Ontopolwa ontimulongo nontine
Jehova oha wilike ngiini ehangano lye?
1. Ombimbeli tayi holola uuyelele uni kombinga yehangano lyaJehova, nomolwashike wa simana kutse?
MBELA Kalunga oku na ehangano? Omanyolo ga nwethwa mo otage tu lombwele kutya oku na. MOohapu dhe, ohe tu ulukile paufupi lwiikando oshitopolwa shomegulu oshikumithi shehangano ndyoka. (Hesekiel 1:1, 4-14; Daniel 7:9, 10, 13, 14) Nonando itatu vulu okumona oshitopolwa shoka ihaashi monika, oshi na enwethomo enene kaalongelikalunga yashili yonena. (2 Aakwaniilwa 6:15-17) Ehangano lyaJehova oli na wo oshitopolwa hashi monika kombanda yevi. Ombimbeli otayi tu kwathele tu uve ko kutya olyo shike nonkene Jehova te li wilike.
Okudhimbulula oshitopolwa hashi monika
2. Egongalo epe lini Kalunga a toto po?
2 Oshigwana shaIsrael osha kala uule woomvula 1 545 shi li egongalo lyaKalunga. (Iilonga 7:38) Ihe Israel ina vulika kiipango yaKalunga nokwe ekelehi Omwana. Oshilanduliko, Jehova okwa li e ekelehi egongalo ndyoka nokwe li etha po. Jesus okwa li a lombwele Aajuda a ti: “Tala, ongulu yeni otayi mú thigilwa yi li owala.” (Mateus 23:38) Opo nduno Kalunga okwe eta po egongalo epe, ndyoka a ningi nalyo ehangano epe. Egongalo ndyoka olya li li na okukala li na aantu 144 000 ya hogololwa kuKalunga ya kale ya hangana nOmwana megulu.—Ehololo 14:1-4.
3. Oshike sha ningwa pOpentekoste 33 E.N. shi li euliko lya yela kutya Kalunga okuza pethimbo ndyoka okwa li a longitha egongalo epe?
3 Yotango yomegongalo ndyoka epe oya li ya gwayekwa nombepo ondjapuki kuJehova pOpentekoste 33 E.N. Shi na ko nasha noshiningwanima shika oshindhindhilikwedhi, otatu lesha ngeyi: “Ano esiku lyaPentekoste sho lya thikana, oyo ayehe ya adhika ya gongala peha limwe. Ihe ombadhilila oshihomo oshinene oshu uvika megulu, ongokambiya take ende, noshu udha ondjugo ndjoka ayihe ya li mo ya kuutumba. Noya mono omalaka ga fa omulilo ogi igandjana ga kuluka, nokehe ngoka gwomokati kawo a lambelwa kulimwe. Oyo ayehe noyu udhithwa Ombepo Ondjapuki.” (Iilonga 2:1-4) Kungawo ombepo yaKalunga oya gandja euliko lya yela kutya Kalunga okuza pethimbo ndyoka okwa li ta ka longitha ongundu ndjoka yaantu okutsakanitha elalakano lye kohi yewiliko lyaJesus Kristus megulu.
4. Oolye nena ya ninga ehangano lyaJehova hali monika?
4 Kombanda yevi nena oku na owala oshihupe shomo 144 000. Ihe megwanitho lyehunganeko lyOmbimbeli, “ongundu onene” ‘yoonzi dhilwe’ omamiliyona oya tameka okweendathana noshihupe shaagwayekwa. Jesus, Omusita Omwaanawa, okwa hanganitha oonzi dhilwe ndhoka noshihupe opo ya ninge oshigunda shimwe ashike nenge uusita umwe auke shi li kohi yetonatelo lye e li Omusita gwasho gumwe. (Ehololo 7:9; Johannes 10:11, 16) Ayehe mboka oya ninga egongalo limwe lya hangana, ehangano lyaJehova hali monika.
Ehangano tali wilikwa pauteokratika
5. Olye ta wilike ehangano lyaKalunga nongiini?
5 Uutumbulilo wopamanyolo “egongalo lyaKalunga omunamwenyo” otau shi yelitha kutya olye te li wilike. Ehangano ndyoka olyopauteokratika, sha hala okutya, otali wilikwa kuKalunga. Jehova ota wilike oshigwana she okupitila muJesus, ngoka a langeka po a kale Omutse gwegongalo ihaagu monika, nomokupitila mOohapu Dhe dha nwethwa mo, Ombimbeli.—1 Timoteus 3:14, 15; Aaefeso 1:22, 23; 2 Timoteus 3:16, 17.
