwanenwa. Ngele ohatu mono oshidhigu okukala twa gwanenwa, oohapu dhaPaulus nosho wo oshimoniwa she, otayi vulu oku tu shilipaleka kutya otatu vulu okukala twa gwanenwa. Inashi hala okutya oshipu okukala tu uvite twa gwanenwa moonkalo dhetu. Pehala lyaashono, otwa pumbwa okwiilonga okukala twa gwanenwa. Ngiini mbela? Natu ka kundathaneni omaukwatya, ngoka taga vulu oku tu kwathela tu ilonge oshiholekwa shokukala twa gwanenwa.

OKUKALA TU NA OLUPANDU

4. Omolwashike okukala tu na olupandu haku tu kwathele tu kale twa gwanenwa? (1 Aatessalonika 5:18)

⁴ Omuntu ngoka e na olupandu oha kala aluhe a gwanenwa. (Lesha 1 Aatessalonika 5:18.) Pashiholelwa, ngele ohatu ulike kutya otwa pandula oompumbwe dhakehe esiku ndhoka tu na, itatu ka kala tatu ipula unene niinima mbyoka kaatu na. Uuna tatu ulike olupandu omolwuuthembahenda mboka tu na miilonga yaJehova ngashingeyi, otatu ka gandja eitulomo kokuninga shoka sha dhenga mbanda miilonga mbyoka, pehala lyokukala tatu gandja eitulomo kunkene tatu vulu okupewa oshinakugwanithwa shilwe shoka twa hala. Onkee ano Omanyolo tage tu ladhipike tu kale hatu pandula Jehova momagalikano getu. Okuulika olupandu ohaku tu kwathele tu kale tu uvite ‘ombili yaKalunga, ndjoka yi vule uunongo auhe.’ — Fil. 4:6, 7.

5. Omolwomatompelo geni tashi vulika Aaisraeli ya li ya ulike olupandu? (Tala wo ethano.)

⁵ Natu ka taleni kwaashoka sha li sha ningilwa Aaisraeli. Poompito odhindji oya li haya ngungutula kuJehova molwaashoka ya li ya hala okulya iikulya mbyoka ya li haya li nale muEgipiti. (Num. 11:4-6) Odhoshili kutya onkalamwenyo kaya li ompu mombuga. Oshike tashi vulika sha li she ya kwathele ya kale ya gwanenwa? Oya li ye na okudhiladhila nolupandu kwaashoka Jehova e ya ningila. Sho ya li muEgipiti, moka ya li haya ungaungiwa nayo nonyanya, Jehova okwa li a tumine Aaegipiti omageelo omulongo. Konima sho Aaisraeli ya mangululwa muupika, oya li ya “faalele uuyamba wAayegipiti,” ngaashi oshisiliveli, oshingoli noonguwo. (Eks. 12:35, 36) Sho Aaisraeli ya li ya kondekelwa pokati ketangakwiita lyaFarao nEfuta Etiligane, Jehova okwa li a topola efuta pokati pashikumithalonga. Sho ya li taya ende mombuga okwa li e ya palutha nomanna esiku kehe. Uupyakadhi owa li peni nduno? Aaisraeli kaya li ya gwanenwa, hamolwaashoka ando kaaya li ye na iikulya ya gwana, ihe oosho inaaya ulika olupandu omolwiinima mbyoka Jehova e ya ningila.

6. Omomikalo dhini tatu vulu okukala tu na olupandu?

⁶ Ongiini nduno to vulu okukala wu na olupandu? Tango, konga ethimbo esiku kehe wu dhiladhile kombinga yiinima mbyoka ho nyanyukilwa. Oto vulu wu nyole kombinga yiinima iyali nenge itatu mbyoka wa pandula. (Oontak. 3:22, 23) Oshitiyali, ulika kutya owu na olupandu. Katuka onkatu yotango wu pandule yalwe omolwiinima mbyoka ye ku ningila. Shoka sha simanenena, pandula Jehova esiku kehe. (Eps. 75:1) Oshititatu, panga uukuume naamboka ye na olupandu. Onkee ano ngele otwa panga uukuume naantu mboka ye na olupandu, natse otatu ka kala tu lu na, ihe ngele otwa panga uukuume naantu mboka kaaye na olupandu otaye ke tu nwetha mo natse kaatu kale tu na olupandu. (Deut. 1:26-28; 2 Tim. 3:1, 2, 5) Ngele otwa kala hatu gandja eitulomo kokuulika olupandu, otashi ke tu kwathela tu kale twa gwanenwa naashoka tu na.

