“Yelekanitha ondjila kohi yoompadhi dhoye,” opo wu hume komeho

SHO oshigwana shaKalunga sha zi muBabiloni mo 537 K.E.N., Jehova okwa li ti ipula nondjila ndjoka taye ke enda okuya kuJerusalem. Okwe shi lombwele a ti: “Paleleni aagalukilimo epola! Tungeni onenendjila; umbii mo omamanya!” (Jes. 62:10) Dhiladhila owala nkene Aajuda yamwe ya li ye shi ningi. Otashi vulika yamwe ya tetekelele ya ka tunge ondjila, tashi vulika taya file omalambo nokuyelekanitha omapola. Shoka osha li sha kwathele aamwahe mboka ye ya li konima ye ende mondjila ya yelekana sho taya shuna koshilongo shawo.

Oshinima shoka otashi vulu okufaathanithwa nokulalakanena iinima yopambepo. Jehova okwa hala aapiya ye ayehe ya gwanithe po omalalakano ngoka kaaye na nando omaimbo gasha. Oohapu dhe otadhi tu ladhipike tadhi ti: “Yelekanitha ondjila kohi yoompadhi dhoye, noondjila dhoye nadhi kale dha kolelela.” (Omayel. 4:26) Kutya nduno ngoye omugundjuka nenge omukuluntu, oto vulu okumona uuwanawa momayele ngoka.

NINGA OMATOKOLO GOPANDUNGE, ONDJILA YOYE YI KALE YA YELEKANA

Otashi vulika wu uva nale omuntu ta popi kombinga yomugundjuka ta ti: ‘Ngandi ote shi enditha nawa lela’ nenge ‘Ntumba ota ka hulila kokule ngo.’ Aagundjuka oyendji oye na uukolele, omadhiladhilo hage endelele noya halelela okutompola monkalamwenyo. Ombiimbeli otayi popi mondjila sho tayi ti: “Uulenga waagundjukamati owo oshitima shawo” nenge owo oonkondo dhawo. (Omayel. 20:29) Omugundjuka ngoka ha longitha uunkulungu we noonkondo dhe mokulongela Jehova ota ka adha omalalakano gopambepo nota ka mona enyanyu lyashili.

Ihe ngaashi wu shi shi, uunkulungu waagundjuka yetu owa lengwa noonkondo muuyuni. Ngele omugundjuka ngoka e li moshili ote shi enditha nawa mosikola, aagandjimayele, aalongi nenge aalongwa ooyakwawo otashi vulika ye mu thiminike a ye kouniveesiti, opo anuwa a vule okupondola muuyuni mbuka. Nenge omugundjuka ngoka e shi omaudhano otashi vulika a thiminikwe kaagandji yiilonga a ninge omudhani a simana. Mbela owu li monkalo ya tya ngaaka nenge wu shi omuntu gwontumba e li monkalo ndjoka? Oshike tashi ka kwathela Omukriste a tokole nawa?

Shoka shi li mOmbiimbeli otashi vulu okukwathela omuntu a kale nonkalamwenyo ombwanawa. Omuuvithi 12:1 otayi ti: “Dhimbulukwa Omushiti gwoye momasiku guugundjuka woye.” Ongiini ngoye naagundjuka yalwe tamu vulu ‘okudhimbulukwa Omushiti gweni’?

Tala kwaashoka sha ningilwa Erica ngoka ha kala moWest Africa. Okwa li e hole etanga lyokoompadhi. Okwa hogololwa a ka dhane mosipana yopashigwana sho a gwanitha oomvula 15. Tashi ti, okwa li masiku ta ka dheulwa koEuropa, shoka tashi vulika sha li tashi ke mu pa ompito yokudhanena ooklaba oonene. Ihe okwa li ta ka tula ngiini miilonga omayele ngoka taga ti “dhimbulukwa Omushiti gwoye”? Ngoye naagundjuka yalwe otamu ki ilonga mo shike mugo?