6. (a) Ongiini ewiliko lyomegulu okuwilika egongalo lyi imonikila methelemumvo lyotango? (b) Oshike tashi ulike kutya Jesus oku li natango Omutse gwegongalo?
6 Ewiliko ndyoka olya li li iwetikile unene pOpentekoste. (Iilonga 2:14-18, 32, 33) Olya li lya vulu okumonika sho omuyengeli gwaJehova a wilike etaandelitho lyonkundana ombwanawa li thike kuAfrika, sho ewi lyaJesus lya gandja omalombwelo peitedhululo lyaSaulus gwaTarso naashono Petrus a tameke niilonga yeuvitho mokati kaamboka kaaye shi Aajuda. (Iilonga 8:26, 27; 9:3-7; 10:9-16, 19-22) Ihe konima yethimbo inapu uvika we omawi okuza megulu, inapu monika we aayengeli noinapu gandjwa we omagano gopashikumithalonga gombepo ondjapuki. Ihe Jesus oku uvaneka a ti: “Tala, ongame ndi li pamwe nane omasiku agehe sigo ehulilo lyuuyuni.” (Mateus 28:20; 1 Aakorinto 13:8) Nena, Oonzapo dhaJehova ohadhi zimine ewiliko lyaJesus. Ando kalya li po, ando okuuvitha etumwalaka lyUukwaniilwa mokati kuutondwe uunene okwa kala itaaku wapa.
7. (a) “Omupiya omudhiginini nomunandunge” okwa thikama po moolye, nomolwashike? (b) Iilonga yini ya pewa “omupiya”?
7 Okathimbo okafupi manga Jesus inaa sa, okwa li a lombwele aalongwa ye kombinga ‘yomupiya omudhiginini nomunandunge’ ngoka Jesus mwene e li Mwene gwe, a li te ki inekelela oshinakugwanithwa shi ikalekelwa. “Omupiya” ngoka okwa li opo ta ka kala ngele Omuwa ta yi megulu nota ka kala natango ta longo nuudhiginini pokugaluka kwaKristus ihaaku monika moonkondo dhUukwaniilwa. Uutumbulilo mboka itau vulu nando okuukithwa komuntu gulwe, ihe okegongalo lyaagwayekwa lyaKristus. Molwashoka Jesus okwe li landa nombinzi ye, okwe li ithana “omupiya” gwe. Okwa pe iilyo yalyo elombwelo yi ninge aantu aalongwa noku ya palutha kashona nakashona, moku ya pa ‘oondya dhopambepo pethimbo lyo opala.’—Mateus 24:45-47, yelekanitha NW; 28:19; Jesaja 43:10; Lukas 12:42; 1 Petrus 4:10.
8. (a) Iinakugwanithwa yini ongundu yomupiya yi na ngashingeyi? (b) Omolwashike okwiinyenga kwetu komalombwelo ngoka hatu mono okupitila muupitilo mboka Kalunga ha longitha, kwa simana?
8 Molwashoka ongundu yomupiya pokugaluka kwaMwene gwayo ihaaku monika mo 1914 oya kala yi ipyakidhila nuudhiginini okulonga iilonga yayo, opu na euliko kutya oya li yi inekelelwa iinakugwanithwa ya gwedhwa po mo 1919. Oomvula dha piti okuza ethimbo ndyoka odha li ethimbo lyokugandja uunzapo muuyuni auhe u na ko nasha nUukwaniilwa, nongundu onene yaalongeli yaJehova oya kala tayi gongelwa opo yi vule okuhupa muudhigu uunene. (Mateus 24:14, 21, 22; Ehololo 7:9, 10) Mboka oya pumbwa wo iikulya yopambepo notaye yi pewa kongundu yomupiya. Onkee ano, opo tu nyanyudhe Jehova, otwa pumbwa okutaamba ko omalombwelo ge ngoka te tu pe okupitila muupitilo mboka nokukatuka metsokumwe nago.