7. Aci okwa li a ulike ngiini olupandu, noshizemo oshini?

⁷ Natu ka taleni shoka sha li sha ningilwa Aci, ngoka ha zi moIndonesia. Okwe shi zimine a ti: “Pethimbo lyomukithi gwekomba COVID-19,” onda tameke okuyelekanitha oonkalo dhandje naandhoka dhooitaali ooyakwetu. Noshizemo, onda tameke okukala inaandi gwanenwa.” (Gal. 6:4) Oshike sha li she mu kwathele a ninge elunduluko? Aci okwa ti: “Onda tameke okugandja eitulomo komayambeko ngoka Jehova ha pe ndje esiku kehe nokudhiladhila kiinima oyindji mbyoka ndi na, sho nda kala oshitopolwa shehangano lyaKalunga. Opo nduno onda li nda ulike olupandu lwandje kuJehova. Oshizemo, onda kala ndi uvite nda gwanenwa shili.” Ngele owa gwililwa po komadhiladhilo omawinayi, mbela ito vulu okuninga ngaashi Aci a li a ningi, opo wu ulike olupandu?

GANDJA EITULOMO KONAKUYIWA NOKUKALA OMWIIFUPIPIKI

8. Oshike sha li sha ningilwa Baruk?

⁸ Baruk, amushanga gwomuhunganeki Jeremia, okwa li i iyadha inaa gwanenwa. Baruk okwa li e na oshinakugwanithwa oshidhigu shokuyambidhidha Jeremia, sho a li ta ka gandja etumwalaka edhigu koshigwana shoka shaa na olupandu. Pompito yimwe, Baruk ka li we a gandja eitulomo. Pehala lyokugandja eitulomo kwaashoka Jehova a li a hala a longe, okwa tameke okudhiladhila unene kombinga ye mwene nosho wo shoka a li a hala okuninga. Jehova okwa li a lombwele Baruk okupitila muJeremia a ti: “Oto ikongele iinima iinene? Ino yi konga.” (Jer. 45:3-5) Niitya yimwe okwa li ta ti: “Kala wa gwanenwa moonkalo ndhoka wu li.” Baruk okwa li a taamba ko epukululo, nokwa tsikile okunyanyukilwa okulongela Jehova.

9. 1 Aakorinto 4:6, 7 otaye tu kwathele ngiini tu kale tu na etaloko li li pandjele ngele tashi ya piinakugwanithwa? (Tala wo omathano.)

⁹ Omathimbo gamwe, Omukriste otashi vulika a kale e uvite a gwana okupewa oshinakugwanithwa shontumba miilonga yaJehova. Otashi vulika a kale e uvite ngawo molwaashoka oku na uunkulungu, ha longo nuudhiginini nenge a longela Jehova uule womimvo odhindji. Yamwe otashi vulika ya pewe oshinakugwanithwa shoka a li a hala okupewa. Mbela oshike tashi vulu oku mu kwathela kaa kale e uvite nayi? Ota vulu okudhiladhila kwaashoka omuyapostoli Paulus a nyola mAakorinto yotango 4:6, 7. (Lesha.) Oshinakugwanithwa nenge uunkulungu kehe tu na owa za kuJehova. Ihe tu pe omagano ngoka molwaashoka andola twa simana tu vule yalwe, ihe ohe ge tu pe molwaashoka oku tu hole nomolwuuwanawahenda we. — Rom. 12:3, 6; Ef. 2:8, 9.

10. Ongiini tatu vulu okukokeka eifupipiko?

¹⁰ Otatu vulu okukokeka eifupipiko mokutedhatedha koshiholelwa shaJesus shoka e tu tulila po. Tala kwaashoka sha li sha ningwa po ongulohi ndjoka Jesus a yogo oompadhi dhaayapostoli ye. Omuyapostoli Johannes okwa nyola a ti: ‘Jesus okwa li e shi kutya [1] He okwe mu pa iinima ayihe nosho wo kutya [2] okwa za kuKalunga, [3] nota shuna kuye. Okwa tameke okuyoga oompadhi dhaalongwa ye.’ (Joh. 13:3-5) Jesus okwa li ta vulu okukala e uvite kutya aayapostoli ye oyo ya gwana okuyoga oompadhi dhe. Ihe Jesus ka li e uvite kutya molwaashoka ye Omuna gwaKalunga, oku na okukala e na egumbo ewanawa, iimaliwa oyindji nenge onkalamwenyo yuuzeko. (Luk. 9:58) Okwa li omwiifupipiki nokwa gwanenwa. Okwe tu tulila po oshiholelwa sha dhenga mbanda. — Joh. 13:15.

