Onkandangala ndjoka ombepo ondjapuki hayi dhana mokugwanithwa kwelalakano lyaJehova
“Oohapu dhandje tadhi zi mokana kandje . . . otadhi tsakanitha elalakano ndyoka nde dhi li tumine.”—JES. 55:11.
1. Gandja ethaneko ndyoka tali thaneke eyooloko ndyoka li li pokati kompangela nelalakano.
DHILADHILA ando wu wete aalumentu yaali kehe gumwe ti ilongekidhile okuya molweendo nohauto. Gumwe oku ulike mokaalita ondjila ndjoka yu ukilila hoka ta yi. Omukwawo oku shi hoka ta yi, ihe oku shi wo oondjila odhindji ndhoka ta vulu okuya nadho. Okwi ilongekidha okweenda mondjila yimwe yi ili ngele pwa holoka onkalo ndjoka tayi pula a ninge elunduluko. Omikalo dha yoolokathana ndhoka dha longithwa kaalumentu mbaka yaali otadhi thaneke eyooloko ndyoka li li pokati kompangela nelalakano momikalo dhontumba. Ompangela otayi vulu okuyelekwa nokutongolola ko ondjila ndjoka yi shiwike nawa, omanga elalakano tali vulu okukala lya kwatela mo okukala wu na elalakano lyontumba momadhiladhilo ihe ku na owala oku li gwanitha po to longitha omukalo gumwe.
2, 3. (a) Elalakano lyaJehova olya kwatela mo shike, nongiini a li u ungaunga nonkalo ndjoka ya li ya holoka po sho Adam naEva ya yono? (b) Omolwashike tu na okukatuka metsokumwe nelalakano lyaJehova ndyoka itaali kala inaali gwanithwa?
2 Uuna tashi ya pokugwanitha po elalakano lye, Jehova ke na owala omukalo gumwe gwoku li gwanitha po, ihe elalakano ndyoka tali gwanithwa momukokomoko gwethimbo. (Ef. 3:11) Elalakano ndika olya kwatela mo shoka a li a lalakanenena aantu nosho wo evi petameko, sha hala okutya, evi ndika li lundululwe li ninge oparadisa moka aantu ya gwanenena taya ka kala nombili noya nyanyukwa sigo aluhe. (Gen. 1:28) Sho Adam naEva ya yono, Jehova okwa li a yi mo olunyala moshinima shoka nokwa li a ningi po elongekidho opo a shilipaleke kutya elalakano lye otali ka gwanithwa. (Lesha Genesis 3:15.) Jehova okwa li a tokola kutya omukiintu gwe gwopathaneko ote ke eta po ‘oluvalo’ nenge omwanamati ngoka hugunina ta ka hanagula po omutsi gwomaminimini, Satana, nokukutha po uuwinayi auhe mboka we etwa po kuye.—Heb. 2:14; 1 Joh. 3:8.
3 Kapu na oonkondo megulu nenge kombanda yevi tadhi vulu okukeelela Kalunga a gwanithe po elalakano lye. (Jes. 46:9-11) Omolwashike tatu vulu okutya ngaaka? Omolwaashoka ombepo ondjapuki yaKalunga oya kwatelwa mo. Oonkondo ndhoka ihaadhi vulu okwiimbwa kusha ohadhi shilipaleke kutya elalakano lyaKalunga ‘olya tsakanithwa.’ (Jes. 55:10, 11) Otwa pumbwa okukala twa kotoka nokukatuka metsokumwe nankene Kalunga ha gwanitha po elalakano lye. Etimaumbwile lyonakuyiwa yetu olyi ikolelela kegwanitho lyawo. Natango otashi koleke eitaalo lyetu uuna tatu mono nkene Jehova ha longitha ombepo ondjapuki ye. Natu ka kundathane nduno onkandangala ndjoka ombepo ya dhana nale, ndjoka tayi dhana ngashingeyi naashoka tayi ka ninga monakuyiwa mokugwanitha po elalakano lyaJehova.