9, 10. (a) Elongekidho lini lya li po methelemumvo lyotango okukandula po omapulo ngoka ga li ga pulwa kombinga yomalongo nokugandja ewiliko keuvitho lyonkundana ombwanawa? (b) Elongekidho lini li li po nena li na ko nasha nokuunganeka iilonga yoshigwana shaJehova?
9 Omathimbo gamwe, ohapu holoka omapulo ge na ko nasha nomalongo nosho wo nomilongithwakalo. Oshike nduno hashi vulu okuningwa po? Iilonga yAayapostoli ontopolwa 15 otayi tu lombwele nkene ompata yi na ko nasha nokwiitedhulula kwaamboka kaaye shi Aajuda ya li ya kandulwa po. Oshinima shoka osha li sha tseyithilwa aayapostoli naakuluntugongalo yomuJerusalem, mboka ya li taya longo ye li olutuwiliki. Aalumentu mboka kaya li ihaaya ningi omapuko, ihe Kalunga okwe ya longitha. Oya li ya konakona omanyolo ge na ko nasha nompata ndjoka nosho wo uunzapo u na ko nasha nokulonga kwombepo yaKalunga mokweegulula oshitopolwa shaamboka kaaye shi Aajuda. Opo nduno oya ningi etokolo. Kalunga okwa yambeke elongekidho ndyoka. (Iilonga 15:1-29; 16:4, 5) Oohandimwe oya li ya tumwa okuza molutuwiliki ndoka oku ka humitha komeho iilonga yeuvitho lyUukwaniilwa.
10 Methimbo lyetu Olutuwiliki lwehangano lyaJehova hali monika olya thikama po maamwatate aagwayekwa nombepo ya za miilongo yi ili noyi ili nolu li kombelewa onene muuyuni yOonzapo dhaJehova. Kohi yewiliko lyaJesus Kristus e li omutse gwalwo, Olutuwiliki otalu humitha komeho elongelokalunga lya yela moshilongo kehe notalu unganeke iilonga yokuuvitha yOonzapo dhaJehova momagongalo gadho omayuvi omilongo. Iilyo yOlutuwiliki oyi na etaloko lya faathana nolyomuyapostoli Paulus, ngoka a nyolele Aakriste ooyakwawo a ti: “Hakutya, otse twa hala okupangela eitaalo lyeni, aawe, otatu mú yakulile enyanyu lyeni; oshoka meitaalo mwa kola.”—2 Aakorinto 1:24.
11. (a) Aakuluntugongalo naayakuligongalo ohaya langekwa po ngiini? (b) Omolwashike tu na okulongela kumwe thiluthilu naamboka ya langekwa po?
11 Oonzapo dhaJehova muuyuni auhe odhi inekelela Olutuwiliki okuhogolola aamwatate ya pyokoka mboka ye na wo uuthemba wokulangeka po aakuluntugongalo naayakuligongalo ya tonatele omagongalo. Iitegelelwa yi na ko nasha naamboka taya langekwa po oya popiwa mOmbimbeli nosha tseyika kutya aalumentu mboka inaya gwanenena notashi vulika ya ninge omapuko. Aakuluntugongalo mboka haye ya popile ko naamboka haye ya langeke po oye na oshinakugwanithwa sha kwata miiti koshipala shaKalunga. (1 Timoteus 3:1-10, 12, 13; Titus 1:5-9) Onkee ano ohaya galikana ya mone ekwatho lyombepo yaKalunga nohaya kongo ewiliko mOohapu dhe dha nwethwa mo. (Iilonga 6:2-4, 6; 14:23) Natu ulikeni ano olupandu lwetu okupandula ‘omagano ge li aantu’ ngaka, mboka taye tu kwatheleni atuheni tu thike “mehangano limwe omeitaalo.”—Aaefeso 4:8, 11-16.
12. Jehova oha longitha ngiini aakiintu melongekidho lyopauteokratika?
12 Omanyolo otaga ti kutya aalumentu oyo ye na okutonatela egongalo. Elongekidho ndika inali dhina aakiintu, oshoka yamwe yomuyo oye li aathigululi yUukwaniilwa womegulu, nohaya ningi oshindji miilonga yeuvitho. (Epsalmi 68:12, KB) Aakiintu ohaya yambidhidha wo egongalo oku li kaleka li na edhina ewanawa mokugwanitha po nuudhiginini iinakugwanithwa yomaukwanegumbo gawo. (Titus 2:3-5) Ihe okulonga aantu megongalo ohaku ningwa kaalumentu mboka ya langekwa po oku shi ninga.—1 Timoteus 2:12, 13.
