Kalunga oku na ko nasha naakulupe

OKUNINGA nayi aakulupe hoka ku li apuhe nena, itaku kumitha. Ombiimbeli oya hunganeka nalenale kutya ‘momasiku gahugunina’ gonkalelo ndjika yuukolokoshi, aantu otaa ka kala ‘yi ihole nokaaye na ohole.’ (2 Timoteus 3:1-3, OB-1954) Oshitya shOshigreka sha tolokwa “aakaanohole” otashi vulu okukwatela mo ohole ndjoka hayi kala muukwanegumbo. Ngaashi naanaa sha hunganekwa mOmbiimbeli, oshi wetike nena kutya ohole ya tya ngaaka oya pumba.

Mekondjithathano enene naamboka haa ningi nayi aakulupe, Jehova Kalunga okwa simaneka lela mboka ya kulupa noku na ko nasha nayo. Tala nkene shika shu ulikwa mOmbiimbeli.

‘Omugameni gwaaselekadhi’

Oku na ko nasha kwaJehova Kalunga naakulupe okwi iwetikile mOmanyolo gOshihebeli. Pashiholelwa, mEpisalomi 68:5, David oti ithana Kalunga ‘omugameni gwaaselekadhi,’ mboka olundji ye li aakulupe.a Osha yela kutya Jehova oku na ko nasha naaselekadhi. Ombiimbeli otayi ti kutya ngele taya ningwa nayi, ondjahi ye ohayi hwama. (Eksodus 22:22-24) Aaselekadhi nosho wo aakulupe ayehe aadhiginini oya simanekwa kuKalunga nokaapiya ye ayehe. Omayeletumbulo 16:31 otaga popi etaloko lyaJehova Kalunga nosho wo lyoshigwana she sho taga ti: “Oomvi dhokomutse odho oshishani shuulenga; otashi adhika mondjila yuuyuuki.”

Itashi kumitha kutya okusimaneka aakulupe okwa li oshitopolwa sha simana shomOmpango ndjoka Jehova a pa Aaisraeli. Oya li ya lombwelwa taku ti: “Simanekeni aakulupe, ne mu yele aakuluntu yoomvi. Tileni Kalunga keni, Ongame OMUWA.” (Levitikus 19:32) Onkee ano, muIsraeli okusimaneka aakulupe okwa li kwa pambathana nokuli nekwatathano lyomuntu naJehova Kalunga. Omuntu ka li ta vulu okutya oku hole Kalunga ngele oha ningi nayi aakulupe.

Aakriste kaye li kohi yOmpango yaMoses. Ihe oye li kohi ‘yompango yaKristus,’ ndjoka ya nwetha mo noonkondo eihumbato lyawo niikala yawo, mwa kwatelwa okukala ye hole aavali naakulupe nokukala ye na ko nasha nayo. (Aagalati 6:2; Aaefeso 6:1-3; 1 Timoteus 5:1-3) Aakriste ohayu ulike ohole hamolwaashoka ya lombwelwa ye shi ninge, ihe omolwaashoka oyi inyengithwa tashi zi komutima. Omuyapostoli Petrus okwe tu ladhipika a ti: “Holathaneni ano lelalela nomwenyo aguhe.”—1 Petrus 1:22.

Omulongwa Jakob ote tu pe etompelo lilwe lyokukala tu na ko nasha naakulupe. Okwa nyola a ti: “Elongelokalunga lya yela nolya yogoka koshipala shaKalunga Tate olyo okusila oshimpwiyu oothigwa naaselekadhi muudhigu wawo nokwiikotokela waa nyatekwe kuuyuni.” (Jakob 1:27) Shoka Jakob a popi otashi tu ulikile nkene oothigwa naaselekadhi ye li ya simana kuJehova noye holike kuye.

Onkee ano, okwaaninga nayi aakulupe hako owala kwa pumbiwa. Pehala lyaashono, otu na oku yu ulikila olukeno lwashili moku ya longela iilonga iiwanana. (Tala oshimpungu “Ohole ohayi ulikwa kiilonga” pepandja 6-7.) Jakob okwa nyola a ti: ‘Eitaalo lyaa na iilonga, olya sa.’—Jakob 2:26.