11. Eifupipiko olya li lya kwathele ngiini Dennis, a kale e uvite a gwanenwa?

¹¹ Dennis, gwokoNetherlands, okwa li a kambadhala okulandula oshiholelwa shaJesus sheifupipiko, ihe kasha li oshipu. Okwa ti: “Uuna gumwe a pewa oshinakugwanithwa shoka nda li nda hala, omathimbo gamwe ohashi uvitha ndje nayi, molwaashoka ohandi dhiladhila kutya ongame nda li nda gwana oku shi pewa.” Ngele shoka sha ningwa, ohandi konakona oshikundathanwa kombinga yeifupipiko. Mopolohalama yoJW Library, onda ninga mo omandhindhilikoshango gomanyolo ngoka taga popi kombinga yeifupipiko, opo ndi vule oku ga mona nuupu noku ga leshulula. Mongodhi yandje onda tapela mo wo iipopiwa yimwe mbyoka tayi popi kombinga yeifupipiko nolundji ohandi pulakene kuyo.a Ondi ilonga kutya iilonga ayihe hatu longo, ohatu yi longo opo tu simanekithe Jehova, ihe hatse yene. Kehe gumwe gwomutse ota dhana onkandangala mwaashoka Jehova ta gwanitha po.” Ngele owa tameke okukala wu uvite inoo gwanenwa kwaashoka wu na, katuka oonkatu wu kokeke eifupipiko. Shika otashi ka koleka uukuume woye naJehova notashi ke ku kwathela wu kale wa gwanenwa. — Jak. 4:6, 8.

TEDHATEDHA KETEGAMENO LYOYE LYONAKUYIWA

12. Etegameno lini lyonakuyiwa tali tu kwathele tu kale twa gwanenwa? (Jesaja 65:21-25)

¹² Ohatu kala tu uvite twa gwanenwa lela, uuna tatu tedhatedha ketegameno ewanawa lyonakuyiwa ndyoka Jehova a uvaneka. Oohapu dhaJehova ndhoka tadhi adhika membo lyomuhunganeki Jesaja otadhi tu lombwele nkene onkalamwenyo ya dhigupala kunena, notadhi tu shilipaleke nkene Jehova ta ka kutha po omaupyakadhi ngoka. (Lesha Jesaja 65:21-25.) Otatu ka kala tu na omagumbo omawanawa noga gamenwa. Otatu ka kala tu na iilonga tayi ti sha, notatu ka lya iikulya yi na uukolele notayi tokola elaka. Itatu ki ipula we kombinga yiiponga mbyoka hayi tu adha, nenge mbyoka hayi adha oyana yetu. (Jes. 32:17, 18; Hes. 34:25) Otatu ka kala nonakuyiwa ombwanawa notwa gamenwa.

13. Omoonkalo dhini tashi vulika twa pumbwa unene okugandja eitulomo ketegameno lyetu?

¹³ Otwa pumbwa okugandja eitulomo ketegameno lyetu ngashingeyi shi vulithe nale. Omolwashike mbela? Omolwaashoka otu li “momasiku gahugunina,” na atuheni otu na omaupyakadhi ngoka “omadhigu okukaliwa mugo.” (2 Tim. 3:1, NW) Jehova ohe tu kwathele kehe siku tu idhidhimike moku tu pa ewiliko, oonkondo nekwatho ndyoka twa pumbwa. (Eps. 145:14) Shimwe ishewe, etegameno lyetu lyoPakriste ohali tu kwathele uuna tu li momathimbo omadhigu. Otashi vulika ho mono oshidhigu okusila oshimpwiyu aanegumbo lyoye. Mbela shono osha hala okutya oto ka kala monkalo ndjono sigo aluhe? Hasho nando. Jehova oku uvaneka oku ku pa shoka wa pumbwa, nosho wo iinima oyindji moParadisa. (Eps. 9:18; 72:12-14) Otashi vulika to ungaunga nuuwehame, epolimano nenge nuuvu wa kwata miiti esiku kehe. Mbela oto ka kala owala to mono iihuna sigo aluhe nopwaa na etegameno lyasha? Hasho nando. Muuyuni uupe waKalunga, itamu ka kala we uuwehame neso. (Eh. 21:3, 4) Etegameno ndyoka ohali tu kwathele tu kale twa gwanenwa nokaa tu kale tu uvite nayi nenge twa geya kombinga yaashoka tashi tu ningilwa ngashingeyi. Otatu vulu okukala twa nyanyukwa, nonando otwa taalela okwaanuuyuuki, twa silwa, tatu idhidhimikile uuwehame nenge uupyakadhi wi ili. Omolwashike mbela? Oshoka kutya nduno otwi iyadhe momashongo ga tya ngiini ngashingeyi, otu shi kutya “omaudhigu ngoka twa taalela ogopakathimbo,” nosho wo kutya muuyuni uupe itatu ka mona we iihuna. — 2 Kor. 4:17, 18.