Onkandangala ndjoka ombepo ondjapuki ya dhana nale
4. Ongiini Jehova a li a holola kashona nakashona elalakano lye?
4 Pethimbo lyOmbiimbeli, Jehova okwe ende kashona nakashona ta holola elalakano lye. Petameko, Oluvalo lu uvanekwa olwa li “oshiholekwa oshiyapuki.” (1 Kor. 2:7, NW) Jehova okwa li a popi owala ishewe kombinga yoluvalo konima yoomvula konyala 2 000. (Lesha Genesis 12:7; 22:15-18.) Okwa li u uvanekele Abraham euvaneko ndyoka lya li tali ka kala li na egwanitho enene. Oohapu ndhoka “omungoye nomoluvalo lwoye” odha li dhu ulike sha yela kutya Oluvalo olwa li talu ka ninga omuntu, e li oluvalo lwaAbraham. Otatu vulu okukala nuushili kutya Satana okwa li ta tala nohokwe onene sho uuyelele mbuka wa li tawu hololwa. Osha yela kutya Omutondi ngoka okwa li owala a hala okuhanagula nenge okuyonagula po oluvalo lwaAbraham opo a ye moshipala elalakano lyaKalunga. Ihe oshinima sha tya ngaaka kasha li tashi vulu okuningwa, molwaashoka ombepo yaKalunga ihaayi monika oya li tayi longo. Omomikalo dhini mbela?
5, 6. Ongiini Jehova a li a longitha ombepo ye opo a gamene oohandimwe mezimo moka mwa ka za Oluvalo?
5 Jehova okwa li a longitha ombepo ye opo a gamene oohandimwe yomezimo moka mwa ka za Oluvalo. Jehova okwa li a lombwele Abraham a ti: “Otandi ku shigi kiiponga.” (Gen. 15:1) Ndhoka kadha li oohapu dhowala. Pashiholelwa, tala kwaashoka sha li sha ningwa po mo 1919 K.E.N., sho Abraham naSara ya li ya kala muGerar uule wokathimbo. Abimelek, omukwaniilwa gwaGerar mokwaahashi sha kutya Sara omukulukadhi gwaAbraham, okwa kutha po Sara nelalakano lyoku ke mu ninga omukulukadhi gwe. Mbela Satana oye a li konima yoshinima shika, ta kambadhala okukeelela Sara opo kaa vale oluvalo lwaAbraham? Ombiimbeli inayi shi popya. Otayi tu lombwele owala kutya Jehova okwa li a yi mo olunyala. Okwa li a londodha Abimelek mondjodhi opo kaa gume Sara.—Gen. 20:1-18.
6 Shika hasho owala oshikando shoka Jehova a li e ya gamene. Jehova okwa li a hupitha Abraham nuukwanegumbo we lwiikando oyindji. (Gen. 12:14-20; 14:13-20; 26:26-29) Omupisalomi okwa popi kombinga yaAbraham noluvalo lwe a ti: “Kalunga ina pitika ya hepekwe; okwe ya gamene nokwa ganda aapangeli ta ti: ‘Inamu ningila aahogololwa yandje uuwinayi, inamu ehameka aahunganeki yandje.’”—Eps. 105:14, 15.
7. Omomikalo dhini Jehova a li a gamene oshigwana shaIsraeli?
7 Okupitila mombepo ye, Jehova okwa li a gamene oshigwana shaIsraeli shonale, moka Oluvalo lu uvanekwa lwa li talu ka za. Jehova okwa li a pe Aaisraeli Ompango ye okupitila mombepo ye, ndjoka ya li ya gamene elongelokalunga lyashili noya gamene Aajuda kaaya nyate pambepo, pamikalo nosho wo palutu. (Eks. 31:18; 2 Kor. 3:3) Pethimbo lyAatokolihapu, ombepo yaJehova oya li ya pe aalumentu yontumba oonkondo opo ya hupithe Israeli kaatondi yasho. (Aatok. 3:9, 10) Pethimbo lyomathelemimvo ngoka ga tetekele okuvalwa kwaJesus ngoka e li oshitopolwa sha simanenena sholuvalo lwaAbraham, ombepo ondjapuki oya kala nokugamena Jerusalem, Betlehem notempeli, omahala agehe ngoka ga li taga ka dhana onkandangala mokugwanithwa kwomahunganeko ge na ko nasha naJesus.