Ehekeleko “muudhigu wawo”

Opu na wo oshinima shilwe shoka tatu ilongo moohapu dhaJakob. Ndhindhilika kutya Jakob okwa lombwele Aakriste ya sile oshimpwiyu aaselekadhi “muudhigu wawo.” Oshitya shOshigreka sha tolokwa “uudhigu” otashi ti lelalela okunika oluhodhi nenge okumona iihuna hoka kwe etithwa komathininiko goonkalo dhetu monkalamwenyo. Kapu na omalimbililo kutya oyendji yomaakulupe oye li muudhigu mboka. Yamwe otaa si ezaza. Yalwe oya polimana molwokungambekwa kuukulupe. Nokuli naamboka haa longo unene miilonga yokulongela Kalunga, otashi vulika ya teke omukumo. Dhiladhila kuJohn,b ngoka a kala omuuvithi omudhiginini gwUukwaniilwa waKalunga uule woomvula dhi vulithe po 40. Oomvula 30 dhahugunina dhomudho okwa kala miilonga yethimbo lyu udha yi ikalekelwa. Ngashingeyi John ngoka e na oomvula 80 nasha, ota zimine kutya omathimbo gamwe oha kala e uvite a teka omukumo. Ota ti: “Olundji ohandi dhimbulukwa omapuko gandje gonale, noga li ogendji noonkondo. Ohandi dhiladhila aluhe kutya ando onde ga henukile, ando oshi li nawa.”

Aakulupe mboka otaya vulu okuhekelekwa kokutseya kutya nonando Jehova okwa gwanenena, ina tegelela tu kale twa gwanenena. Nonando omapuko ngoka tatu ningi, oku ga wete, Ombiimbeli otayi mu popi tayi ti: “OMUWA, ngele to kala nokudhimbulukwa oondjo, olye ta vulu okukala po?” (Episalomi 130:3) Eeno, Jehova iha tala owala omapuko getu, ihe oha tala shoka shi li momitima dhetu. Otu shi shi ngiini?

Omukwaniilwa David ngoka ye mwene a li a yono nokwa li inaa gwanenena, okwa li a nwethwa mo kuKalunga a nyole oohapu tadhi landula ndhoka tadhi adhika mEpisalomi 139:1-3 tadhi ti: “OMUWA, ongoye to konakona ndje nowa tseya ndje. Owa tseya ndje, uuna nda kuutumba nongele nda thikama; omadhiladhilo gandje agehe oto ga tseya, manga inaaga holoka. Ou wete ndje, ngele tandi yi kiilonga nenge te vululukwa; ashihe shoka te ningi, ou shi wete.” Mpaka, oshitya “wete” melaka lyopetameko otashi ti lelalela “okuyela,” ngaashi naanaa omunepya ha yele iilya molungu. David okwa nwethwa mo kuJehova oku tu shilipaleka kutya Jehova okwa fa ta yele iilonga yetu iiwanawa nohe yi dhimbulukwa.

Tate yetu gwomegulu omunahenda oha dhimbulukwa noha simaneke nokuli iilonga yetu iiwanana shampa tatu kala aadhiginini kuye. Ombiimbeli otayi ti kutya ohe shi tala ko shi li uugoyokithi ngele ta dhimbwa iilonga yetu nohole yetu mokusimanekitha edhina lye.—Aahebeli 6:10, OB-1954.

“Iikulu oya hula po”

Ombiimbeli otayi ulike kutya omaupyakadhi hage etwa kuukulupe kaga li elalakano lyaKalunga li na ko nasha naantu. Iilanduliko iiwinayi yuukulupe mbyoka ya ningi oshitopolwa shonkalamwenyo yaantu ayehe, oye ya po owala sho aakuluntu yetu yotango ya tukuluthile Omushiti gwawo oshipotha. (Genesis 3:17-19; Aaroma 5:12) Ihe itashi ka tsikila shi li ngawo sigo aluhe.

Ngaashi sha tumbulwa nale, oonkalo oombwinayi ndhoka tadhi monika nena, mwa kwatelwa okuninga nayi aakulupe, odhi li euliko kutya otu li ‘momasiku gahugunina’ gonkalelo ndjika yiinima. (2 Timoteus 3:1) Elalakano lyaKalunga olyo okukutha po iilanduliko yuulunde, mwa kwatelwa mbyoka ye etwa kuukulupe neso. Ombiimbeli otayi ti: “[Kalunga] ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.”—Ehololo 21:4.

