Omolwashike tu na okuwilikwa kombepo yaKalunga?

“Ongoye Kalunga kandje. Ombepo yoye nayi endithe ndje.”—EPS. 143:10.

1. Omolwashike engeneta hali hilile kulyo iinima mbyoka ya longwa miitenda?

MBELA owa tulile nale onane popepi nengeneta? Otashi vulika wa li wa mono nkene engeneta tali hilile onane kulyo nziyanziya. Omolwashike mbela? Omolwaashoka engeneta oli na oonkondo ndhoka ihaadhi monika hadhi hili iinima mbyoka ya longwa miitenda. Omimvo omathele ogendji dha pita, aantu oyendji oya kala nokulongitha omangeneta okuhadha mevi iinima mbyoka ya longwa miitenda.

2, 3. (a) Omimvo odhindji dha ka pita Jehova okwa li a longitha oonkondo dhini okushita iinima? (b) Omolwashike twa pumbwa ewiliko lyoonkondo dhaKalunga ihaadhi monika monkalamwenyo yetu?

² Opu na oonkondo dhilwe ihaadhi monika dha simanenena ndhoka hadhi tu wilike. Odhini mbela? Oonkondo ndhoka dha popiwa moovelise dhopetameko dhOmbiimbeli. Embo lyaGenesis otali popi shoka Jehova a li a ningi omimvo odhindji dha pita tali ti: “Petameko Kalunga okwa shiti egulu nevi.” Okwa li a longitha oonkondo oonene sho te shi ningi. Ombiimbeli oya gwedha ko tayi ti: ‘Ombepo yaKalunga oya tengelele kombanda yomeya.’ (Gen. 1:1, 2) Oonkondo dhini a li a longitha? Ombepo ye ondjapuki. Otu na okupandula Jehova sho e yi longitha okushita iinima ayihe.—Job 33:4; Eps. 104:30.

³ Oshoshili kutya Jehova okwa li a longitha oonkondo dhe okushita aantu. Mbela oonkondo ndhoka otadhi vulu ngaa oku tu wilika kunena? Eeno, molwaashoka Jesus okwa li a lombwele aalongwa ye a ti: ‘Ombepo ote ke mú longa oshili ayihe.’ (Joh. 16:13) Ombepo ondjapuki oshike, nomolwashike twa hala yi tu wilike?

Ombepo ondjapuki oshike?

4, 5. (a) Mboka yi itaala muukwatatu oya thika pehulithodhiladhilo lya puka lini? (b) Ombepo ondjapuki oshike?

⁴ Aantu yamwe mboka hatu popi nayo muukalele oyi itaala muukwatatu. Oya thika pehulithodhiladhilo lya puka kutya ombepo ondjapuki omuntu gwopambepo e thike pamwe naKalunga. (1 Kor. 8:6) Omolwoshinima shoka, mOombiimbeli odhindji oto adha mo uutumbulilo ombepo ondjapuki wa nyolwa noondanda oonene.

⁵ Ombepo ondjapuki oshike? Enyolo lyopevi muGenesis 1:2 mo-New World Translation of the Holy Scriptures — With References otali ti: “Oshitya ombepo ondjapuki shoka sha tolokwa [ruah] mOshihebeli, ohashi tolokwa wo ombepo ndjoka hayi pepe notashi gandja wo eityo lyoshinima shoka ihaashi monika.” (Yelekanitha Genesis 3:8; 8:1.) Ombepo ndjoka hayi pepe ihayi monika, ihe ohatu mono sho tayi inyengitha iinima. Ombepo ondjapuki nayo ihayi monika, ihe oonkondo dhayo ohatu dhi mono. Oyi li oonkondo dha za kuKalunga ndhoka hadhi kwathele aantu ya longe ehalo lye. Mbela oshidhigu okwiitaala kutya ombepo ondjapuki oya za kuKalunga Omunankondoadhihe? Hasho nando.—Lesha Jesaja 40:12, 13.

6. David okwa li i indile shike kuJehova?

⁶ Mbela Jehova ota vulu ngaa okukala ta longitha ombepo ye ondjapuki yi tu wilike monkalamwenyo yetu? Eeno, molwaashoka oku uvanekela omupisalomi David a ti: “Otandi ku ulukile ondjila ndjo u na okulandula; otandi ku wilike.” (Eps. 32:8) Mbela David okwa li ngaa e shi hala? Eeno, molwaashoka okwa li i indile Jehova a ti: “Longa ndje okugwanitha ehalo lyoye, oshoka ongoye Kalunga kandje. Ombepo yoye nayi endithe ndje.” (Eps. 143:10) Otu na wo okukala twa hala okuwilikwa kombepo yaKalunga. Omolwashike mbela? Natu taleni komatompelo gane.