8. Oshike tashi ulike kutya ombepo ondjapuki oya li ya kwatelwa mo shu ukilila monkalamwenyo yOmwana gwaKalunga nomuukalele we?
8 Ombepo ondjapuki oya li ya kwatelwa mo shu ukilila monkalamwenyo yaJesus nomuukalele we. Oya li ya ningitha opo pu ningwe sha moshivalelo shokakadhona Maria shoka inaashi ningwa nando onale, sha hala okutya, oya li ya ningitha omukiintu inaa gwanenena a simbapale e ta vala Omwanamati a gwanenena, nonkee ano ka li kohi yegeelo lyeso. (Luk. 1:26-31, 34, 35) Konima, ombepo ondjapuki oya li ya gamene okahanona Jesus kaaka se ethimbo inaali thika. (Mat. 2:7, 8, 12, 13) Sho Jesus a li e na oomvula dhi thike lwopo 30, Kalunga okwe mu gwayeke nombepo ondjapuki. Okwa li wo e yi longitha oku mu langeka po a ninge omuthigululi gwoshipangelapundi shaDavid nokwe mu pe oshilonga shoku ka uvitha. (Luk. 1:32, 33; 4:16-21) Ombepo ondjapuki oya li ya pe Jesus oonkondo opo a longe iikumithalonga, mwa kwatelwa okwaaludha aavu, okukutitha oongundu dhaantu nokuyumudha oonakusa. Iikumithalonga mbika oyi li owala euliko eshona okuulika kutya otatu vulu okutegelela omalaleko nuuyamba geni kohi yepangelo lyomukwaniilwa Jesus.
9, 10. (a) Ongiini ombepo ondjapuki ya li yi iwetikile maalongwa yaJesus yomethelemimvo lyotango? (b) Ehumokomeho lini li na ko nasha nelalakano lyaJehova lya li lya hololwa methelemumvo lyotango E.N.?
9 Okuza pOpentekoste 33 E.N., Jehova okwa li a longitha ombepo ye a gwayeke mboka ye li oluvalo olutiyali lwaAbraham, mboka oyendji yomuyo kaaya li yomezimo lyaAbraham. (Rom. 8:15-17; Gal. 3:29) Ombepo ondjapuki oya li yi iwetikile maalongwa yaJesus yomethelemumvo lyotango, oya li ye ya ningitha opo ya vule okuuvitha nuulaadhi noku ya pa oonkondo ya longe iilongankondo. (Iil. 1:8; 2:1-4; 1 Kor. 12:7-11) Okupitila momagano ngoka gopashikumithalonga, ombepo ondjapuki oya li ya holola puuyelele ehumokomeho lya dhenga mbanda megwanitho lyelalakano lyaJehova. Jehova ka li we ta longitha elongekidho lyonale lyelongelokalunga ndyoka lya li motempeli muJerusalem. Ohokwe ye oya li ya lundulukile kokukala a hokwa egongalo lyopaKriste ndyoka opo lya li lya totwa po. Okuza nale sigo okunena, Jehova okwa kala ta longitha egongalo ndyoka lyaagwayekwa okugwanitha elalakano lye.
10 Dhimwe owala dhomomikalo ndhoka Jehova a li a longitha ombepo ondjapuki pethimbo lyOmbiimbeli opo elalakano lye li gwanithwe odho okugamena, okugandja oonkondo nokugwayeka. Ongiini mbela shi na ko nasha nethimbo lyetu? Ongiini Jehova ta longitha ngashingeyi ombepo ye mokwaambidhidha elalakano lye? Shoka otwa pumbwa oku shi tseya, molwaashoka otwa hala tu longe metsokumwe nombepo ndjoka. Natu ka kundathane omikalo dhi li ne moka Jehova ha longitha ombepo ye kunena.