13. (a) Ombimbeli otayi ladhipike aakuluntugongalo ya kale ye na etaloko lini shi na ko nasha nondondo yawo? (b) Uuthembahenda uni atuheni tatu vulu okukutha ombinga muwo?
13 Muuyuni, omuntu ngoka e na ondondo yopombanda oha talika ko a simana, ihe mehangano lyaKalunga ompango oyo: “Omufupi gwomune amuhe oye omukuluntu.” (Lukas 9:46-48; 22:24-26) Omanyolo otaga pe aakuluntugongalo omayele ya kale ya kotoka kaaya pangele ya fa omalenga mboka ya pewa kuKalunga, ihe pehala lyaashoka, oya kale ye shi okuholelwa koshigunda. (1 Petrus 5:2, 3) Inapu hogololwa owala aantu aashona oyo ya kale ye na uuthembahenda wokukalela po Omunamapangelo agehe mokuuvitha neifupipiko medhina lye nokulombwela aantu kehe pamwe kombinga yUukwaniilwa we, ihe Oonzapo dhaJehova adhihe, aalumentu naakiintu.
14. Kundathana omapulo ngoka ge li pehulilo lyokatendo, to longitha omanyolo ngoka ga gandjwa.
14 Otatu vulu okwiipula ngeyi: ‘Mbela onda pandula ngaa shili nkene Jehova ta wilike ehangano lye hali monika? Mbela iikala yandje, okupopya kwandje niilonga yandje otayi shi ulike?’ Ngele tatu tedhatedha kiitsa tayi landula otashi vulu okukwathela kehe gumwe gwomutse a ninge eikonakono lya tya ngaaka.
Ngele ohandi vulika shili kuKristus e li Omutse gwegongalo, ngaashi shu ulikwa momanyolo ngoka taga landula, ondi na okukala tandi ningi shike? (Mateus 24:14; 28:19, 20; Johannes 13:34, 35)
Olye tandi simaneke ngele ohandi taamba ko nolupandu omasiloshimpwiyu gopambepo ngoka nda pewa okupitila mongundu yomupiya nomOlutuwiliki lwe? (Lukas 10:16)
Ongiini kehe gumwe megongalo, unene tuu aakuluntugongalo, e na okuungaunga namukwawo? (Aaroma 12:10)
15. (a) Oshike tatu ulike okupitila miikala yetu yi na ko nasha nehangano lyaJehova hali monika? (b) Oompito dhini dhi li po kutse okuulika kutya Ondiaboli oyo omuniifundja nokunyanyudha omutima gwaJehova?
15 Jehova ote tu wilike nena okupitila mehangano lye hali monika tali wilikwa kuKristus. Iikala yetu yi na ko nasha nelongekidho ndyoka otayi ulike nkene tu uvite kombinga yompata yuunamapangelo. (Aaheberi 13:17) Satana ota ti kutya otu na ko nasha owala natse yene. Ihe ngele otatu longo momukalo kehe gwa pumbiwa e tatu yanda iinima mbyoka tayi ukitha eitulomo kutse yene inaashi pumbiwa, otatu ulike kutya Ondiaboli omuniifundja. Ngele otu hole nohatu simaneke mboka taya kwatele komeho mokati ketu e tatu tindi ‘okutumbaleka aantu omolwuuwanawa wetu yene,’ otatu nyanyudha Jehova. (Judas 16, NW; Aaheberi 13:7) Ngele tatu kala aadhiginini kehangano lyaJehova, otatu ulike kutya Jehova oye Kalunga ketu nonokutya otwa hangana moku mu longela.—1 Aakorinto 15:58.
Oonkundathana dhokweendulula
• Ehangano lyaJehova hali monika nena oshike? Elalakano lyalyo olini?
• Olye Omutse gwegongalo gwa langekwa po, nokupitila momalongekidho haga monika geni he tu wilike pahole?
• Iikala iiwanawa yini tu na okukala tu nine mboka ye li mehangano lyaJehova?
[Omathano pepandja 133]
Jehova ohe tu wilike okupitila mehangano lye hali monika tali wilikwa kuKristus