Muuyuni uupe waKalunga, uuwehame molwuukulupe otau ka kala kaau po we. Okuninga nayi aakulupe nako itaku ka kala po we. (Mika 4:4) Nokuli naamboka ya sa noye li medhimbulukwo lyaKalunga, otaya ka yumuka, opo nayo wo ya ka mone ompito okukala nomwenyo sigo aluhe moparadisa kombanda yevi. (Johannes 5:28, 29) Ethimbo ndyoka otashi ka kala shi iwetikile unene shi vulithe nale kutya Jehova Kalunga ke na ko nasha owala naakulupe ihe onaayehe mboka haya vulika kuye.

[Omanyolo gopevi]

[Oshimpungu/Omathano pepandja 6, 7]

Ohole ohayi ulikwa kiilonga

Momagongalo gOonzapo dhaJehova, aakuluntugongalo ohaya kwatele komeho mokusila oshimpwiyu aakulupe. Ohaya pulakene kekumagidho lyomuyapostoli Petrus tali ti: “Kaleni aasita yoshigunda shoka mwe shi pewa kuKalunga.” (1 Petrus 5:2) Okusila oshimpwiyu aakulupe momikalo tadhi longo oku li oshitopolwa shokulitha oshigunda shaKalunga. Ihe shoka osha kwatela mo shike?

Opo tu mone kutya aakulupe oya pumbwa lela shike, otashi pula eidhidhimiko notashi vulika twa pumbwa oku ya talela po iikando yontumba nokupopya nayo nombili. Otashi vulika ya pumbwa ekwatho li na ko nasha nokulanda iilandomwa yawo noku ya yogela iiyogomwa yawo, oku ya faalela kokugongala kwopaKriste, oku ya leshela Ombiimbeli niileshomwa yopaKriste, nosho wo tuu iinima yilwe oyindji. Mpoka tashi wapa, omalongekidho ge na oshilonga noge shi okwiinekelwa oge na okuningwa nokutulwa miilonga.c

Ihe ongiini ngele omumwatate nenge omumwameme a kulupa megongalo okwa adhika konkalo ondhigu, tashi vulika a pumbwa ekwatho lyopashimaliwa? Tango, otashi ka kala shi li nawa okutala ngele oku na aanona nenge aapambele yalwe mboka taya vulu oku mu kwathela. Shoka otashi tsu kumwe naashoka tashi popiwa muTimoteus gwotango 5:4 ta ti: “Omuselekadhi ngoka e na oyana nenge aatekulu, naa ilonge okukwatha aakuluntu yawo nooyinakulu paukriste. ‘Kayuhwena hadhela nyoko, nyoko onale e ku hadhele,’ oshoka osho ehalo lyaKalunga.”

Otashi vulika omukulupe ngoka okwa pumbwa ekwatho opo a mone ngele ye okwa gwana okupewa omakwatho gontumba ngoka haga pewa aakulupe kepangelo. Otashi vulika yamwe megongalo taya vulu oku mu kwathela. Ngele kapu na limwe lyomomakwatho ngoka tali wapa, aakuluntugongalo otaya vulu okutala ngele omukulupe ngoka okwa gwana okupewa ekwatho kegongalo. Poompito dhimwe, shoka osha li sha pitikwa megongalo methelemumvo lyotango, omolwaashoka omuyapostoli Paulus a li a nyolele omulongi pamwe naye Timoteus a ti: “Momwaalu namu nyolelwe omuselekadhi ngoka awike a adha omimvo omilongo hamano nokwa li omukiintu gwomulumentu gumwe awike, nota hokololwa a longo uuwanawa nokwa putudha aanona nokwa yakula oondjendi nokwa yogo oompadhi [dhaayapuki] nokwa kwatha oonakuthiminikwa nokwa dhiginine kehe tuu oshilonga oshiwanana.”—1 Timoteus 5:9, 10, OB-1954.

[Enyolo lyopevi]

[Ethano pepandja 5]

Dorkas okwa li ha sile oshimpwiyu aaselekadhi mboka ye li moluhepo.—Iilonga 9:36-39