Onkandangala ndjoka hayi dhanwa kombepo ondjapuki kunena
11. Oshike tashi ulike kutya ombepo ondjapuki ohayi inyengitha oshigwana shaKalunga shi kale sha yogoka, nongiini to vulu okuulika kutya oto longele kumwe nombepo?
11 Shotango, ombepo ondjapuki ohayi inyengitha oshigwana shaKalunga shi kale sha yogoka. Mboka haya kutha ombinga melalakano lyaKalunga oye na okukala ya yogoka pamikalo. (Lesha 1 Aakorinto 6:9-11.) Yamwe mboka ya ninga Aakriste yashili oya li nale aahondeli, aayoni yoondjokana nosho wo omashenge. Ehalo ndyoka hali vala uulunde otashi vulika lya mena omidhi momuntu. (Jak. 1:14, 15) Ihe nando ongawo, oohandimwe mboka oya “yogwa oondjo,” shoka tashi ulike kutya oya ninga omalunduluko ngoka ga pumbiwa moonkalamwenyo dhawo opo ya kale ya hokiwa kuKalunga. Oshike hashi ningitha ngoka e hole Kalunga e shi pondole mokwaahagwanitha po omahalo omawinayi? Aakorinto yotango 6:11 otaya ulike kutya ‘ombepo ondjapuki yaKalunga.’ Mokukala wa yogoka pamikalo, oho ulike kutya owe etha ombepo ndjoka yi kale tayi ku ukitha monkalamwenyo yoye.
12. (a) Shi ikolelela kemoniko lyaHesekiel, ongiini Jehova ha wilike ehangano lye? (b) Ongiini to vulu okuulika kutya oto longo metsokumwe nombepo?
12 Oshitiyali, Jehova oha longitha ombepo ye opo a kwatele komeho ehangano lye momukalo ngoka a hala li ende. Memoniko lyaHesekiel, oshitopolwa shehangano lyaJehova shomegulu otashi thanekwa shi li etemba lyomegulu ndyoka tali ende lyu uka komeho oku ka gwanitha po elalakano lyaJehova kaapu na shoka tashi li keelele. Oshike hashi inyengitha etemba lyu uke koombinga dhi ili nodhi ili? Ombepo ondjapuki. (Hes. 1:20, 21) Natu dhimbulukwe kutya ehangano lyaJehova olya thikama po miitopolwa iyali, shimwe omegulu nashimwe okombanda yevi. Ngele oshitopolwa shoka shomegulu otashi wilikwa kombepo ondjapuki, oshi na wo okukala sha faathana shi na ko nasha noshitopolwa shokombanda yevi. Mokukala omuvuliki nomudhiginini kewiliko ndyoka hali zi moshitopolwa shehangano lyaKalunga shokombanda yevi, oto ulike kutya oto endele pamwe netemba lyomegulu lyaJehova noto longo metsokumwe nombepo ondjapuki.—Heb. 13:17.
13, 14. (a) Oolye ya thikama po ‘mepipi ndika’ ndyoka lya li lya popiwa kuJesus? (b) Gandja oshiholelwa shoka tashi ulike kutya ombepo ondjapuki otayi longo mokuyelitha ooshili dhOmbiimbeli. (Tala oshimpungu “Mbela oto endele pamwe nuuyelele mboka tawu ende tawu yela?”)
13 Oshititatu, ombepo ondjapuki otayi longo mokuyelitha ooshili dhOmbiimbeli. (Omayel. 4:18) “Omupiya omudhiginini nomunandunge” okwa kala nokuyelitha ooshili dhopamanyolo kashona nakashona uule woomvula odhindji unene tuu okupitila moshifo shika. (Mat. 24:45, NW) Pashiholelwa, dhiladhila kombinga yeuvoko lyaamboka ya thikama po ‘mepipi ndika’ (KB), ndyoka lya li lya popiwa kuJesus. (Lesha Mateus 24:32-34.) Jesus okwa li ta popi kombinga yepipi lini? Oshitopolwa shi na oshipalanyolo “Okukala po kwaKristus otaku ti shike kungoye?” osha yelitha kutya Jesus ka li ta popi kombinga yaakolokoshi, ihe okombinga yaalongwa ye, mboka ya li ye li pokugwayekwa nombepo ondjapuki.a Aalanduli yaJesus aagwayekwa, ayehe mboka yomethelemumvo lyotango naamboka yongashingeyi, oyo mboka ya li itaaya ka mona owala endhindhiliko ihe otaya ka mona wo kutya olya hala okutya Jesus “oku li popepi posheelo.”
