Ontopolwa 26

Omolwashike hashi kala oshidhigu okulonga uuwanawa?

SHO Saulus a li ha longo uuwinayi, olye a li ha kala a nyanyukwa?— OSatana Ondiaboli. Ihe aawiliki yomalongelokalunga gOshijuda nayo oya li haya kala ya nyanyukwa. Ihe sho Saulus a li a ningi omulongwa gwOmulongi Omunene e ta kala hi ithanwa Paulus, aawiliki yomalongelokalunga mboka oya tameke okukala ye mu tonde. Onkee ano, mbela ngashingeyi owu wete kutya omolwashike shi li oshidhigu komulongwa gwaJesus a longe uuwanawa?—

Omusaaseri omukuluntu gwedhina Ananias esiku limwe okwa lombwele aantu ya dhenge Paulus moshipala. Ananias okwa li nokuli a kambadhala a tulithe Paulus mondholongo. Paulus okwa li ha mono iihuna noonkondo sho a ningi omulongwa gwaJesus. Pashiholelwa, aakolokoshi oya li ya dhenge Paulus noya kambadhala oku mu dhipaga nomamanya.—Iilonga 23:1,2; 2 Aakorinto 11:24,25.

Aantu oyendji otaya ka kambadhala oku tu ningitha iinima mbyoka inaayi pandika kuJehova. Dhiladhila kombinga yomapulo ngaka taga landula mpaka, mbela owu hole ngaa okulonga uuwanawa? Mbela owu hole okulonga uuwanawa noho wu longo nokuli nuuna yalwe ye ku tonde omolwokuninga ngaaka? Oku shi ninga otaku pula uuladhi, hasho mbela?—

Otashi vulika wi ipule kutya ‘omolwashike aantu ye tu tonde sho hatu longo uuwanawa? Mbela kaye na okukala ya nyanyukwa?’ Oshi li mondjila okudhiladhila ngaaka. Aantu oya li ye hole Jesus omolwiinima iiwanawa mbyoka a li ha ningi. Esiku limwe aantu ayehe yomoshilando shimwe oya li ya gongala pomweelo gwegumbo moka a li ha kala. Oya li ye ya molwaashoka Jesus okwa li ta aludha aantu mboka ya li taye ehama.—Markus 1:33.

Ihe omathimbo gamwe aantu kaya li ye hole shoka Jesus a li ha longo aantu. Nokuli nando okwa li ha longo shoka shi li mondjila, aantu yamwe oya li ye mu tonde noonkondo molwaashoka okwa li ha popi oshili. Shika osha li sha ningwa esiku limwe muNasaret, moshilando moka Jesus a putukila. Okwa li a yi mosinagoga, mehala moka Aajuda ya li haya gongala ya longele Kalunga.

Mosinagoga moka Jesus okwa li a gandja oshipopiwa oshiwanawa okuza mOmanyolo. Petameko aantu oya li ye shi panda. Oya li ya kuminwa oohapu ndhoka a popi. Kaya li taya vulu oku shi itaala kutya omumati nguka a putukila moshilando shawo oye ta popi iinima mbyoka iiwanawa.

Opo nduno Jesus okwa popi ishewe oshinima shilwe. Okwa li e ya lombwele kutya Kalunga okwa hokwa aantu mboka kaaye shi Aajuda. Sho Jesus a popi oshinima shoka, mboka ya li mosinagoga oya geye. Mbela owu shi kutya omolwashike?— Omolwaashoka oya li haya dhiladhila kutya oyo owala ya hokiwa kuKalunga. Oya li haya dhiladhila kutya yo oye li nawa ye vule yalwe. Onkee ano, oya tondo Jesus molwoshinima shoka a popi. Mbela owu shi kutya oya li ya kambadhala oku mu ningila shike?—

Ombiimbeli otayi ti: ‘Oya tidha mo Jesus moshilando e taye mu fala kolungenge lwondundu hoka oshilando shawo sha li sha tungilwa, opo ye mu undulile pevi. Ihe okwa piti mokati kawo ayehe nokwa yi.’—Lukas 4:16-30.

Mbela ngele shoka oshe ku ningilwa, oto ka ya we ngaa kaantu mboka wu ke ya lombwele kombinga yaKalunga?— Shoka otashi ka pula uulaadhi, hasho mbela?— Ihe konima yomvula Jesus okwa li a shuna ko kuNasaret. Ombiimbeli otayi ti: ‘Okwe ya longo moosinagoga dhawo.’ Jesus ka li e etha po okuuvithila aantu oshili omolwuumbanda wokutila aantu mboka ya li kaaye hole Kalunga.—Mateus 13:54.

MEsabati limwe, Jesus okwa yi kosinagoga hoka kwa li ku na omulumentu gumwe e na oshikaha sha lemana. Jesus okwa li a pewa oonkondo kuKalunga opo a aludhe omulumentu ngoka. Ihe aantu yamwe oya li taya kambadhala oku mu etela uupyakadhi. Mbela Omulongi Omunene okwa ningi po shike?— Tango okwe ya pula a ti: ‘Ngele gumwe gwomune onzi ye ya gwile moshilambo, mbela ite ke yi hila mo?’