Itatu vulu okwiiwilika tse yene

7, 8. (a) Omolwashike itaatu vulu okwiiwilika tse yene? (b) Ethaneko lini tali tu kwathele tu mone kutya otwa pumbwa ewiliko lyaKalunga muuyuni mbuka wa kolokosha?

⁷ Opu na omatompelo gane kutya omolwashike tu na okuwilikwa kombepo yaKalunga. Etompelo lyotango olyo kutya itatu vulu okwiiwilika tse yene. Oshitya “okuwilika” otashi ti kutya “okupukulula nenge okuulukila omuntu ondjila ndjoka e na okulandula.” Ihe Jehova ine tu shita tu na uukwatya wokwiiwilika tse yene, molwaashoka inatu gwanenena. Omupolofeti Jeremia okwa nyola a ti: “OMUWA, ondi shi shi kutya omuntu iha vulu okupangela shoka u uthilwa; kaku na omuntu hu utha okukalamwenyo kwe.” (Jer. 10:23) Omolwashike mbela? Kalunga okwe tu lombwela okupitila muJeremia kutya omolwashike itaatu vulu okwiiwilika. Jehova okwa popi kombinga yomutima gwomuntu a ti: “Omwenyo ogwo omunamakoto kombanda yiinima ayihe, nokagu shi kwaaludhwa. Olye ta vulu oku gu uva ko?”—Jer. 17:9; Mat. 15:19.

⁸ Mbela itashi ka kala sha nika oshiponga ngele omuntu ngoka inee enda nale mokuti ti idhenge ondjila ndjoka yu uka mo oye awike nopwaahe na ekwatho lyagumwe ngoka e shi mo nenge lyokaalita? Ota ka tula omwenyo gwe moshiponga molwaashoka otashi ka kala oshidhigu kuye okwiidhidhimikila onkalo ya tya ngaaka nota ka thika nuudhigu. Omuntu ngoka ta dhiladhila kutya ota vulu oku shi enditha nawa muuyuni mbuka wa kolokosha nopwaahe na ewiliko lyaKalunga, oti iningi oshege. Ngele otwa hala okupondola muuyuni mbuka tu li, otu na okukala hatu galikana kuJehova, ngaashi David ngoka a ti: “Onda dhiginine okweenda mondjila yoye, noonkatu dhandje inadhi puguma mo.” (Eps. 17:5; 23:3) Ongiini tatu vulu okumona ewiliko ndyoka?

9. Ngaashi shu ulikwa pepandja 17, ombepo yaKalunga ohayi tu wilike ngiini?

⁹ Jehova ote ke tu pa ombepo ye ondjapuki yi tu wilike ngele otwi ifupipika notwa hala okulonga ehalo lye. Ombepo ye ohayi tu kwathele ngiini? Jesus okwa lombwele aalongwa ye a ti: ‘Ihe omupopili ombepo ondjapuki, ngoka Tate te ke mu tuma medhina lyandje, oye ote ke mú longa iinima ayihe, note ke mú dhimbulutha iinima ayihe mbyoka nde yi mú lombwela.’ (Joh. 14:26) Ngele otu na ondjigilile yokugalikana aluhe noyokukonakona Oohapu dhaKalunga, mwa kwatelwa iinima ayihe mbyoka Kristus a popi, nena ombepo ondjapuki otayi ke tu kwathele tu uve ko iinima yomuule yuunongo waKalunga, opo tu vule okulonga ehalo lye. (1 Kor. 2:10) Ohayi tu kwathele wo tu ungaunge niinima mbyoka hayi tu ningilwa ombaadhilila. Ohayi tu dhimbulukitha oovelise dhOmbiimbeli ndhoka twi ilonga nale nohayi tu kwathele nkene tu na oku dhi tula miilonga.

Jesus okwa li ha wilikwa kombepo yaKalunga

10, 11. Omwana gwaKalunga epona okwa li a tegelela ombepo ondjapuki yi mu ningile shike, noya li ye mu kwathele ngiini?

¹⁰ Etompelo etiyali kutya omolwashike tu na okuwilikwa kombepo ondjapuki olyo kutya Kalunga okwe yi longitha mokuwilika Omwana. Omanga Omwana gwaKalunga epona inee ya kombanda yevi okwa li e shi nale ehunganeko ndyoka tali ti: “Ombepo yOMUWA otayi mu lambele, ombepo yowino noyoondunge, ombepo yomayele noyoonkondo, ombepo yuunongo noyokutila OMUWA.” (Jes. 11:2) Jesus sho a li kombanda yevi okwa li a halelela okupewa ombepo yaKalunga omolwoonkalo oondhigu ndhoka dha li dhe mu taalela.