14. Ongiini tatu vulu okukoleka etegameno lyetu?

¹⁴ Molwaashoka etegameno lyetu lyonakuyiwa otali vulu oku tu kwathela tu kale twa gwanenwa, oshike tashi vulu oku tu kwathela tu kale tu na uushili kutya omauvaneko gaJehova otaga ka gwanithwa po? Ngaashi owala omuntu ngoka ha zala omakende a pumbwa oku ga zala opo a mone iinima mbyoka yi li kokule, otwa pumbwa okukatuka oonkatu opo tu koleke etegameno lyetu naashono otashi ke tu kwathela tu kale tu iwete twa fa tu li moParadisa. Pashiholelwa, uuna tatu ipula kombinga yoshimaliwa, otatu vulu okudhiladhila kunkene onkalamwenyo tayi ka kala ya tya, uuna itaatu ka kala we twa pumbwa iimaliwa noka pu na ngoka ta ka kala a hepa. Ngele otu na iimpwiyu kombinga yiinakugwanithwa mbyoka inaatu pewa natango mehangano lyaJehova, otatu vulu okudhiladhila kombinga yiinima mbyoka kutya inayi simana okuyelekanitha nonkalamwenyo ombwanawa ndjoka tatu ka kala tu na sho twa gwanenena. (1 Tim. 6:19) Ohatu kala tatu ipula unene kombinga yiinima mbyoka tayi ningwa ngashingeyi, shoka hashi shi ningitha tu shi mone oshidhigu okutedhatedha konakuyiwa. Ihe ngele otwa kala hatu dhiladhila kombinga yonakuyiwa ombwanawa ndjoka Jehova e tu uvanekela, otashi ka kala oshipu kutse kaatu gandje eitulomo komaupyakadhi getu.

15. Oshike tatu ilongo komatyokosha gaChrista?

¹⁵ Tala nkene etegameno lya li lya kwathele Christa, ngoka a hokanwa kuDennis, ngoka a popiwa metetekelo. Okwa ti: “Ondi na uuvu mboka hawu ningitha ndje ndi kale kaandi na oonkondo, shoka hashi ningitha ndje ndi longithe okatemba nondi kale nda lala ethimbo olindji. Ohandi kala muuwehame esiku kehe. Ndohotola okwa li a lombwele ndje kutya onkalo yandje itayi ka hwepopala. Ihe ondi ipopile te ti, ‘Onakuyiwa ine yi tala ko ngaashi nde yi tala ko.’ Ngame otandi gandja eitulomo ketegameno lyandje ndyoka hali pe ndje ombili yopamadhiladhilo. Kunena ondi na okwiidhidhimikila omaupyakadhi ogendji muuyuni mbuka, ihe otandi ka kala nda nyanyukwa muuyuni uupe.”

“MBOKA HAA VULIKA KOMUWA, OYE NA UUKALI AUHE”

16. Omolwashike omukwaniilwa David a nyola kutya mboka haa vulika kuJehova “oye na uukali auhe”?

¹⁶ Omupiya gwaJehova ngoka a gwanenwa kwaashoka e na, natango oha adhika komaupyakadhi. Omukwaniilwa David okwa li a silwa oyana yatatu. Okwa li a lundilwa, a gwaalekwa, nagumwe okwa li a kambadhala oku mu dhipaga. Nonando okwa li ti idhidhimikile omashongo ngoka, okwa popi kombinga yaJehova a ti: “Mboka haa vulika kOmuwa, oye na uukali auhe.” (Eps. 34:9, 10) Omolwashike a tile ngawo? Omolwaashoka tu li oshigwana shaJehova, otu shi kutya ohatu adhika komashongo monkalamwenyo, ihe otu na uushili kutya otatu ka kala tu na ashihe shoka twa pumbwa. (Eps. 145:16) Ngaashi David, otatu vulu okukala nuushili kutya Jehova ote ke tu kwathela tu idhidhimikile omashongo. Otatu vulu okukala twa gwanenwa.

17. Omolwashike wa tokola okwiilonga oshiholekwa shokukala wa gwanenwa?

¹⁷ Jehova okwa hala wu kale wa gwanenwa. (Eps. 131:1, 2) Onkee ninga oonkambadhala wi ilonge oshiholekwa shokukala wa gwanenwa. Ngele owa longo nuudhiginini opo wu kale wu na olupandu, wu gandje eitulomo konakuyiwa nokukala omwiifupipiki, nowu koleke etegameno lyoye lyonakuyiwa, oto ka vula okupopya to ti: “Onda gwanenwa.” — Eps. 16:5, 6.