Eeno, otaye ke yi hila mo, nokuli nando omEsabati mesiku moka ya li ye na okuvululukwa. Onkee ano, Jesus okwa ti: ‘Osho opala okukwathela omuntu mesiku lyEsabati, molwaashoka omuntu oku vule onzi olwindjilwindji.’ Kasha li tuu sha yela kutya Jesus okwa li e na okukwathela omulumentu nguka moku mu aludha!

Jesus okwa lombwele omulumentu ngoka u uthe oshikaha she. Mbalambala osha aluka. Omulumentu ngoka ka li tuu a nyanyukwa! Ihe mbela ongiini kombinga yaalumentu mbeyaka yalwe? Mbela oya li ngaa ya nyanyukwa?— Aawe. Oya li nokuli ya tondo Jesus noonkondo. Oya tameke okupangela oompangela ye mu dhipage.—Mateus 12:9-14.

Kunena osho wo shi li ngaaka. Kutya nduno otu ninge shike, katu na esiku tu nyanyudhe aantu ayehe. Onkee ano, otu na okutokola kutya olye naanaa twa hala okunyanyudha. Ngele otwa hala okunyanyudha Jehova Kalunga nOmwana, Jesus Kristus, otu na okukala aluhe hatu ningi shoka taye tu longo. Ihe ngele otwa kala nokuninga ngaaka, mbela olye ta ka kala e tu tonde? Olye te ke shi ninga oshidhigu kutse tu longe shoka oshiwanawa?—

OSatana Ondiaboli. Ihe oolye ishewe taya ka kala ye tu tonde?— Oomboka ya pukithwa kOndiaboli mokwiitaala iinima mbyoka ya puka. Jesus okwa li a lombwele aawiliki yomalongelokalunga yopethimbo lye a ti: “One omu na ho omuhindadhi, one nomwa hala okulandula uuhalu waho.”—Johannes 8:44.

Oku na aantu oyendji mboka ye holike kOndiaboli. Jesus okwe yi ithana “uuyuni.” Mbela sho to dhiladhila, “uuyuni” mboka Jesus a popi kombinga yawo oshike?— Natu ka tale muJohannes ontopolwa 15 ovelise 19. Moka otatu lesha mo oohapu dhaJesus ndhika tadhi ti: “Ando mwa li yomuuyuni, nena ando uuyuni ou hole aantu yawo. Ihe ngame onde mú hogolola mo muuyuni; omolwaasho uuyuni u na oku mú tonda.”

Onkee ano, uuyuni mboka wu tonde aalongwa yaJesus owa thikama po maantu ayehe mboka kaaye shi aalanduli ye. Mbela omolwashike uuyuni wu tonde aalongwa yaJesus?— Dhiladhila kombinga yaashoka. Olye omupangeli gwuuyuni mbuka?— Ombiimbeli otayi ti: “Uuyuni auhe ou li mepangelo lyomuhindadhi.” Omuhindadhi ngoka, oSatana Ondiaboli.—1Johannes 5:19.

Mbela ngashingeyi owa mona kutya omolwashike shi li oshidhigu okulonga uuwanawa?— Satana nuuyuni we ohaye shi ningi oshidhigu. Ihe opu na natango etompelo lilwe. Mbela oto dhimbulukwa kutya olini?— MOntopolwa 23 yembo ndika, otwa li twi ilongo kutya atuheni otwa valwa nuulunde. Mbela itashi ka kala oshiwanawa ngele uulunde, Ondiaboli nuuyuni wayo oya kala kaayi po we?—

Ombiimbeli otayi uvaneke tayi ti: ‘Uuyuni otawu hulu po.’ Shika osha hala okutya aantu ayehe mboka kaaye shi aalanduli yOmulongi Omunene itaya ka kala po we. Itaya ka pitikwa ya kale nomwenyo sigo aluhe. Mbela owu shi kutya oolye taya ka kala nomwenyo sigo aluhe?— Ombiimbeli oya gwedha ko ishewe tayi ti: “Ihe ngoka ta longo shoka Kalunga e shi hala, ota kala e na omwenyo aluhe.” (1Johannes 2:17) Eeno, oomboka owala haya longo “shoka Kalunga e shi hala” taya ka kala sigo aluhe muuyuni uupe waKalunga. Onkee ano, nonando oshi kale oshidhigu, otwa hala okukala hatu longo uuwanawa, hasho mbela?—

Natu leshe pamwe Omanyolo ngaka tagu ulike kutya omolwashike kaashi shi oshipu okulonga uuwanawa: Mateus 7:13, 14; Lukas 13:23, 24 nIilonga 14:21,22.

[Ethano pepandja 137]

Paulus sho a li ha longo uuwanawa okwa kala nokumonithwa iihuna yashike?

[Ethano pepandja 138]

Omolwashike aantu mbaka taya kambadhala okudhipaga Jesus?

[Ethano pepandja 141]

Sho onkalelo ndjika yiinima tayi ka hanagulwa po, oshike tashi ka ningilwa aantu mboka haya longo uuwanawa?