¹¹ Oohapu dhaJehova ohadhi gwanithwa aluhe. Lukas okwa popi shoka sha li sha ningwa po nziya konima sho Jesus a ninginithwa a ti: ‘Jesus okwa zi kuJordan u udha ombepo ondjapuki. Ombepo noye mu fala kombuga.’ (Luk. 4:1) Manga a li hoka, ti idhilike iikulya, ta galikana nokutedhatedha, otashi vulika Jehova a li e mu lombwele noku mu ulukila shoka ta ka ningilwa. Ombepo yaKalunga oya li tayi wilike omadhiladhilo nomutima gwaJesus noya li ya nwetha mo okudhiladhila kwe nosho wo omatokolo ge. Oshizemo, Jesus okwa li e shi shoka e na okuninga monkalo kehe nokwa li a longo metsokumwe nehalo lyaHe.

12. Omolwashike twa pumbwa okupula ombepo yaKalunga yi tu wilike?

¹² Molwaashoka Jesus okwa li e shi nawa onkandangala ndjoka ombepo ondjapuki ya dhana monkalamwenyo ye, okwa li a kumagidha aalongwa ye a mana mo ye yi pule opo yi ya wilike. (Lesha Lukas 11:9-13.) Omolwashike natse twa pumbwa oku yi pula? Omolwaashoka ohayi lundulula omadhiladhilo getu e taga kala ga fa gaKristus. (Rom. 12:2; 1 Kor. 2:16) Ngele otwe etha ombepo yaKalunga yi tu wilike, otatu ka vula okudhiladhila ngaashi Kristus nokulandula oshiholelwa she.—1 Pet. 2:21.

Ombepo yuuyuni otayi tu pukitha

13. Ombepo yuuyuni oshike, nohayi tu ningitha tu longe shike?

¹³ Etompelo etitatu kutya omolwashike tu na okuwilikwa kombepo yaKalunga olyo kutya ngele katu yi na, otatu vulu okupukithwa kombepo yuuyuni ndjoka ya nwetha mo aantu oyendji kunena. Ombepo yuuyuni oyi na oonkondo notayi kondjitha thiluthilu shoka ombepo ondjapuki hayi tu wilike tu ninge. Ombepo yuuyuni ohayi ningitha aantu ya dhiladhile noya longe iilonga ya fa yomupangeli gwuuyuni mbuka, Satana, pehala lyokuthindila maantu omadhiladhilo gaKristus. (Lesha Aaefeso 2:1-3; Titus 3:3.) Uuna omuntu ti igandja kombepo yuuyuni nokulonga iilonga yonyama, iilanduliko ohayi kala iiwinayi noonkondo notashi mu imbi a ka thigulule Uukwaniilwa waKalunga.—Gal. 5:19-21.

14, 15. Oshike tashi vulu oku tu kwathela tu kondjithe ombepo yuuyuni waSatana?

¹⁴ Jehova okwe tu homateka iikondjitho yopambepo tu vule okukandeka nayo ombepo yuuyuni. Omuyapostoli Paulus okwa ti kutya “ikoleleleni muukumwe nOmuwa, mu mone omukumo moonkondo dhe oonene. . . . Omasiku omawinayi ngele tage ya, nena otamu ka vula okwiipopila.” (Ef. 6:10, 13) Jehova ohe tu pe oonkondo okupitila mombepo ye, opo tu vule okukondjitha Satana sho ta kambadhala oku tu pukitha. (Eh. 12:9) Ombepo yuuyuni oyi na oonkondo noitatu vulu oku yi henuka thiluthilu. Ihe katu na okweetha yi tu nwethe mo. Ombepo ondjapuki oyi na oonkondo lela nohayi tu kwathele.

¹⁵ Petrus okwa li a nyola shi na ko nasha naantu yopethimbo lye mboka ya li ya thigi po eitaalo lyopaKriste a ti: “Oye etha ondjila yu uka e taa kana.” (2 Pet. 2:15) Ihe inatu pandula tuu sho inaatu pewa ‘ombepo yuuyuni mbuka, ihe otwa pewa ombepo ya zi kuKalunga!’ (1 Kor. 2:12) Otatu ka pondola mokukondjitha ombepo yuuyuni waSatana kekwatho lyombepo yaKalunga nosho wo ngele tatu longitha nawa omasiloshimpwiyu agehe ngoka Jehova he tu pe.—Gal. 5:16.