14 Eyelithilo ndika olya hala okutya shike kutse? Nonando itatu vulu lela okuyeleka ethimbo lyokukala po ‘kwepipi ndika,’ otatu ningi nawa ngele tatu kaleke momadhiladhilo iinima yontumba shi na ko nasha noshitya “epipi.” Olundji otali popi aantu yoomvula dha yooloka mboka ye li ko pethimbo lyontumba, kali li ele unene noli na esiku tali hulu po. (Eks. 1:6) Ongiini nduno tu na okuuva ko oohapu dhaJesus kombinga ‘yepipi ndika’? Osha yela kutya okwa li a hala okutya onkalamwenyo yaagwayekwa mboka ya li ye na omwenyo sho omandhindhiliko ga kala gi iwetikile mo 1914 otayi endathana nonkalamwenyo yaamboka taya ka mona etameko lyuudhigu uunene. Epipi ndyoka oli na etameko nosha yela kutya otali ka hula po. Egwanitho lyiiningwanima yi ili noyi ili mbyoka ya ninga po endhindhiliko otali ulike sha yela kutya uudhigu owu na okukala wu li popepi. Mokukala wu wete kutya ethimbo olye endelela nokukala wa tonata, oto ulike kutya oto endele pamwe nuuyelele mboka tawu ende tawu yela noto landula ewiliko lyombepo ondjapuki.—Mark. 13:37.
15. Oshike tashi ulike kutya ombepo ondjapuki oyo hayi tu pe oonkondo opo tu vule okuuvitha onkundana ombwanawa?
15 Oshitine, ombepo ondjapuki ohayi tu pe oonkondo tu uvithe onkundana ombwanawa. (Iil. 1:8) Kapu na sha shilwe shoka tashi vulu okuyelitha nkene onkundana ombwanawa ya kala tayi uvithwa nevi alihe. Dhiladhila kombinga yaashoka. Otashi vulika wu li gumwe gomwaamboka ya li haya dhiladhila kutya ‘Kandi na esiku ndi ka uvithe egumbo negumbo’ omolwohoni ya pitilila nenge molwuumbanda. Nonando ongawo, ngashingeyi oto kutha ombinga miilonga mbyoka nuulaadhi.b Oonzapo dhaJehova odhindji oondhiginini odha tsikila okuuvitha nonando dha li dha patanekwa nenge dha hepekwa. Ombepo ondjapuki yaKalunga oyo awike tayi vulu oku tu pa oonkondo tu taaguluke omandangalati nokuninga iinima mbyoka itaayi wapa koonkondo dhetu yene. (Mika 3:8; Mat. 17:20) Mokukala wu na ombinga pakuudha miilonga yokuuvitha, oto ulike kutya oto longele kumwe nombepo ndjoka.
Onkandangala ndjoka tayi ka dhanwa kombepo ondjapuki monakuyiwa
16. Omolwashike tatu vulu okukala neinekelo kutya Jehova ota ka gamena oshigwana she pethimbo lyuudhigu uunene?
16 Monakuyiwa, Jehova ota ka longitha ombepo ye ondjapuki momikalo omindhindhilikwedhi opo a gwanithe po elalakano lye. Natu tale tango koshinima shi na ko nasha negameno. Ngaashi twe shi mona, Jehova okwa li a longitha ombepo ye monakuziwa opo a gamene oohandimwe nosho wo oshigwana shaIsraeli ashihe. Onkee ano, otu na omatompelo lela okwiitaala kutya ota ka longitha ombepo tuu ndjoka yi na oonkondo opo a gamene oshigwana she pethimbo lyuudhigu uunene mboka wu li popepi. Inatu pumbwa okukala tatu tengeneke kombinga yankene Jehova te ke tu sila oshimpwiyu. Pehala lyaashono, otu na okukala twa tegelela onakuyiwa neinekelo, tu shi shi kutya mboka ye hole Jehova ita ka kala kee ya wete nenge ya kale itaaya vulu okupewa ombepo ye ondjapuki.—2 Ondjal. 16:9; Eps. 139:7-12.
