Ontopolwa 47

Ongiini tatu vulu okumona kutya Armagedon oku li popepi?

MBELA owu shi kutya endhindhiliko oshike?— MOntopolwa 46 otwa li twa lesha kombinga yendhindhiliko ndyoka Kalunga a gandja kutya ita ka hanagula po we nando uuyuni neyelu. Aayapostoli nayo oya li ya pula shi na ko nasha nendhindhiliko opo ya tseye kutya opethimbo lini Jesus ta ka galuka nonokutya oshike tashi ku ulika kutya ehulilo oli li popepi.—Mateus 24:3.

Molwaashoka Jesus okwa li ta ka kala megulu kee wetike, opwa li pwa pumbiwa endhindhiliko ndyoka aantu taya vulu okumona opo ya vule okumona kutya Jesus okwa tameka okupangela. Onkee ano, Jesus okwa li a lombwele aalongwa ye kombinga yiinima mbyoka ye na okukala ya kotokela huka kombanda yevi. Ngele iinima mbyoka ya tameke okuningwa, otashi ti kutya Jesus okwa galuka nokwa tameka okupangela megulu e li Omukwaniilwa.

Opo Jesus a longe aalongwa ye esimano lyokukala ya tonata, okwa li e ya lombwele a ti: ‘Taleni omukwiyu nomiti adhihe. Nge tadhi zizi, nane yene tamu dhimbulula, othinge ya thiki popepi.’ Omu shi uuna othinge yi li popepi. Otamu vulu wo okutseya kutya Armagedon oku li popepi ngele tamu mono iinima mbyoka ya popiwa kuJesus tayi ningwa.—Lukas 21:29,30.

Pepandja ndika naandyoka tali landula, otatu ka gandja eitulomo komathano giinima mbyoka Jesus a ti kutya otayi ka kala oshitopolwa shendhindhiliko ndyoka tali ku ulika kutya Uukwaniilwa waKalunga owu li popepi. Ngele iinima ayihe mbika tayi ningwa, Uukwaniilwa waKalunga mboka Kristus e li Omupangeli gwawo, otawu ka hanagula po omapangelo galwe agehe, ngaashi twe shi lesha mOntopolwa46.

Onkee ano, tala nawa omathano ngoka ge li pomapandja gaali ga tetekele epandja ndika e tatu kundathana kombinga yago. Oto vulu okulesha kombinga yaashoka wu wete momathano ngaka muMateus 24:6-14 nomuLukas 21:9-11. Ndhindhilika wo kutya pethano kehe opu na onomola. Onomola oyo tuu ndjoka otayi adhika petameko lyokatendo hoka taka hokolola ethano ndyoka. Ngashingeyi natu tale ngele oyindji yomiitopolwa yendhindhiliko ndyoka lya gandjwa kuJesus otayi gwanithwa kunena.

(1) Jesus okwa ti: ‘Otamu ka uva omalugodhi noonkundana dhomalugodhi. Iigwana otayi ka thikama okukondjithathana, iilongo otayi ka matukilathana.’ Mbela owu uva nale oonkundana kombinga yiita?— Iita yotango yuuyuni oya li tameke mo1914 sigo omo1918 nopo nduno opwa li wo Iita iitiyali yUuyuni mo1939 sigo omo1945. Muuyuni auhe kamwa li nando onale iita, ihe ngashingeyi omu na iita. Ohatu uvu oonkundana dhi na ko nasha niita esiku kehe ko-TV, koradio nosho wo miifokundaneki.

(2) Jesus okwa popi ishewe a ti: ‘Otaku ke ya oondjala nomakakamo gevi okoombinga noombinga.’ Ngaashi wu shi shi, hakehe gumwe e na iikulya ya gwana. Esiku kehe aantu omayovi ohaya si molwaashoka kaaye na iikulya ya gwana.

(3) Jesus okwa gwedha ko a ti: ‘Otaku ke ya omalega koombinga noombinga.’ Mbela owu shi kutya elega oshike?— Elega olyo omukithi ngoka hagu dhipaga aantu oyendji. Omukithi gumwe omudhigu hagu ithanwa egwililila lyaSpania ogwa li gwa dhipaga aantu omamiliyona 20 lwaampono muule owala womvula yimwe. Pethimbo lyetu aantu ye vulithe pomamiliyona 20 otashi vulika ya se komukithi gwo-AIDS. Opu na wo okankera, uuvu womutima nomikithi dhilwe ndhoka hadhi dhipaga aantu omayovi ogendji omvula kehe.