Eric okwa tamekele okukonakona Ombiimbeli nOonzapo dhaJehova sho a li natango mosikola. Onkee ano okwi ilongo kutya Omushiti ota ka kandula po thiluthilu omaupyakadhi ngoka ge li ko kunena. Okwa mono kutya osha simana okulongitha ethimbo noonkondo dhe mokulonga ehalo lyaKalunga. Shika oshe mu ningitha a tokole e ethe po okudhana etanga pondondo yopombanda. Eric okwa ninginithwa nokwa humu komeho mokulongela Jehova. Konima yethimbo, okwa ningi omuyakuligongalo nokonima okwa taambwa kOsikola yOmbiimbeli yOkudheula Aamwatate Inaaya Hokana.

Ando Eric okwa lalakanenene omaudhano, otashi vulika ando a ninga omuyamba nokwa simana. Ihe okwa mono kutya Ombiimbeli oyi li mondjila sho tayi ti: “Eliko lyomuyamba olyo oshilando she sha kola, ngashika ekuma eleeleka lyaa shi kukondwa momadhiladhilo ge.” (Omayel. 18:11) Eliko nuuyamba ihayi gamene omuntu shili. Nokuli mboka haya lalakanene eliko nenge uuyamba ‘ohaya yono po oomwenyo dhawo niimpwiyu oyindji.’ — 1 Tim. 6:9, 10.

Otashi nyanyudha shili okumona aagundjuka oyendji nkene ya nyanyukwa noya gamenwa sho ye li miilonga yethimbo lyu udha. Eric ota ti: “Onda yi ‘mosipana’ yaapiya yaJehova mboka ye li miilonga yethimbo lyu udha. Ndjika oyo osipana ya dhenga mbanda, notandi pandula Jehova sho a kwathele ndje ndi landule ondjila ndjoka tayi eta enyanyu lyashili nondi tompole monkalamwenyo.”

Ngoye oto ka ninga shike? Pehala lyokulalakanena omaithano guuyuni mbuka, omolwashike itoo dhimbulukwa Jehova ‘moondjila dhoye’ mokukokola ondjila? — Tala oshimpungu “Uuwanawa mboka itaawu vulu okuza melongo lyokouniveesiti.”

KUTHA MO OMANDANGALATI MONDJILA YOYE

Aaihokani yamwe sho ya talele po oshitayimbelewa moAmerika, oya mono nkene Aabetele ya nyanyukwa shili. Konima omumwameme okwa nyola a ti: “Otwa li tu wete kutya shoka hatu longo osha gwana owala.” Aaihokani mbaka oya tokola ye ethe po iinima yontumba, opo ya longithe ethimbo lyawo noonkondo dhawo miilonga yaJehova.

Aaihokani mbaka ethimbo limwe oya li yu uvite ya gwililwa po kashona komalunduluko ngoka ye na okuninga. Ihe esiku limwe, oya dhiladhila kenyolo lyesiku ndyoka ya lesha muJohannes 8:31, moka Jesus a ti: “Ngele tamu vulika koohapu dhandje, nena kapu na omalimbililo, one aalongwa yandje.” Opo nduno oya ti: “Kutya nduno otashi ke tu pula shike, otatu ka kaleka onkalamwenyo yetu yanathangwa.” Oya landitha po egumbo lyawo enene, e tayi itsukulula iimpwiyu yilwe noya tembukile kegongalo lilwe ndyoka lya li lya pumbwa ekwatho. Ngashingeyi otaya kokola ondjila, yo ohaya kwathele mokutunga Iinyanga yUukwaniilwa nopiigongi iinene. Oyu uvite ngiini? Oya ti: “Ngashingeyi otwa nyanyukwa sho tu na onkalamwenyo yanathangwa, tatu ningi owala shoka ehangano lyaJehova hali tu ladhipike tu ninge.”

KALA MONDJILA NDJOKA TAYI KU KWATHELE WU KOKE PAMBEPO

Salomo okwa nyola: “Omeho goye naga tale gu ukilila, noombafu dhoye dha tongolola komeho.” (Omayel. 4:25) Ngaashi owala omuhingi ha tala nawa sho ta hingi, natseni wo natu yandeni kehe endangalati ndyoka tali ke tu imba tu lalakanene iinima yopambepo.