17. Ongiini Jehova ta ka longitha ombepo ye ondjapuki muuyuni uupe?
17 Ongiini Jehova ta ka longitha ombepo ye ondjapuki muuyuni uupe mboka tawu ya? Ombepo ondjapuki otayi ka nwetha mo oondhingwambo ndhoka tadhi ka pandjwa pethimbo ndyoka. (Eh. 20:12, NW) Mbela moka otamu ka kala mwa nyolwa shike? Osha yela kutya otamu ka kala mwa nyolwa iitegelelwa yaJehova mbyoka te ke tu pa pethimbo lyoomvula eyuvi. Mbela owa tegelela nondjuulukwe okukonakona shoka sha nyolwa moondhingwambo ndhoka? Otwa tegelela nenyanyu enene uuyuni uupe mboka. Itatu vulu okudhiladhila thiluthilu kutya otashi ka kala sha fa peni okukala pethimbo ndyoka lya lalekwa nuuyamba sho Jehova ta ka longitha ombepo ye ondjapuki a gwanithe po elalakano lye shi na ko nasha nevi nosho wo naantu mboka ye li kulyo.
18. Owa tokola toko okuninga shike?
18 Inatu dhimbwa nando kutya elalakano lyaJehova otali ka gwanithwa, molwaashoka oha longitha ombepo ondjapuki ye ndjoka yi li oonkondo dhe kaaku na we opo a gwanithe po elalakano lye. Ngoye owa kwatelwa mo wo melalakano ndyoka. Onkee ano, kala wa tokola toko wu pule Jehova e ku pe ombepo ye ondjapuki nokulonga metsokumwe newiliko lyayo. (Luk. 11:13) Mokuninga ngaaka oto vulu okukala netegameno lyokukala mOparadisa kombanda yevi sigo aluhe, ngaashi Jehova a li a lalakanena aantu ya kale.
[Omanyolo gopevi]
a Tala Oshungonangelo ye 1 Febuluali 2008, pepandja 25-29.
b Tala oshiholelwa shagumwe ngoka a li a sindi okukala e na ohoni unene e ta ningi omulaadhi muukalele, mOshungonangelo ye 1 Septemba 1993 pepandja 32.
Oto dhimbulukwa?
• Omomikalo dhini Jehova a li a longitha ombepo ye ondjapuki pethimbo lyOmbiimbeli opo elalakano lye li tsikile okugwanithwa?
• Ongiini Jehova ha longitha ombepo ye kunena?
• Ongiini Jehova ta ka longitha ombepo ye monakuyiwa opo a gwanithe po elalakano lye?
[Oshimpungu pepandja 22]
Mbela oto endele pamwe nuuyelele mboka tawu ende tawu yela?
Jehova ota tsikile okuyelithila oshigwana she. Uuyelele wumwe wuni mboka wa kala nokunyanyangidhwa mOshungolangelo?
▪ Ethaneko lyaJesus li na ko nasha nefulika otali tsu omuthindo oshiilongomwa shini kombinga yehumokomeho lyopambepo? (Mat. 13:33)—1 Juli 2008, epandja 27-28.
▪ Uunake okwiithanwa megulu kwAakriste taku ka hula?—1 Mai 2007, epandja 30-31 (Oshungolangelo yOshiingilisa).
▪ Osha hala okutya shike okulongela Jehova ‘mombepo’? (Joh. 4:24)—1 Auguste 2002, epandja 12.
▪ Ongundu onene otayi longo mehale lini? (Eh. 7:15)—1 Mai 2002, epandja 30-31 (Oshungolangelo yOshiingilisa).
▪ Okuyoololwa kwoonzi mokati kiikombo otaku ka tameka okuningwa uunake? (Mat. 25:31-33)—1 Kotoba 1995, epandja 19-29.