(4) Jesus okwa gandja wo oshitopolwa shilwe shendhindhiliko sho a ti: ‘Otaku ke ya omakakamo gevi okoombinga noombinga.’ Mbela owu shi kutya ekakamo lyevi oshike?— Ekakamo lyevi ohali kakamitha evi. Ohali teya po omagumbo nolundji ohali dhipaga aantu. Okuza mo1914 opwa kala tapu ningwa omakakamo gevi ogendji omumvo kehe. Mbela ngoye owu uva ngaa nale kombinga yekakamo lyevi?—

(5) Jesus okwa ti wo kutya ‘uulunde otawu ka lunda pombanda.’ Osho molwaashoka pu na okuyaka okundji nelongitho lyoonkondo olindji. Aantu kehe pamwe ohaya kala ya tila kutya pamwe omagumbo gawo otaga tewa kuyalwe. Inapu kala nando onale omiyonena odhindji nelongitho lyoonkondo miitopolwa ayihe yuuyuni ngaashi shi li kunena.

(6) Jesus okwa li a gandja oshitopolwa shendhindhiliko shoka sha simana noonkondo sho a ti: ‘Onkundana ndjika ombwanawa yuukwaniilwa otayi ku uvithilwa aantu ayehe, yi ningile iigwana ayihe uunzapo; notaku ya ihe ehulilo.’ (Mateus 24:14, KB) Ngele owi itaala “onkundana ndjika ombwanawa,” owu na okulombwela yalwe shi na ko nasha nayo. Komukalo ngoka, oto vulu okukutha ombinga megwanitho lyoshitopolwa shika shendhindhiliko.

Aantu yamwe otashi vulika ya tye kutya iinima mbyoka Jesus a hunganeka oya kala nale tayi ningwa. Ihe iinima ayihe ya tya ngawo, inayi kala nando tayi ningwa miilongo oyindji muuyuni nopethimbo limwe ngaashi shi li kunena. Mbela ngashingeyi owu uvite ko kutya endhindhiliko otali ti shike?— Otashi ti kutya ngele otwa mono iinima ayihe mbyoka tayi ningwa, otashi ulike kutya uuyuni mbuka wa kolokosha owu li pokupingenwa po kuuyuni uupe waKalunga.

Sho Jesus a li a popi shi na ko nasha nendhindhiliko, okwa li wo a popi ethimbo lyomumvo lyi ikalekelwa. Okwa popi a ti: “Galikaneni, okufadhuka po kweni kwaa ningwe pokufu.” (Mateus 24:20) Mbela sho to dhiladhila Jesus okwa li a hala okutya shike sho a popi oohapu ndhoka?—

Oshike tashi vulu okuningwa po ngele omuntu oku na okufadhuka po oshiponga shontumba oshinene pethimbo lyokufu, mpoka onkalo yombepo hayi shi ningi oshidhigu noonkondo nenge nokuli sha nika oshiponga okuya kehala lyontumba?— Ngele omuntu ngoka okwe shi pondola, oku na okukala a kondja nuudhiginini. Mbela itashi ka kala shiyemateka ngele gumwe ta sile moshikungulu molwaashoka owala a li i ipyakidhila nokulonga iilonga yilwe pehala lyokufadhuka po mbala?—

Mbela owu uvite kutya Jesus okwa li a hala okutya shike sho a popi kombinga yokwaaha tegelela sigo okufu kwe ya opo wu fadhuke po?— Okwa li te tu lombwele kutya molwaashoka otu shi shi kutya Armagedon oku li popepi, inatu kakadhala okukatuka onkatu okuulika kutya otu hole Kalunga moku mu longela. Ngele otwa kakadhala, itatu ka mona we ethimbo lyoku mu longela. Onkee ano, otatu ka kala owala twa fa aantu yopethimbo lyEyelu mboka ya li yu uvu elondodho lyaNoowa, ihe inaya ya monguluwato.

Oshikando tashi landula otatu ka kundathana kutya oshike tashi ka ningwa po konima yiita iinene yaArmagedon. Otatu ki ilonga shoka Kalunga ta ka ningila ayehe mboka ye mu hole notaye mu longele ngashingeyi.

Omanyolo taga landula otagu ulike wo kutya Armagedon oku li popepi: 2 Timoteus 3:1-5 nosho wo 2 Petrus 3:3,4.

[Omathano pepandja 244-246]

Oshiilongomwa shini Jesus a li ta longo aantu sho a popi kombinga yomukwiyu?

[Ethano pepandja 249]

Sho Jesus a li a popi kombinga yokufadhuka po pethimbo lyokufu, okwa li ta longo aantu oshiilongomwa shini?