Ombepo ondjapuki ohayi imike iiyimati iiwanawa mutse

16. Ombepo ondjapuki ohayi imike iiyimati yini mutse?

¹⁶ Etompelo etine kutya omolwashike tu na okuwilikwa kombepo yaKalunga olyo kutya ohayi tu kwathele tu imike iiyimati iiwanawa monkalamwenyo yetu. (Lesha Aagalati 5:22, 23.) Atuheni otwa hala okukala tu holike, twa nyanyukwa notu na ombili. Otwa hala okukala tu na eidhidhimiko, uukuume nosho wo uuwanawa. Ombepo yaKalunga oyo hayi imike mutse omaukwatya omawanawa ngoka hage tu etele uuwanawa, iilyo yomaukwanegumbo getu nosho wo yegongalo. Otu na aluhe okukokeka iiyimati yombepo ondjapuki, molwaashoka kapu na ongamba kutya oyinipo tu na okwiimika.

17. Ongiini tatu vulu okuninga ngaashi tatu vulu opo tu kokeke iiyimati yombepo?

¹⁷ Oshi li nawa tu tale ngele okupopya kwetu niilonga yetu otayi ulike ngaa kutya otatu wilikwa kombepo ondjapuki nohatu imike iiyimati yayo. (2 Kor. 13:5a; Gal. 5:25) Ngele otu wete kutya otwa pumbwa okukokeka uukwatya wontumba wiiyimati yombepo, otu na okukala hatu longo metsokumwe nombepo ondjapuki opo tu wu kokeke. Shika otatu vulu oku shi ninga ngele tatu konakona uukwatya kehe mOmbiimbeli nosho wo miileshomwa yetu yopaKriste nokutala nkene tatu vulu oku wu ulika monkalamwenyo yetu yakehe siku nokuninga ngaashi tatu vulu, opo wu koke mutse.a Oshe tu yelela kutya omolwashike twa pumbwa okuwilikwa kombepo yaKalunga sho tu wete nkene hayi tu kwathele monkalamwenyo yetu noyAakriste ooyakwetu.

Mbela oho etha ngaa ombepo yaKalunga yi ku wilike?

18. Ongiini Jesus e tu tulila po oshiholelwa shi na ko nasha nokukatuka metsokumwe newiliko lyokombepo ondjapuki?

¹⁸ Jesus oku shi iinima ayihe kombanda yevi molwaashoka oku li “engomba” ndyoka lya longo pamwe naKalunga okushita iinima ayihe. Oku shi kutya evi oli na oonkondo dhomangeneta ndhoka hadhi kwathele aantu ngele taya longitha okompasa. (Omayel. 8:30; Joh. 1:3) Ihe Ombiimbeli inayi popya nando kutya Jesus okwa li ha wilikwa kokompasa nenge kokaalita sho a li kombanda yevi. Otayi popi kutya ombepo ondjapuki oyo ya li tayi dhana onkandangala monkalamwenyo yaJesus sho a li kombanda yevi. Okwa li e etha yi mu wilike nokwa li ha katuka metsokumwe nayo. (Mark. 1:12, 13; Luk. 4:14) Mbela nangoye osho ho ningi?

19. Otu na okuninga shike opo ombepo ondjapuki yi tu wilike monkalamwenyo yetu?

¹⁹ Ombepo yaKalunga ohayi wilike natango omadhiladhilo nomomitima dhaamboka ya hala okuwilikwa kuyo. Ongiini to vulu okweetha yi ku wilike wu ende mondjila yu uka? Kala aluhe ho galikana kuJehova e ku kwathele e yi ku pe yi ku wilike. (Lesha Aaefeso 3:14-16.) Katuka aluhe metsokumwe nomagalikano goye mokukala to kongo omayele ngoka ge li mOmbiimbeli, molwaashoka oya nyolwa mewiliko lyombepo ondjapuki. (2 Tim. 3:16, 17) Vulika komayele gayo gopandunge nokweetha ombepo ondjapuki yi ku wilike. Ngele to shi ningi, otu ulike kutya owe etha Jehova e ku wilike monkalamwenyo yoye ayihe muuyuni mbuka wa kolokosha.

[Enyolo lyopevi]

Owa ndhindhilika ngaa iitsa ya simana?

• Ongiini ombepo ondjapuki tayi vulu okunwetha mo onkalamwenyo yetu?

• Omolwomatompelo gane geni tu na okuwilikwa kombepo yaKalunga?

• Oshike tu na okuninga opo tu mone uuwanawa thiluthilu mokuwilikwa kombepo ondjapuki?

[Ethano pepandja 15]

Ombepo ondjapuki oyo ya li ya wilike Jesus monkalamwenyo ye sho a li kombanda yevi

[Ethano pepandja 17]

Ombepo yaKalunga otayi longo momadhiladhilo nomomitima dhaamboka ya hala okuwilikwa kuyo