1. Aagundjuka yOonzapo dhaJehova taya lalakanene iinima yopambepo; 2. Okandjila ka kuthwa omandangalati

Omalalakano gopambepo geni to vulu okwiitulila po noku ga adha? Oshiwanawa okuya miilonga yethimbo lyu udha. Oto vulu okutembukila kegongalo lyopopepi nangoye ndyoka li na oshitopolwa oshinene noli na ompumbwe yaauvithi ya pyokoka. Nenge wu tembukile kegongalo ndyoka li na aauvithi oyendji, ihe kali na aakuluntugongalo naayakuligongalo ya gwana. Mbela ito vulu oku ka kwathela? Omolwashike itoo popi nomutonatelishikandjo wu pule ngele oto vulu oku ka kwathela? Ngele owa hala oku ka kwathela koshilongo shilwe, oto vulu okupula uuyelele kombinga yomagongalo ngoka ge na ompumbwe moshilongo moka.b

Natu taleni ishewe kwaashoka sha popiwa muJesaja 62:10. Yamwe yomAajuda otashi vulika ya longo nuudhiginini ya yelekanithe noyo opaleke ondjila yokushuna nayo koshilongo shawo, opo ayehe ya vule okuthika ko. Ngele oto longo nuudhiginini wu adhe omalalakano gopambepo, ino sholola. Oto vulu oku ga adha kekwatho lyaKalunga. Pula Jehova e ku pe uunongo, sho to kambadhala okukutha po omandangalati mondjila yoye. Mokweendela ko kwethimbo, oto ka mona nkene te ku kwathele wu ‘yelekanithe ondjila kohi yoompadhi dhoye.’ — Omayel. 4:26.

a Halyo edhina lye lyolela.

b Tala embo Organized to Do Jehovah’s Will, epandja 111-112.

Uuwanawa mboka itaawu vulu okuza melongo lyokouniveesiti

SHO Flavia a li okakadhona okashona, yinakulu ngoka a li Onzapo yaJehova okwa li ha popi naye kombinga yOmbiimbeli. Ihe he ngoka a li omulongi, okwa li he mu ladhipike e ki ilongele uunongononi kouniveesiti. Yalwe oya li wo haye mu lombwele taya ti: “Epipi lyoye olyo tali ka gamena opulanete kaayi yonuke po.” He okwe mu kwathele a ye kouniveesiti ya tseyika nawa e ta tameke okuninga omapekapeko nkene taku vulu okulongithwa omahooli itaaga nyateke opulanete.

Flavia okwa ka mona kutya aalongwa oyendji kaye na ko nasha ‘nokugamena opulanete.’ Oshikwawo, oopolohalama dhimwe dhouniveesiti odha li hadhi ambidhidhwa kaanangeshefa, onkee aaningi yomapekapeko otashi vulika ya dhengwe okati kokoonyala. Shika osha yemateke Flavia. Sho Oonzapo dhaJehova dhe mu talele po, shoka Ombiimbeli tayi ti kombinga yaKalunga nonakuyiwa osha pendutha ohokwe muye.

Flavia okwa taamba ko oshili yOmbiimbeli e ta ninginithwa. Ihe ka li e na ethimbo lya gwana lyokuuvitha, oshoka okwa li ti ilongele odigilii yopombanda. Esiku limwe omutonatelishikandjo okwa kundathana oohapu dhaJakob 4:17 ndhoka tadhi ti: “Ngoka e shi kutya oku na okulonga uuwanawa, ndele ite shi ningi, oye oku na oondjo.” Shoka oshe mu ningitha i ipule nonkalamwenyo ye. Okwa ti: “Onda li ndi na oomwenyo mbali, onda li nda hala Jehova a yambeke ndje, ihe onda li nda hala wo okumona uuwanawa meithano lyandje. Onda li ndi na okutokola.”

Flavia okwa tokola e ethe po elongo lye kouniveesiti. Mbela okwe ki ipa ombedhi? Ota ti:

“Miilonga yaJehova, onda mona mo uuwanawa mboka itaawu vulu okwaadhika kouniveesiti. Jehova okwa kwathela ndje shili. Okwa longa ndje okukala ndi na olukeno, okuulika ohole nokukwathela yalwe pambepo. Onda nyanyukwa mondjokana yandje nondi na etegameno ewanawa li vule ndyoka uunongononi tawu vulu okupa ndje. Jehova oye owala ta vulu okugamena opulanete yetu. Kandi na esiku ndi mu pilamene.” Flavia nomusamane gwe ohaya longo koombelewa oonene dhOonzapo dhaJehova moNew York.